Mipetraka any amin’ny tany be mpiasa avy any Philippines i Mary sy John vadiny. Mahafinaritra an-dry zareo ny mitory ny vaovao tsara amin’ireny vahiny ireny. Nanomboka fampianarana Baiboly be dia be i Mary nandritra ny COVID-19. Tsy olona avy ao amin’ny taniny ihany no nampianariny fa olona any an-tany hafa koa. Ahoana no nataony?

Anontanian’i Mary foana ny olona ampianariny hoe: “Ianao sao dia mahalala olon-kafa te hianatra Baiboly?” Raha mahafantatra ry zareo dia manontany i Mary hoe: “Sao dia mba azonao ampifankahalalana amiko ry zareo?” Misy vokany tsara matetika ny fanontaniana tsotra hoatr’izany. Rehefa tian’ny olona mantsy ny zavatra ianarany ao amin’ny Tenin’Andriamanitra dia tiany hozaraina amin’ny fianakaviany sy ny namany izany. Inona izao no vokatr’ilay fanontanian’i Mary?

Nianatra Baiboly tamin’i Mary i Jasmin. Nisy olona efatra te hianatra Baiboly avy eo nampahafantarin’i Jasmin an’i Mary. Anisan’izany i Kristine. Tena tiany be mihitsy ilay fianarana, dia nangataka ny hianatra indroa isan-kerinandro izy. Nanontanian’i Mary izy hoe sao dia mahalala olon-kafa te hianatra Baiboly. Hoy i Kristine: “Ie, misy mihitsy any. Andraso fa ampifankahalalako aminao ry zareo.” Efatra ny namany nampifankahalalany tamin’i Mary tao anatin’ny herinandro vitsivitsy. Mbola nisy namany hafa koa nampifankahalalany tamin’i Mary dia ireo namany ireo indray nitarika namana hafa.

Tian’i Kristine hianatra Baiboly koa ny fianakaviany any Philippines. Niresaka tamin’i Andrea zanany vavy àry izy. Nieritreritra i Andrea tamin’ny voalohany hoe sekta ny Vavolombelon’i Jehovah sady tsy mino an’i Jesosy, ary ny Testamenta Taloha ihany no ampiasainy. Vao indray mandeha nianatra fotsiny anefa i Andrea dia tonga saina hoe diso daholo ny zavatra noeritreretiny. Isaky ny nianatra zava-baovao izy dia izao no lazainy: “Raha izay no resahin’ny Baiboly dia izay izany no marina!”

Rehefa nandeha ny fotoana, dia nampifankahalalan’i Andrea tamin’i Mary ny namany roa sy ny mpiara-miasa taminy iray. Nianatra Baiboly koa ry zareo. Tsy fantatr’i Mary hoe rehefa nianatra izy sy Andrea dia nihaino tao koa i Angela. Nenitoan’i Andrea izy ary jamba. Te hampifankahalalana tamin’i Mary i Angela, tatỳ aoriana, ary nangataka ny hampianarina mitokana. Tiany be ilay fianarana. Nahatadidy andinin-teny be dia be izy tao anatin’ny iray volana dia nangataka hianatra inefatra isan-kerinandro! Nanomboka nivory tsy tapaka tamin’ny alalan’ny vidéoconférence izy ary i Andrea no nanampy azy.

Rehefa fantatr’i Mary hoe nihainohaino tao ambadika tao i Joshua vadin’i Kristine rehefa nianatra  ry zareo, dia nanontaniany izy raha te hianatra koa. Namaly i Joshua hoe: “Mihaino fotsiny aho a! Raha vao ametrahanareo fanontaniana aho dia handeha.” Tao anatin’ny dimy minitra fotsiny anefa, dia izy indray no be fanontaniana raha oharina amin’i Kristine, ary tiany hitohy ilay fianarana.

Betsaka ny olona lasa nianatra Baiboly vokatr’ilay fanontaniana tsotra napetrak’i Mary. Be dia be amin’ireny olona ireny no nafindrany tamin’ny Vavolombelona hafa. Raha atambatra dia 28 ny olona nanomboka nianatra Baiboly tamin’i Mary tany amin’ny firenena efatra.

Natao batisa tamin’ny Aprily 2021 i Jasmin, ilay mpianatra voalohany noresahintsika tato. I Kristine indray natao batisa tamin’ny Mey 2022 dia nody any Philippines any amin’ny fianakaviany. Nisy mpianatra roa nampifankahalalan’i Kristine tamin’i Mary koa efa vita batisa. Natao batisa i Angela, volana vitsivitsy taorian’ny nanaovana batisa an’i Kristine, ary mpisava lalana maharitra izy izao. Mandroso tsara koa i Joshua vadin’i Kristine sy Andrea zanak’izy mivady ary ny mpianatra Baiboly hafa.

Niely haingana be ny vaovao tsara tamin’ny taonjato voalohany, satria niresaka tamin’ny havany sy ny namany ny olona nitoriana. (Jaona 1:41, 42a; Asa. 10:24, 27, 48; 16:25-33) Maninona raha anontaniana ny olona ampianarinao Baiboly sy ny olon-kafa liana hoe: “Sao dia misy olona te hianatra koa any?” Tsy ampoizinao mihitsy fa mety ho be dia be ny olona hanomboka hianatra vokatr’izany fanontaniana tsotra apetrakao izany.