NAHOANA IZANY NO TENA ILAINA? Manasa ny karazan’olona rehetra “hisotro maimaim-poana amin’ny ranon’aina” ny voahosotra sy ny ondry hafa. (Ap 22:17) Ilay rano dia ny fandaharana ataon’i Jehovah mba hanafahana ny olona amin’ny ota sy ny fahafatesana. Mila ataontsika mifanaraka amin’izay ilain’ny olona tsirairay ny fomba itoriantsika ny “vaovao tsara mandrakizay.” Ho afaka hanampy ny karazan’olona rehetra isika amin’izay, na inona na inona fivavahany na kolontsainy.—Ap 14:6.

AHOANA NO HANAOVANA AZY?

• Mifidiana foto-kevitra sy andinin-teny manohina ny fon’ny olona ao amin’ny faritaninareo. Afaka mampiasa an’ireo hevitra azo resahina ao amin’ny Tari-dalana ho An’ny Fivoriana ianao. Mety koa anefa izay fomba fitory hafa hitanao hoe mandaitra. Inona ny foto-kevitra sy andinin-teny mahaliana ny olona? Inona ny vaovao tena resahin’ny olona? Inona no mahaliana ny lehilahy na mahaliana ny vehivavy?

• Raha misy fomba fiarahabana na zavatra hafa fanaon’ny olona eo amin’ny toerana misy anareo, dia ampiasao izany.—2Ko 6:3, 4

• Fantaro tsara ireo boky sy gazety ary video ao amin’ny Fitaovana Fampianarana. Ho afaka hampiasa azy ireny ianao amin’izay, rehefa misy olona liana

• Mety hisy olona mampiasa fiteny hafa ao amin’ny faritaninareo. Makà lahatsoratra na boky na video amin’ny fitenin’izy ireny

• Ataovy mifanaraka amin’izay ilain’ilay olona itoriana ny zavatra resahinao. (1Ko 9:19-23) Ahoana, ohatra, raha fantatrao hoe vao haingana no maty ny olona akaiky azy?

ALEFASO ILAY VIDEO, ARY VALIO IRETO:

• Inona ny foto-kevitra noresahin’ilay mpitory, tamin’ny voalohany?

• Inona ny zavatra nitranga tamin’ilay olona itoriana?

• Iza tamin’ireo andinin-teny no tena mety? Nahoana?

• Inona no ataonao mba hifanaraka amin’izay ilain’ny olona ao amin’ny faritaninareo ny fomba fitory ampiasainao?