TANTERAKA foana ny faminanian’ny Baiboly. Resy tokoa i Tyro, ilay tanàna amoron-tsiraka ary avy eo rava ilay tanàna teo amin’ilay nosy.

Nifandray tsara i Israely sy Tyro tamin’ny andron’i Davida sy Solomona. (1Ta 14:1; 1Mp 9:10, 11) Mpivavaka tamin’i Melkart sy Astarta anefa ny mponin’i Tyro, ary ny raharaham-barotra no tena nimasoany. Lasa nirehareha i Tyro rehefa nanan-karena, ka nihantsy ady tamin’i Jehovah. Nilaza àry ny mpaminanin’i Jehovah fa hisy loza hanjo azy.

Nataon’i Nebokadnezara II fahirano ilay tanàna. Naharitra ela ilay izy, ka nety ho nisy nieritreritra hoe tsy tokony ho notohizina intsony. Nikiry ihany anefa i Nebokadnezara, ka resiny i Tyro rehefa afaka 13 taona. Notanterahiny àry ny faminanian’ny Baiboly izay efa nilaza fa izy no handresy azy io.​—Ezk 26:7-12.

Naminany koa i Zakaria tatỳ aoriana fa ho rava ny tanànan’i Tyro teo amin’ilay nosy. Ny sisan-javatra tamin’ilay tanàna fahiny no nanaovan’i Aleksandra Lehibe lalana hiampitana teny amin’ilay nosy. Nanangana tilikambo avo be fanaovana fahirano koa izy. Tanteraka àry ilay faminaniana, na dia avo be (46 m) aza ny mandan’i Tyro.​—Za 9:3, 4; Ezk 26:4, 12.