Be dia be ny olona tsy ampy sakafo sy tsy manan-kialofana eran-tany. Ny hafa indray mety hoe fanantenana fotsiny no ilainy. Hotahin’Andriamanitra isika raha manampy olona hoatr’izany.

“Izay miantra ny mahantra dia mampisambotra an’i Jehovah, ary Izy no hanonitra an’izay nafoin’ilay olona.”​—OHABOLANA 19:17.

Nolazain’i Jesosy tao amin’ny fanoharana iray hoe nisy lehilahy notafihin’ny jiolahy ary tena naratra mafy. (Lioka 10:29-37) Nikarakara azy ny lehilahy iray tsy fantany rehefa nahita azy. Nanao an’izany izy na dia tsy nitovy firazanana aza izy ireo.

Tsy vitan’ny hoe nitsabo azy sy nanome azy an’izay nilainy ilay lehilahy tsara fanahy, fa nanao zavatra koa izy mba hanamaivanana ny fahoriany.

Inona no ianarantsika avy amin’io fanoharana io? Tian’i Jesosy raha manao izay azontsika atao isika mba hanampiana an’ireo sahirana. (Ohabolana 14:31) Mampianatra antsika ny Soratra Masina fa tsy ho ela Andriamanitra dia hanafoana ny fahantrana sy ny fijaliana. Mety ho lasa saina anefa isika hoe rahoviana izy no hanao an’izany ary amin’ny fomba ahoana? Hanazava an’izany ny lahatsoratra manaraka.