Ranoka mahafaty avoakan’ny bibilava sasany sy ny biby hafa. (No 21:4-9; De 8:15; As 28:3-6) Anisan’ny teny hebreo ilazana ny poizin’ny biby mandady ny hoe hemah (De 32:24), izay azo adika koa hoe “vinitra”, “hatezerana”, sy ny toy izany. (De 29:28; Ezk 19:12) Avy amin’ny fototeny midika hoe “mafana” izy io (De 19:6), angamba satria mivonto sy mamaivay izay voakaikitry ny bibilava misy poizina. Rôʼsh na rôhsh (heb.) kosa no nadika hoe “poizin’ny” kôbrà sy hoe rano na zavamaniry “misy poizina.”​—De 32:32, 33; Jb 20:16; Je 8:14; 9:15; 23:15; Ft 3:19; jereo BIBILAVA MISY TANDROKA; KÔBRÀ; ZAVAMANIRY MISY POIZINA.

Toa natao hiarovan-tena na hamonoana fotsiny ny poizin’ny biby sasany. Mahaliana anefa ny tenin’i Munro Fox hoe: “Anisan’ny mahatonga ny vatan’ny biby sasany hiasa tsara ny poizina vokariny. Izany matetika no mety ho tena antony isian’ny poizina, ankoatra ny hoe iarovan-tena. Manampy ny bibilava handevon-kanina, ohatra, ny poizina amin’ny rorany.”​—Zavatra Mahagaga sy Tsy Fantatra Momba ny Biby, navoakan’ny Fikambanana Reader’s Digest, 1964, p. 259.

Heviny an’ohatra. Toy ny poizin’ny bibilava mahafaty ny lainga sy fanendrikendrehan’ny ratsy fanahy, satria manaratsy laza an’ilay resahiny. (Sl 58:3, 4) Hoy ny Salamo 140:3 momba ny mpanendrikendrika: “Ao ambany [na “ambadiky ny”] molony ny poizin’ny bibilava misy tandroka.” (Ro 3:13) Ao ambadiky ny molotry ny bibilava sy ny vanginy amin’ny valanorano ambony tokoa ny fihary mamoaka poizina. “Feno poizina mahafaty” ny lelan’izay manendrikendrika, manaratsy, manao fampianaran-diso, sy ny toy izany.​—Jk 3:8.