(Rehòba) [Tany Malalaka; Toerana Malalaka].

1. Rain’i Hadadezera mpanjakan’i Zoba, izay resin’i Davida.​—2Sa 8:3-12.

2. Levita, na razamben’ny Levita, izay nanisy tombo-kase ny fifanekena natao tamin’ny andron’i Nehemia sy Ezra.​—Ne 10:1, 9, 11.

3. Toerana na tanàna voatonona, rehefa nijery taratra ny tany Kanana ireo Hebreo 12 lahy nirahin’i Mosesy. (No 13:21) Mety ho izy io ihany ilay “Rehoba” sy ilay “Beti-rehoba” resahin’ny 2 Samoela 10:6, 8.​—Jereo BETI-REHOBA.

4. Anaran’ny tanàna iray na roa, tany amin’ny faritanin’i Asera. (Js 19:24, 28, 30) Misy manam-pahaizana milaza fa tanàna iray ihany no lazain’ireo andininy ireo. Asehon’ny andinin-teny hafa anefa fa toa toerana roa samy hafa ireo. Milaza, ohatra, ny Mpitsara 1:31, 32 fa “tsy noroahin’ny fokon’i Asera koa ny mponin’i ... Rehoba”, ka voatery niara-nonina tamin’ny Kananita tao ny Aserita. Milaza kosa ny Josoa 21:27, 31 sy ny 1 Tantara 6:71, 75 fa nomena ny taranak’i Gersoma (Gersona) i Rehoba, ka lasa tanànan’ny Levita. Lazain’ireo mihevitra an’i Rehoba ho toerana roa samy hafa fa  mbola teo am-pelatanan’ny Kananita ilay Rehoba iray, fa ilay iray kosa azon’i Asera ary nomena ny Levita avy eo. Misy àry mihevitra an’ilay Rehoba resahin’ny Josoa 19:28 ho i Kirbet el-ʽAmri, tokotokony ho 4 km any avaratratsinanan’i Akziba, ary ilay Rehoba resahin’ny andinin-teny hafa kosa ho i Tell el-Bir el-Gharbi (Tel Bira), tokotokony ho 10 km any atsinanana atsimoatsinanan’i Ako. Lazain’ireo mihevitra an’i Rehoba ho toerana iray ihany kosa, fa tsy noroahina ny Kananita tao Rehoba tamin’ny voalohany nefa voaroaka ihany izy ireo tatỳ aoriana, ka afaka nonina tao ny Levita. Mihevitra àry izy ireo fa i Tell el-Bir el-Gharbi io Rehoba io.