Hanao Tokantranomaso ve vao Hivady?

“FAHITA any amin’ny tany mandroso”, ny lehilahy sy vehivavy tsy vita soratra ara-dalàna nefa miara-mipetraka, hoy ny Gazety Momba ny Fanambadiana sy Fianakaviana (anglisy). Hoy koa izy io: ‘Efa ho ny antsasak’ireo manao tokantranomaso, no mihevitra izany ho fomba amantarana raha mifanara-toetra tsara izy ireo na tsia.’ Raha marina izany hoy ilay Gazety dia “tsy tokony hisy tsy fifanarahana sy hateza kokoa ny fanambadiany any aoriana.”

“Mifanohitra amin’izany anefa ny zava-misy”, hoy ihany ilay Gazety. “Hita fa tsy sambatra loatra ireo nanao tokantranomaso vao nivady. Tsy miara-manao zavatra firy izy ireo, mifamaly matetika, tsy dia mifanohana, tsy mahavaha olana loatra, [ary] be zava-manahirana ... Ankoatra izany, dia ahina kokoa hisara-panambadiana ireo nanao tokantranomaso raha ampitahaina amin’ireo tonga dia nivady ara-dalàna.”

Mampiseho izany fa tena tsy fahendrena mihitsy ny mitoky amin’izay heverin’ny olona fa mety. Manamafy izay voalaza ao amin’ny Jeremia 10:23 izany, manao hoe: “Tsy an’ny olombelona ... ny hahalavorary ny diany.” Fahendrena kokoa àry ny miantehitra amin’ny Tenin’Andriamanitra, satria misy torohevitra tena tsara momba ny fanambadiana ao! (2 Timoty 3:16) Ilazan’ny Baiboly toy izao ohatra ny mpivady: “Ny lehilahy dia handao ny rainy sy ny reniny ka hikambana amin’ny vadiny; ary dia ho nofo iray ihany ireo.”—Genesisy 2:24; Matio 19:5.

Antenaina ho sambatra sy haharitra kokoa àry ny fanambadian’ireo mankatò ny tari-dalan’Andriamanitra, fa tsy toy ny an’ireo manaraka ny hevi-dison’olombelona, izay miovaova matetika.—Ohabolana 3:5, 6.