Efa nitory i Jaona hoe: ‘Hisy olona lehibe noho izaho ho avy.’ Rehefa 30 taona teo ho eo i Jesosy, dia niala tany Galilia izy ary nankany amin’ny Reniranon’i Jordana. Tany mantsy i Jaona no nanao batisa olona. Nasain’i Jesosy hanao batisa azy koa i Jaona. Hoy anefa izy: ‘An an an! Ianao aza no tokony hanao batisa an’ahy.’ Dia hoy i Jesosy: ‘Ataovy moa fa izany no tian’i Jehovah e!’ Nidina tao amin’ny Reniranon’i Jordana àry ry zareo, ka nalentik’i Jaona tao anaty rano i Jesosy.

Nivoaka avy tao anaty rano i Jesosy avy eo ary nivavaka. Nisokatra ny lanitra tamin’izay ka nidina teo aminy ny fanahin’Andriamanitra. Hoatran’ny voromailala ilay izy. Dia niteny avy tany an-danitra i Jehovah hoe: “Ianao no Zanako malalako, ianao no sitrako.”

Lasa Kristy, na Mesia, i Jesosy rehefa nahazo ny fanahin’i Jehovah. Hanao ny asa nanirahan’i Jehovah azy tetỳ an-tany amin’izay izy izao.

Vao vita batisa i Jesosy, dia nankany amin’ny tany karakaina ary nijanona tany 40 andro. Nankany amin’i Jaona izy rehefa niverina. Dia hoy i Jaona rehefa nanatona i Jesosy: ‘Iny ny Zanak’ondrin’Andriamanitra. Izy no hanala ny fahotan’izao tontolo izao.’ Niteny an’izany i Jaona satria tiany ho fantatry ny olona hoe i Jesosy no Mesia. Inona no nitranga tamin’i Jesosy tamin’izy tany amin’ny tany karakaina? Andao hojerentsika izany.