Mampiasa ny Anaran’Andriamanitra ny Atsy Afrika Afovoany

MINO an’Andriamanitra ny ankamaroan’ny olona atsy Afrika Afovoany. Eken’izy ireo fa Andriamanitra no Mpamorona ny zava-drehetra. (Apokalypsy 4:11) Toy ny olona maro any an-toeran-kafa anefa, dia matetika izy ireo no tsy miraharaha ilay anarana manokan’Andriamanitra hoe Jehovah.

Toy ny olona rehetra maneran-tany, ny olona atsy Afrika Afovoany dia mieritreritra ny anaran’Andriamanitra rehefa manao ilay vavaka nampianarin’ny Tompo hoe “hohamasinina anie ny anaranao.” (Matio 6:9) Tsy dia fantatr’olona firy izany anarana izany hatramin’izay. Rehefa nitory tamin-jotom-po anefa ny Vavolombelon’i Jehovah nandritra ny taona maro, dia niova ny fihetsiky ny olona ny amin’ny fampiasana an’io anarana io. Fantatry ny olona maro atsy Afrika, sady ampiasaina amin’ny fiteny afrikanina maro izao ny anaran’Andriamanitra. Mampiasa azy io, ohatra, ny fiteny zoloa (uJehova), yorobà (Jehofah), xhosa (uYehova), ary ny fiteny swahili (Yehova). Mbola tsy mety mampiasa an’io anarana io anefa ny ankamaroan’ny fandikan-tenin’ny Baiboly amin’ireo fiteny ireo.

Anisan’ny fandikan-teny tsara mampiasa ny anaran’Andriamanitra ny Baiboly amin’ny fiteny zande. Io no fiteny ampiasaina any amin’ny République centrafricaine, any Soudan, ary any amin’ny Repoblika Demokratikan’i Congo. Mampiasa ny anaran’Andriamanitra ny olona any amin’iny faritra iny, ary manonona azy io hoe Yekova, amin’ny fitenin-drazany. Zava-dehibe ny ampiasana ny anaran’Andriamanitra, na ahoana na ahoana endrika isehoany amin’ny fiteny eo an-toerana. Nahoana? Satria “izay rehetra miantso ny anaran’ny Tompo no hovonjena.”​—Romana 10:13.

[Sarintany/​Sary, pejy 32]

(Jereo ny gazety)

SOUDAN

RÉPUBLIQUE CENTRAFRICAINE

REPOBLIKA DEMOKRATIKAN’I CONGO

[Sary nahazoan-dalana]

The Complete Encyclopedia of Illustration/J. G. Heck