Zefania, Bokin’i
Boky ao amin’ny Soratra Hebreo ahitana ny teny nampilazain’i Jehovah an’i Zefania mpaminany. Naminany tamin’ny andron’i Josia mpanjakan’ny Joda (659-629 T.K.) i Zefania. (Ze 1:1) Nanao ezaka manokana hanafoanana ny fanompoan-tsampy i Josia tamin’ny taona faha-12 nanjakany, tamin’izy 20 taona teo ho eo. “Nanaraka an’i Jehovah” foana àry ny vahoaka, nanomboka tamin’ny taona faha-18 nanjakany ka mandra-pifaran’ny fitondrany. (2Ta 34:3-8, 33) Nosoratana talohan’ny fanavaozana nataon’i Josia tamin’ny 648 T.K. tany ho any ilay boky, matoa milaza fa mbola nisy mpisoron’ny andriamani-kafa tao Joda, ary nisy nivavaka tamin’i Bala sy ny zavatra eny amin’ny lanitra.—Ze 1:4, 5.
Nanjaka tao Joda ny fanompoan-tsampy sy herisetra ary fitaka, rehefa nanomboka naminany i Zefania. Maro no nilaza anakampo hoe: “Sady tsy hanao soa i Jehovah no tsy hanisy ratsy.” (Ze 1:12) Naminany anefa i Zefania fa hovalian’i Jehovah ny nataon’ireo mpanao ratsy tsy nibebaka. (1:3–2:3; 3:1-5) Tsy i Joda sy Jerosalema ihany no hiharan’ny didim-pitsarany fa i Filistia, Amona, Moaba, Etiopia, ary Asyria koa.—2:4-15.
Tena nampahery an’ireo niezaka nanompo an’i Jehovah ny faminanian’i Zefania. Ory dia ory mantsy izy ireo nahita ny zava-maharikoriko nataon’ny mponin’i Jerosalema, anisan’izany ireo andriana sy mpitsara ary mpisorona ratsy fanahy. (Ze 3:1-7) Nilazana toy izao ireo olona tso-po naniry mafy ny hampiharan’Andriamanitra ny didim-pitsarany amin’ny ratsy fanahy: “‘Miandrasa ahy’, hoy i Jehovah, ‘mandra-pahatongan’ny andro hitsanganako haka babo. Fa izao no didim-pitsarako: Hanangona firenena sy hamory fanjakana aho, mba hampiharako ny fanamelohako sy hanamparako ny fahatezerako rehetra amin’izy ireo.’” (3:8) Hitsinjo ny sisa amin’ny Israely anefa i Jehovah ka hampody azy ireo avy any an-tsesitany. Hataony izay hahatonga azy ireo hitondra fiderana sy hahazo laza tsara any amin’ny firenena rehetra.—3:10-20.
Anisan’ny Soratra Masina. Hita any amin’ny boky hafa ao amin’ny Baiboly matetika ny hevitra resahin’ny bokin’i Zefania. (Ampitahao Ze 1:3 sy Ho 4:3; Ze 1:7 sy Ha 2:20 ary Za 2:13; Ze 1:13 sy De 28:30, 39 ary Am 5:11; Ze 1:14 sy Jl 1:15; ary Ze 3:19 sy Mi 4:6, 7.) Mifanaraka tsara amin’ny fahamarinana resahin’ny Soratra Masina koa izay voalaza ao, toy ny hoe: Andriamanitra tia rariny i Jehovah (Ze 3:5; De 32:4); tsy avelany ho afa-maina ireo mpandika lalàna, na dia omeny fotoana hibebahana aza (Ze 2:1-3; Je 18:7-11; 2Pe 3:9, 10); tsy hahavonjy ny ratsy fanahy ny volafotsy sy volamena amin’ny andro fahatezeran’i Jehovah (Ze 1:18; Oh 11:4; Ezk 7:19); ary tsy maintsy mankatò ny didim-pitsaran’Andriamanitra izay olona te ho voaro.—Ze 2:3; Am 5:15.
Ekena ho anisan’ny Soratra Masina koa ny bokin’i Zefania satria tanteraka ny faminaniana ao. Rava tokoa i Ninive renivohitr’i Asyria tamin’ny 632 T.K. (Ze 2:13-15), ary rava i Joda sy Jerosalema tamin’ny 607 T.K. (Ze 1:4-18; ampit. 2Mp 25:1-10.) Nahita loza koa ny Etiopianina rehefa resin’i Nebokadnezara i Ejipta, satria niray dina tamin’ny Ejipsianina izy ireo. (Ze 2:12; ampit. Ezk 30:4, 5.) Lasa tsy nisy intsony koa ny firenena amonita sy moabita ary filistinina.—Ze 2:4-11.
[Efajoro, pejy 1226]
HEVITRA MISONGADINA: ZEFANIA
Hafatra fanamelohana an’i Joda sy Jerosalema ary firenena maro hafa; fanambarana fa honenana indray i Jerosalema
Nosoratan’i Zefania raha vao nanjaka kelikely i Josia, talohan’ireo fanavaozana nataony tamin’ny 648 T.K. tany ho any
Akaiky ny andro fitsaran’i Jehovah (1:1–2:3)
Haripak’i Jehovah tsy ho eny ambonin’ny tany ny zava-drehetra
Haringana izay rehetra nanompo sampy tao Joda sy Jerosalema, nianiana tamin’ny anaran’i Jehovah sy ny an’andriamani-diso, tsy nanompo an’i Jehovah intsony, na tsy nitady azy
Hovaliana ny nataon’ireo andriana sy ireo mahery setra ary mpamitaka; ho fongana ny harena sy fananan’ireo mihevitra fa tsy hanao soa i Jehovah sady tsy hanisy ratsy
Ho avy ny andron’i Jehovah, izay andro fahatezerana; tsy hahavonjy na ny volafotsy na ny volamena
Tokony hitady an’i Jehovah ny mpandefitra amin’ny tany ary hikatsaka fahamarinana sy fandeferana; angamba ho voafina amin’ny andro fahatezerany
Hofaizina ireo firenena manodidina an’i Joda mbamin’i Etiopia sy Asyria (2:4-15)
Horavana i Filistia; ho lao toa an’i Sodoma i Moaba, ary ho toa an’i Gomora i Amona noho izy nandatsa ny olon’i Jehovah
Ho lavon-tsabatra ny Etiopianina; ho rava i Asyria; ho rava koa i Ninive ka bibidia no honina any
Nikomy sy nanao ratsy i Jerosalema (3:1-7)
Hotsaraina koa i Jerosalema, tanàna nampahory; tsy natoky an’i Jehovah izy sady tsy nanatona azy; nanampatra fahefana mba hanaovan-dratsy ny andrianany, mpitsarany, mpaminaniny, ary mpisorony
Tsy niova sy tsy natahotra an’i Jehovah ilay vahoaka, na dia nahita ny nampiharana ny didim-pitsarany tamin’ny firenen-kafa aza
Hanampatra ny fahatezerany i Jehovah, hampody an’ireo sisa (3:8-20)
Hanampatra ny fahatezerany amin’ireo firenena sy fanjakana i Jehovah
Homena fiteny madio ny olona mba hiantso ny anarany sy hanompo azy amim-piraisan-kina
Izay manetry tena sy tsy mieboebo no ho sisa tavela amin’ny Israely ka harovan’Andriamanitra
Hofaizina izay rehetra nampahory ny Israely; hatao izay hahatonga an’ireo nampodiana “hitondra fiderana any amin’ny firenena rehetra amin’ny tany”