Manam-pahefana voatendry hiaraka amin’ny mpitsara romanina teny imasom-bahoaka sy hanatanteraka ny baikony ny “mpanefa baiko” (As 16:35, 38), izay nandikana ny teny grika hoe rhabdokôs (a.b.t.: mpitondra tsorakazo). Lictor izy io amin’ny teny romanina. Raha tany amin’ny zanatany romanina izy, dia nitondra zaram-pamaky nohodidinina hazo ôrma na hazo hafa marotsaka ary nipoitra teo amin’ny sisiny ny lelam-pamaky. Io no famantarana ny andraikitra notanany sy ny fahefan’ilay mpitsara.

Mitovitovy amin’ny an’ny polisy ankehitriny ny andraikitry ny mpanefa baiko, saingy tsy maintsy niaraka tamin’ny mpitsara foana izy. Tsy nanao zavatra mivantana ho an’ny vahoaka izy, fa izay baiko nomen’ilay mpitsara ihany no narahiny.

Nanambara ny fahatongavan’ny mpitsara ny mpanefa baiko rehefa hiseho vahoaka izy io. Nisava lalana izy ary nanomana ny fandraisana azy io tamim-boninahitra. Niambina ny tranon’izy io koa izy, nampita ny hafany, nampiantso an’ireo voaheloka ho eo anatrehany, nisambotra mpandika lalàna ary nikapoka azy ireny indraindray.

Herintaona ihany no tokony hiarahan’ny mpanefa baiko amin’ny mpitsara iray, nefa naharitra ela kokoa izany matetika. Olona afaka ny ankamaroan’izy ireny. Tsy nanao miaramila izy ireny raha Romanina, ary nandray karama.

Tompon’andraiki-panjakana notendren’i Roma no nitondra tao Filipy zanatany romanina. Ireo no nandidy ny hikapohana an’i Paoly sy Silasy tamin’ny hazo. Naniraka mpanefa baiko izy ireo ny ampitso ka nandidy ny hanafahana azy roa lahy. Tsy nanaiky anefa i Paoly. Notakiny mihitsy ny hahatongavan’ireo tompon’andraiki-panjakana teo, sy haneken’izy ireo hoe diso izy ireo.​—As 16:19-40; jereo TOMPON’ANDRAIKI-PANJAKANA.