1. 1. SATANA DEVOLY. Ilay anjely mpikomy antsoina hoe Satana no tena mahatonga an’izao fankahalana hitantsika izao. Horinganin’Andriamanitra i Satana sy izay rehetra mankahala ny hafa hoatr’azy.​—Salamo 37:38; Romanina 16:20.

2. 2. TONTOLO RATSIN’I SATANA. Hofongoran’Andriamanitra ny ratsy rehetra, anisan’izany ny mpanao politika fetsifetsy sy ny mpitondra fivavahana mampirisika ny olona hifankahala. Hofongorany koa ny tontolo ara-barotra, ka tsy hisy intsony ny kolikoly sy ny fanararaotana olona.​—2 Petera 3:13.

3. 3. NY TSY FAHALAVORARIANA. Hazavain’ny Baiboly hoe nandova ota ny olombelona rehetra, ka mora mieritreritra zavatra ratsy sy manana fihetseham-po ratsy ary mora manao ratsy. (Romanina 5:12) Anisan’izany ny hoe mitana lolompo sy mankahala ny hafa. Hanampy ny olona handresy an’izany rehetra izany Andriamanitra, ka tsy hisy intsony mandrakizay ny fankahalana.​—Isaia 54:13.

1. 1. TSY HISY INTSONY NY TSY RARINY. Ny Fanjakan’Andriamanitra no hitondra ny tany manontolo. Avy any an-danitra izy io no hitondra, ary hampanjaka ny rariny mandrakizay. (Daniela 2:44) Tsy hisy olona hitsara an-tendrony na hanavakavaka intsony amin’izay. Hanitsy ny tsy rariny rehetra zakain’ny olona amin’izao Andriamanitra.​—Lioka 18:7.

2. 2. HIADANA NY OLONA REHETRA. Tsy hisy intsony ny olona hijaly noho ny ady na herisetra. (Salamo 46:9) Ny olona tia fihavanana sisa no hiaina eto an-tany, ka tsy hisy hampanahy azy ireo.​—Salamo 72:7.

3. 3. HIAINA MANDRAKIZAY NY OLONA SADY HO TSARA BE NY FIAINANA. Ho tia ny mpiara-belona aminy ny olona rehetra eto an-tany. (Matio 22:39) Tsy hisy hampijaly ny olona intsony, na dia fahatsiarovana ny zava-dratsy nitranga tamin’ny lasa aza. (Isaia 65:17) Tsy hisy intsony ny fankahalana, ka “ho faly be mihitsy” ny olombelona rehetra, “satria tena hiadana.”​—Salamo 37:11.

Tsy andrinao ve ny hiaina an’izany? Na amin’izao aza, dia be dia be ny olona mianatra tsy hankahala ny hafa intsony rehefa mampihatra ny toro lalan’ny Baiboly. (Salamo 37:8) Manao an’izany ny Vavolombelon’i Jehovah an-tapitrisany maneran-tany. Avy amin’ny kolontsaina sy fiaviana samy hafa izy ireo, nefa hoatran’ny fianakaviana mifankatia sady miray saina.​—Isaia 2:2-4.

Ho faly ny Vavolombelon’i Jehovah hanazava aminao hoe ahoana no hiatrehana ny tsy rariny sy ny fanavakavahana. Hanampy anao tsikelikely izany mba tsy hankahala olona intsony fa ho be fitiavana. Ho hitanao hoe ahoana no hatao mba ho tsara fanahy amin’ny olona rehetra, na dia amin’izay tsy mahay mankasitraka na mankahala anao aza. Vokatr’izany, dia ho faly kokoa ianao dieny izao ary hihatsara ny fifandraisanao amin’ny hafa. Misy zava-dehibe noho izany anefa. Hianaranao hoe inona no tokony hataonao mba hiaina eto an-tany ianao rehefa mitondra ny Fanjakan’Andriamanitra, ka tsy hisy intsony mandrakizay ny fankahalana.​—Salamo 37:29.