Fanontanian’ny Mpamaky
Inona ilay “azy ireo” amin’ilay hoe “hiambina azy ireo ianao”, ao amin’ny Salamo 12:7? “Ny olona mijaly” (andininy 5) sa “ny tenin’i Jehovah” (andininy 6)?
Hita amin’ny teny manodidina fa olona no tian’io andininy io horesahina.
Milaza ny Salamo 12:1-4 fa “tsy ahitana olona mendri-pitokisana intsony eo amin’ny olombelona.” Andao hodinihintsika àry ny Salamo 12:5-7, izany hoe ireo andininy nampipoitra an’ilay fanontaniana eto.
“‘Satria ampahorina ny olona mijaly
Ary misento ny mahantra,
Dia hitsangana aho ka hanao zavatra’, hoy i Jehovah.
‘Hovonjeko izy ireo mba tsy ho azon’izay manao tsinontsinona azy.’
Madio ny tenin’i Jehovah;
Toy ny volafotsy voadio tao amin’ny fatana tanimanga izany, eny, voadio impito.
Hiambina azy ireo ianao, Jehovah ô!
Hiaro azy tsirairay mandrakizay tsy ho azon’ity taranaka ity ianao.”
Miresaka an’izay hataon’Andriamanitra ho an’ny “olona mijaly” ny andininy faha-5. Hamonjy azy ireo izy.
Milaza indray ny andininy faha-6 hoe “madio ny tenin’i Jehovah; toy ny volafotsy voadio.” Tena miaiky an’izany ny Kristianina mahafoy tena.—Sal. 18:30; 119:140.
Diniho ny andininy manaraka. Hoy ny Salamo 12:7: “Hiambina azy ireo ianao, Jehovah ô! Hiaro azy tsirairay mandrakizay tsy ho azon’ity taranaka ity ianao.” Inona ilay hoe “azy ireo” eto?
Manarakaraka an’ilay andininy miresaka momba ny “tenin’i Jehovah” ny andininy faha-7. Misy mieritreritra àry fa ny tenin’Andriamanitra ilay hoe “azy ireo.” Fantatsika fa niambina na niaro ny Baiboly Andriamanitra, na dia imbetsaka aza ny mpanohitra no niezaka nandrara sy namotika azy io.—Isaia 40:8; 1 Pet. 1:25.
Marina koa anefa ilay resahin’ny andininy faha-5. Manampy sy mamonjy ny olona “mijaly” sy ‘ampahorina’ i Jehovah, ary mbola hanao an’izany.—Joba 36:15; Sal. 6:4; 31:1, 2; 54:7; 145:20.
Inona àry izany ilay “azy ireo” eo amin’ny andininy faha-7?
Rehefa dinihina io salamo io, dia olona ilay hoe “azy ireo.”
Resahin’ny Salamo 12:1 fa nisy nandainga tamin’ireo “olona mendri-pitokisana.” Voalaza avy eo fa hanafay an’izay tsy mampiasa tsara ny lelany i Jehovah. Manome toky antsika io salamo io fa hamonjy ny vahoakany izy, satria madio ny teniny.
Resahin’ny andininy faha-7 àry fa i Jehovah dia hiambina sy hiaro “azy ireo”, izany hoe ireo olona mijaly noho ny ataon’ny ratsy fanahy.
Mifanaraka amin’ny soratra hebreo nataon’ny Masoreta ny nandikana an’ilay hoe “azy ireo.” Mampiasa “antsika” indroa ny andininy faha-7 ao amin’ny Fandikan-teny Grikan’ny Fitopolo. Ny olona mendri-pitokisana mijaly sy nampahorina voaresaka etsy aloha no tiana holazaina amin’izany. Ary farany, dia milaza ny andininy faha-7 fa voaro “tsy ho azon’ity taranaka ity”, izany hoe ireo mampirisika ny olona ho ratsy fitondran-tena, ny “tsirairay” amin’ireo olona mendri-pitokisana. (Sal. 12:7, 8) Hoy ny andininy faha-7 ao amin’ny Targoma Aramianina: “Hiaro ny olo-marina ianao TOMPO O! Hiambina azy ireo mandrakizay tsy ho azon’ity taranaka ratsy fanahy ity ianao. Mivezivezy etsy sy eroa ny ratsy fanahy, hoatran’ny dinta mitsentsitra ny ran’ny zanak’olombelona.” Manaporofo koa io hoe tsy miresaka ny tenin’Andriamanitra ny Salamo 12:7.
Manome fanantenana ho an’ny “olona mendri-pitokisana” àry io andininy io hoe hanao zavatra Andriamanitra.
