Vatosoa volontsôkôlà somary mena ary tantera-pahazavana. Karazana kalsedoanina izy io ary fanao ravaka. Nilaza i Pline Zokiny fa nantsoina hoe sardoanina izy io satria tany Sardisy, any Lydia, no nisy nitondra azy io voalohany tany Azia Minora. Misy anefa nanazava fa avy amin’ilay teny persianina hoe sered, izay midika hoe “mena somary mavo”, ny hoe sardoanina. Efa hatrany Persa, hono, no niantsoana azy toy izany, satria tany no niavian’izy io. Misy Baiboly miantso azy io hoe “sardoana” na “karneola.” Tsara tarehy sy mafy io vato io ary mora atao sokitra sy kosehina hangilatra tsara, ka lasa vato tena tian’ny mpanao asa tanana. Mety ho avy tany amin’ny Saikinosin’i Arabia no nahazoan’ny Hebreo ny sardoanina nampiasainy.

Miresaka momba ny sardoanina ny Apokalypsy 4:3. Voalaza ao fa “tahaka ny ... vatosoa mena [sardoana, Kat.; sardoanina, DIEM] no fahitana” an’ilay mipetraka eo ambony seza fiandrianana be voninahitra any an-danitra. “Voaravaka vatosoa isan-karazany” ny fototry ny mandan’ilay “tanàna masina, dia i Jerosalema Vaovao.” Ny sardoanina no vato fototra fahenina.​—Ap 21:2, 19, 20.