Toko Faha-33

‘Ho an’i Kaisara Izay an’i Kaisara’

HAKA vola taratasy iray sy vola madinika iray isika. Inona no hitanao? — Iza no nanamboatra itỳ vola madinika itỳ na itỳ vola taratasy itỳ? — Ny fitondram-panjakana.

Hatramin’ny an’arivony taona maro, dia manamboatra ny vola ampiasain’ny olona ireo fitondram-panjakana. Fony tetỳ an-tany ilay Mpampianatra Lehibe, dia ny fitondram-panjakana romana no nanamboatra ny vola. Iza no filohan’io fitondram-panjakana io? — Nantsoina hoe Kaisara izy io.

Nanao zavatra tsara be dia be ho an’ny vahoaka ny fitondram-panjakana romana. Manao zavatra tsara ho antsika ireo fitondram-panjakana, amin’izao andro izao. Manorina arabe izy ireny ary manakarama polisy sy mpamonjy trano may mba hiarovana antsika.

Mandany vola izy amin’izany. Fantatrao ve hoe amin’ny fomba ahoana no ahazoan’ny fitondram-panjakana ny vola ilaina? — Ny olona no mandrotsaka izany aminy; antsoina hoe hetra izany vola izany.

Olona maro be no tsy tia ny mandoa ny hetrany. Fony tetỳ an-tany i Jesosy, dia tsy nety nandoa ny hetrany tamin’ny fitondram-panjakana romana ny Jiosy sasany. Tsy tian’izy ireny mainty ny hetra. Indray andro, dia nisy nanontany an’ilay Mpampianatra Lehibe toy izao: ‘Tokony handoa hetra ho an’i Kaisara ve izahay sa tsia?’

Nitady izay hahasahiran-tsaina an’i Jesosy ireny olona ireny. Raha namaly izy hoe: “Eny, tokony handoa hetra  ianareo”, dia Jiosy maro be no tsy ho nankasitraka izany teny izany. Kanefa tsy afaka nilaza izy hoe: “Tsia, tsy mila ny mandoa hetra ianareo”, satria ho ratsy izany.

Izao no nataon’i Jesosy. Nilaza toy izao tamin’ireo lehilahy izy: ‘Mampisehoa vola amiko.’ Nasehon’izy ireo azy ny vola iray, ary dia nanontany azy i Jesosy hoe: ‘An’iza ny sary sy ny soratra eo aminy?’

Namaly ireo lehilahy hoe: “An’i Kaisara.”

Nanampy teny toy izao i Jesosy: “Aloavy ho an’i Kaisara ary izay an’i Kaisara, ary ho an’Andriamanitra izay an’Andriamanitra.” — Lioka 20:19-26.

Tsy valin-teny tsara dia tsara ve izany? — Tsy nisy afaka nahita hokianina tamin’izany. Raha nanao zavatra sasany ho an’ny olona i Kaisara, dia rariny ny hampiasana ny vola amboariny mba handoavana aminy ireo zavatra ireo. Nasehon’i Jesosy àry fa tsara ny handoavana ireo hetra amin’ny fitondram-panjakana noho ireo zavatra noraisina.

Mbola tsy ampy taona ianao ka mbola tsy mandoa hetra. Misy zavatra tokony haloanao amin’ny fitondram-panjakana anefa. Inona izany? — Tokony hankato ireo lalàny ianao.

Andriamanitra no milaza izany ao amin’ny Teniny toy izao: ‘Maneke ireo manam-pahefana ambony.’ Iza moa ireo ‘manam-pahefana ambony’? — Ireo olona izay manao raharaha ao amin’ny  fitondram-panjakana. Tokony hankato ireo lalàna àry isika. Izany no lazain’Andriamanitra. — Romana 13:1, 2, NW.

Ohatra, angamba misy lalàna andrarana ny fanipatsipazana taratasy na poti-javatra hafa eny amin’ny arabe. Tokony hankato ve ianao? — Eny, maniry izany Andriamanitra.

Tokony hankato ny polisy koa ve isika? — Manakarama azy ireny ny fitondram-panjakana mba hiarovana antsika. Amin’ny fankatoavana azy ireny, dia mankato ny fitondram-panjakana isika.

Raha efa hiampita arabe ianao ka milaza ny polisy iray hoe: “Andraso!”, inona no hataonao? — Raha misy olona mbola miampita arabe ihany na dia eo aza izany, hanao sahala aminy ve ianao? — Na dia ianao irery aza no tsy hanao izany, dia hiandry ianao. Milaza amintsika Andriamanitra mba hankato.

Aoka hataontsika hoe misy fikorontanana eny amin’ny arabe ka milaza aminareo ny polisy hoe: “Mijanòna any an-tranonareo; aza mivoaka.” Mandre kiakiaka angamba ianao ary manontany tena ny amin’izay mitranga. Hivoaka mba hijery ve ianao? — Raha izany no izy, hanaiky ireo ‘manam-pahefana ambony’ ve ianao? —

Any amin’ny tany maro, dia ny fitondram-panjakana no mampanorina ireo sekoly sy manakarama ireo mpampianatra. Rehefa mankato ny mpampianatra ny ankizy, dia mitondra filaminana ao an-dakilasy izany. Irin’Andriamanitra ve ny ­hankatoavanao ny mpampianatra? —

 Tsy misy mihitsy andinin-teny ao amin’ny Baiboly milaza hoe: “Mankatoava ny mpampianatra anareo.” Asehony anefa fa tokony hankato isika. Manakarama ny mpampianatra ny fitondram-panjakana mba hampianatra anareo, toy ny anakaramany ny polisy mba hiaro ny olona. Ny fankatoavana ny polisy sy ny mpampianatra dia fankatoavana ny fitondram-panjakana.

Azontsika atao koa ny mijery ilay raharaha amin’ny lafiny hafa iray. Milaza amin’ny zanaka Andriamanitra mba ‘hanaiky ny rainy sy ny reniny’. Mandefa anao any an-tsekoly ireo mba hampianaran’ny mpampianatra anao. Tokony hankato ny mpampianatra àry ianao, toy ny ankatoavanao ny ray aman-dreninao atỳ an-trano. — Efesiana 6:⁠1.

Tsy miaraka aminao foana aho. Tsy afaka mahita anao àry aho raha mankato ny mpampianatra anao ianao. Mahita izany anefa Andriamanitra, ary tiantsika ny hanao izay hahafaly azy, sa tsy izany? — Tsy hitako koa raha mankato ireo polisy ianao. Iza anefa no mahita izany? — Andriamanitra. Aza hadinoina àry izy.

Tadidio koa fa mitana ny toerana voalohany eo amin’ny fiainantsika Andriamanitra. Mankato ny fitondram-panjakana isika satria irin’Andriamanitra izany. Kanefa, raha milaza amintsika ny fitondram-panjakana mba hanao izay andraran’Andriamanitra antsika? — Raha misy milaza amintsika hoe: “Aza mankato an’Andriamanitra”, moa ve irin’Andriamanitra ny hihainoantsika an’io olona io? —

Nitranga tamin’ireo apostolin’i Jesosy izany. Inona no hataon’izy ireo? Inona no ho nataonao? — Namaly toy izao izy ireo: “Andriamanitra no tokony hekena mihoatra noho ny olona.” — Asan’ny Apostoly 5:⁠29.

(Milaza amintsika ny Baiboly mba hanaja ny lalàna. Hovakintsika ny Titosy 3:⁠1; Matio 5:41; 1 Petera 2:12-14.)