Manana video efatra miresaka momba ny fianarana Baiboly isika, ary natao hampiasaina eny amin’ny fanompoana izy ireny. Inona no tanjon’ny video tsirairay?

• Nahoana Ianao no Tokony Hianatra Baiboly?​—Video Manontolo: Natao hanampiana ny olona ho liana amin’ny Baiboly io video io, na inona na inona fivavahany. Mandrisika azy hitady ny valin’ny fanontaniany ao amin’ny Baiboly koa izy io sady miresaka valim-panontaniana iray mitombina tsara. Hazavaina ao koa hoe ahoana no atao raha misy te hangataka hianatra Baiboly.

• Nahoana Ianao no Tokony Hianatra Baiboly? (video fohy kokoa): Mitovy amin’ilay video manontolo io video io, saingy iray minitra eo ho eo fotsiny ny faharetany. Mety tsara izy io raha tsy afaka miresaka ela be ny olona ao amin’ny faritany.

• Ahoana no Atao Rehefa Mianatra Baiboly?: Mandrisika ny olona ho liana amin’ny fampianarana Baiboly maimaim-poana ataontsika io video io. Mamaly ny fanontaniana fametraky ny olona momba an’izany koa izy io, anisan’izany ny hoe ahoana no atao raha te hianatra Baiboly ianao.

• Faly Hiara-mianatra Baiboly Aminao Izahay: Tokony haseho ny mpianatra Baiboly io video io. Na dia any amin’ny pejy 2 amin’ilay boky Ankafizo Mandrakizay ny Fiainana! aza no misy azy io, dia azonao aseho ny olona mianatra amin’ilay bokikely Ankafizo Mandrakizay ny Fiainana! ilay izy. Resahin’ilay video hoe inona avy no hita ao amin’ilay boky, ary hanao ahoana ny ho fizotran’ny fianarana.

Marina hoe misy tanjona tiana hotratrarina amin’ny video tsirairay. Azonao aseho na alefa any amin’olona foana anefa izy ireny, rehefa hitanao hoe ilaina ny hanaovana an’izany. Ampirisihina ny mpitory mba hiezaka hahafantatra tsara an’ireo video ireo, sy hampiasa tsara azy ireny eny amin’ny fanompoana.