Toerana fianarana, ary avy amin’ny hoe skôle (gr.) izay midika hoe “fialam-boly”, ka lasa ilazana an’izay atao rehefa miala voly, toy ny resadresaka, famelabelarana, na fianarana.

Nodidian’ny Mpamorona hampianatra ny zanany momba ny fiainana sy ny fanompoana an’Andriamanitra ny ray aman-dreny. Ny fokon’i Levy koa no nasainy nampianatra momba ny fivavahana, tany Israely fahiny.​—Jereo FIANARANA, FAMPIANARANA.

Lasa nisy fianarana ambony momba ny Fivavahana Jiosy, tatỳ aoriana. Nianatra teo an-tongotr’i Gamaliela, ohatra, i Saoly (Paoly). Tsy neken’ny Jiosy hampianatra ny lalàn’Andriamanitra izay olona tsy nianatra tany amin’ireny sekoliny ireny.​—As 22:3; Jn 7:15.

 Nandaha-teny telo volana tao amin’ny synagogan’i Efesosy i Paoly, satria toerana fianarana ny synagoga. Nisy nanohitra mafy anefa ny vaovao tsara, ka nifindra tao amin’ny efitrano malalaky ny sekolin’i Tyrano i Paoly sy ny mpianatra. Nandaha-teny tao isan’andro nandritra ny roa taona izy. Tsy voalaza hoe natao inona io sekoly io. Navela hampiasa azy io anefa i Paoly, angamba ora maromaro isan’andro.​—As 19:8-10.

Sekoly nianarana ny horonam-boky misy ny Soratra Hebreo sy ny asa soratry ny apostoly sy ny namany ny toeram-pivorian’ny fiangonana kristianina. Vitsy ny Kristianina nanana ireny horonam-boky rehetra ireny sy ny taratasy rehetra ho an’ny Kristianina, ka rehefa nivory izy ireo no nandalina sy niara-nidinika azy ireny. (Kl 4:16) Tsy nanana horonana hanoratana koa ny Kristianina mahantra. Azo inoana àry fa teo amin’ny vakin-tanimanga no nanoratany tamin’ny ranomainty ny andinin-teny reny na nadikany avy tao amin’ny horonam-boky tany am-pivoriana, mba hianarany sy hampiasainy. Tsy maintsy niara-nianatra ny Soratra Masina tany an-trano koa ny mpianakavy rehetra. (Ef 6:4; 1Ko 14:35) Tsy nampianatra ny ankizy mitokana, toy ny amin’ny “sekoly alahady” ankehitriny, ny Jiosy sy ny apostolin’i Kristy, sady tsy nanome alalana ny hanaovana izany.