(Odèda) [Nanamaivamaivana [Andriamanitra]].

1. Rain’i Azaria mpaminany. (2Ta 15:1) Mpaminany koa i Odeda raha jerena izao lazain’ny 2 Tantara 15:8 izao: “Raha vao ren’i Asa izany teny izany sy ny faminanian’i Odeda mpaminany.” Misy manam-pahaizana milaza fa fahadisoan’ny mpanao dika soratra ilay hoe “Odeda mpaminany”, ka tokony hesorina. Mametraka olana anefa izany satria lasa tsy mazava ilay hoe ren’i Asa ‘izany teny izany sy ny faminaniana.’ Ny hafa indray manampy teny ka lasa toy izao ilay andininy: “Ren’i Asa izany teny izany sy ny faminanian’i Azaria zanakalahin’i Odeda.” Ataon’izy ireo izany mba hitovy amin’izay voalazan’ny Fandikan-teny Grikan’ny Fitopolo (Kôdeksa Alexandrinus), Peshitta syriàka, ary ny Vulgate latinina (nohavaozina tamin’ny andron’ny Papa Clément Faha-8). Tsy voavaha ihany anefa ilay olana etsy aloha. Izao no soso-kevitra fahatelo: Arahina izay lazain’ny soratra nataon’ny Masoreta, araka izay efa ao, izany hoe ekena fa nisy faminaniana nolazain’i Odeda saingy tsy voalaza ao amin’ilay fitantarana izy io. Narahin’i Asa ny tenin’i Azaria (2Ta 15:2-7) sy ny tenin’i Odeda rainy.

2. Mpaminany tany Samaria tamin’ny fotoana nanjakan’i Peka tany Israely fa i Ahaza kosa tany Joda (762-t. 759 T.K.). Rehefa resin’ny Israely sy Syria tanteraka ny Joda, dia nisy babo 200 000 avy tany amin’ny fanjakana tany atsimo nentina tany Samaria. Nitsena an’ilay tafika mpandresy anefa i Odeda, ka nampitandrina fa ho tezitra amin’izy ireo Andriamanitra raha nanandevo ny rahalahiny izy ireo. Nanazava i Odeda hoe: ‘Noho ny faharatsian’ny Joda no nanoloran’i Jehovah azy teo an-tananareo. Koa aza atao mpanompo izy ireo fa hirehitra aminareo ny fahatezeran’i Jehovah. Avereno ireo babo!’ Nisy efa-dahy, izay samy lohany teo amin’ny Efraimita, nanohana an’i Odeda, ka nokarakaraina sy nalefa nody ireo babo.​—2Ta 28:5-15.