Olona idiran’ny fanahy ratsy sy eo ambany fifehezany. Lasa tsy nahay niteny, jamba, adala, na natanjaka be ny olona sasany nisy demonia. Nampijalin’ny demonia mafy izy ireny. (Mt 9:32; 12:22; 17:15; Mr 5:3-5; Lk 8:29; 9:42; 11:14; As 19:16) Nidiran’ny demonia na lehilahy na vehivavy na ankizy. (Mt 15:22; Mr 5:2) Indraindray demonia maro no indray niditra tao amin’ny olona iray. (Lk 8:2, 30) Lasa salama saina indray ilay olona rehefa navoaka ilay demonia. Tsy mitovy ny hoe misy demonia sy ny hoe marary, matoa samy nositranin’i Jesosy ireo.​—Mt 8:16; 17:18; Mr 1:32, 34.

Anisan’ny fahagagana lehibe indrindra nataon’i Jesosy ny namoaka demonia. Tsy nahatohitra an’i Jesosy mantsy izy ireny. Nisy olona tsy faly anefa rehefa namoaka demonia i Jesosy. Niampanga azy ho niara-niasa tamin’i Belzeboba lehiben’ny demonia, ohatra, ny Fariseo. Izy ireo anefa, raha ny marina, no taranaky ny Devoly, hoy i Jesosy. (Mt 9:34; 12:24; Mr 3:22; Lk 11:15; Jn 7:20; 8:44, 48-52) Fantatr’i Jesosy hoe ny fanahin’i Jehovah no hery nandreseny ny demonia, ary nilaza izany mivantana izy. (Mt 12:28; Lk 8:39; 11:20) Ny demonia koa niaiky fa i Jesosy no “Zanak’Andriamanitra” sy “Ilay Masin’Andriamanitra”, ary nisy niantso azy hoe “Jesosy, Zanak’ilay Andriamanitra Avo Indrindra.” (Mt 8:29; Mr 1:24; 3:11; 5:7; Lk 4:34, 41; As 19:15; Jk 2:19) Tsy navelan’i Jesosy hitory momba azy mihitsy anefa ny demonia. (Mr 3:12) Nasainy nitory tamin’ny havany momba ‘izay rehetra nataon’i Jehovah taminy’ kosa ny lehilahy iray nivoahan’ny demonia.​—Mr 5:18-20.

Nomen’i Jesosy fahefana hamoaka demonia koa ny apostoliny 12 sy ireo mpianatra 70 nirahiny hitory. Afaka namoaka demonia tamin’ny anaran’i Jesosy àry izy ireo. (Mt 10:8; Mr 3:15; 6:13; Lk 9:1; 10:17) Na olon-kafa tsy niaraka foana tamin’i Jesosy sy ny apostoliny  aza afaka namoaka demonia tamin’ny anaran’i Jesosy. (Mr 9:38-40; Lk 9:49, 50) Mbola nanana izany fahefana izany ny apostoly, taorian’ny nahafatesan’i Jesosy. Nodidian’i Paoly hivoaka tamin’ny mpanompovavy iray, ohatra, ny “demonia mpilaza ny hoavy”, ka tezitra ny tompon-drazazavavy tia vola be. (As 16:16-19) Mba namoaka demonia tamin’ny anaran’i “Jesosy izay torin’i Paoly” koa ireo fito mirahalahy zanak’i Skeva mpisorona, nefa nosamborin’ilay lehilahy nisy demonia izy ireo, ka noratrainy mafy sy nampitanjahany.​—As 19:13-16.

Matetika no misy demonia ny olona tsy salama saina izay mahery setra sy tsy voafehy. Misy mpamoha angatra mamoaka demonia, hono. Mampahatsiahy antsika ny tenin’i Jesosy izany. Hoy izy: “Maro no hilaza amiko amin’izany andro izany hoe: ‘Tompo ô, Tompo ô, moa ve izahay tsy ... efa namoaka demonia tamin’ny anaranao ... ?’ Hotsoriko aminy anefa amin’izay fotoana izay hoe: Tsy fantatro mihitsy ianareo!” (Mt 7:22, 23) Aoka àry isika “hiambina” foana sy ‘hitafy ny fiadiana fiarovana rehetra avy amin’Andriamanitra mba hahafahantsika ho mafy orina ka hahatohitra ny teti-dratsin’ny Devoly’ sy ny demoniany.​—1Pe 5:8; Ef 6:11.