(pilào).

Tady kely misy vongana metaly na vato na tanimanga entina manamarina raha mahitsy sy mijidina tsara ny rindrina na zavatra hafa aorina. Antsoina indraindray koa hoe pilao ireo vongan-javatra mampahitsy an’ilay tady ireo. Nampiasa pilao ny mpandrafitra sy mpandatsa-biriky ary mpanao asa tanana fahiny.

Voalaza fa hisy pilao (a.b.t.: ny vato [na vatomizana], ny firapotsy, araka ny soratra nataon’ny Masoreta) eny an-tanan’i Zerobabela, rehefa haorina indray ny tempolin’i Jerosalema. (Za 4:9, 10) Nandatsaka ny fototr’ilay tempoly tokoa i Zerobabela, ary nanara-maso an’ilay asa fanorenana hatramin’ny farany.​—Ezr 3:8-10; 6:14, 15.

Teo ambony manda efa nampiasana pilao, izany hoe mahitsy tsara, no nahitan’i Amosa an’i Jehovah tao amin’ny fahitana. Nisy pilao teny an-tanan’i Jehovah, ary nilaza taminy Izy fa hampiasa pilao eo amin’ny olony. Tsy nanao izay mahitsy mantsy ny Israelita satria tsy nankatò ny didiny, ka hamoaka didim-pitsarana Izy ary ‘tsy hilefitra intsony amin’ny fahadisoany.’ Ho lasa aolo ny toerana avon’izy ireo, horavana ireo toerany masina, ary “hitsangana [Andriamanitra], ka hamely ny taranak’i Jeroboama amin’ny sabatra.” (Am 7:7-9) Noravan’ny Asyrianina tokoa i Israely sy Samaria tamin’ny 740 T.K.