EFA ho zato ny zavama-niry sy hazo resahin’ny Baiboly, ka anisan’izany ny oliva, amandie, kapra, ary antrendry. Manampy antsika hahazo ny hevitry ny andinin-teny sasany ny fahafantarana azy ireo.

Diniho, ohatra, ny hazo oliva izay anisan’ny zavamaniry nilaina indrindra fahiny. Tena mafy ary velona an-jatony taona io hazo tsara tarehy io, izay matetika no miolikolika sy misy faritra boribory mivohibohitra. Efa ela ny Baiboly no niresaka azy io. Ilay ‘ravin’oliva mbola maitso teny am-bavan’ilay’ voromailala niverina tany amin’i Noa tao amin’ny sambofiara, ohatra, no nahalalany fa nihena ny rano taorian’ny Safodrano.​—Ge 8:11.

Niresaka an-kolaka ny lafiny sasany mampiavaka ny hazo oliva ny mpanao salamo. Hoy izy tamin’ireo matahotra an’i Jehovah: “Ny zanakao ho toy ny sampan’oliva manodidina ny latabatrao.” (Sl 128:1-3) Sampan’oliva notapahina no ambolena ka ahazoana hazo vaovao matetika. Mety ho ny tsimoka avy amin’ny fakan’ny hazo efa antitra koa no lasa hazo vaovao. Hanodidina an-drainy toy ireny tsimoka ireny ny zanaka, ka ho sambatra ilay fianakaviana.

Be mpitia ny menaka azo tamin’ilay hazo maitsoririnina. Anisan’ny foto-tsakafon’ny Israelita izy io, ary fanosotra tamin’ny vatana sy tarehy. Akora fandrehitra koa izy io, ary entana sarobidy. Nohosorana azy io ny ratra sy mangana mba tsy hanaintaina. (Lk 10:33, 34) Mampitony sy mamelombelona koa ny fanosorana menaka oliva amin’ny loha. Tokony hivavaka ho an’ny marary ara-panahy àry ny anti-panahin’ny fiangonana kristianina, ka “hanosotra menaka azy amin’ny anaran’i Jehovah”, izany hoe hampitony sy hanitsy ary hamelombelona azy amin’ny alalan’ny Tenin’Andriamanitra.​—Jk 5:13-15.