Miorena Amin’ny Fomba Feno sy Amim-piekena Mafy

Mankasitraka ny Fandikan-tenin’ny Tontolo Vaovao ny Olona An-tapitrisany Maro

NAHARITRA 12 taona sy 3 volana ary 11 andro ilay asa, ary notandremana fatratra. Vita tamin’ny 13 Marsa 1960 anefa ny tapany farany tamin’ilay fandikan-tenin’ny Baiboly vaovao. Nantsoina hoe Ny Soratra Masina​—Fandikan-tenin’ny Tontolo Vaovao izy io.

Herintaona taorian’izay, dia navoakan’ny Vavolombelon’i Jehovah ilay fandikan-teny manontolo. Iray tapitrisa no natao pirinty tamin’io Baiboly nivoaka tamin’ny 1961 io. Efa maherin’ny zato tapitrisa ny natonta tamin’izy io ankehitriny, hany ka ny Fandikan-tenin’ny Tontolo Vaovao no anisan’ny Baiboly miely indrindra. Inona anefa no nahatonga ny Vavolombelona hanao io fandikan-teny io?

Nahoana no nilaina ny fandikan-teny vaovao?

Nandritra ireo taona maro lasa, dia nampiasa Baiboly anglisy maro samy hafa ny Vavolombelon’i Jehovah mba hahatakarana sy hitoriana ny hafatra ao amin’ny Soratra Masina. Misy mahatsara azy ireny dikan-teny ireny, nefa matetika no manan-kery aminy ny lovantsofina ara-pivavahana sy ny fampianaran’ny Kristianisma Anarana. (Matio 15:6) Hitan’ny Vavolombelon’i Jehovah àry fa nilaina ny namoaka fandikan-teny mifanaraka tsara amin’ilay soratra ara-tsindrimandry tany am-boalohany.

Tamin’ny Oktobra 1946 no natao ny dingana voalohany tamin’izany: Nanipy hevitra ny amin’ny hanaovana fandikan-tenin’ny Baiboly vaovao i Nathan Knorr, mpikambana tao amin’ny Filan-kevi-pitantanan’ny Vavolombelon’i Jehovah. Nanomboka nanomana an’ilay fandikan-teny ny Komitin’ny Fandikana ny Baibolin’ny Tontolo Vaovao, tamin’ny 2 Desambra 1947. Natao mifanaraka amin’ilay Soratra Masina tany am-boalohany izy io. Nampidirina tamin’io fandikan-teny io ireo hevitra tao amin’ireo Baiboly sora-tanana hita vao haingana. Natao mora azon’ny olona ankehitriny koa izy io.

Niharihary fa tratran’ny mpandika teny ny tanjony, rehefa navoaka ny tapany voalohany tamin’ny Soratra Grika Kristianina​—Fandikan-tenin’ny Tontolo Vaovao tamin’ny 1950. Nanjary nazava be ireo andinin-teny tsy dia azo teo aloha. Mariho, ohatra, ilay andinin-teny mahavery hevitra ao amin’ny Matio 5:3 hoe: “Sambatra ny malahelo am-panahy.” (Dikan-tenin’ny Mpanjaka Jacques, toy ny Baiboly malagasy). Nadika toy izao izy io: “Sambatra ireo mahatsapa izay ilainy ara-panahy.” Ilay fananaran’i Paoly hoe “aza miraharaha na inona na inona” (Dikan-tenin’ny Mpanjaka Jacques) dia nadika hoe “Aza manahy na inona na inona.” (Toy ny Baiboly malagasy)​—Filipiana 4:6.

Niaiky volana ny manam-pahaizana maromaro. Nanamarika, ohatra, i Alexander Thomson, manam-pahaizana anglisy momba ny Baiboly, fa miavaka ny Fandikan-tenin’ny Tontolo Vaovao, satria miseho tsara ao aminy ny filazam-potoana mitohy, amin’ny teny grika.  Izao, ohatra, no vakintsika ao amin’ny Efesiana 5:25: “Hianareo lehilahy, tiavo hatrany ny vadinareo” fa tsy milaza fotsiny hoe: “Hianareo lehilahy, tiava ny vadinareo.” (Dikan-tenin’ny Mpanjaka Jacques, toy ny Baiboly malagasy) Hoy i Thomson momba io Baiboly io: “Toa ao amin’izy io ihany no miseho tsara ny filazam-potoana mitohy, hita ao amin’ny teny grika.”

Miavaka koa ny Fandikan-tenin’ny Tontolo Vaovao, satria ampiasainy ao amin’ny Soratra Hebreo sy Grika ny anaran’Andriamanitra hoe Jehovah. Ilay anaran’Andriamanitra amin’ny teny Hebreo dia miseho efa ho im-7 000 ao amin’ilay antsoina hoe Testamenta Taloha fotsiny. Mazava àry fa tian’ilay Mpamorona hampiasa ny anarany sy hahafantatra ny toetrany ny mpivavaka aminy. (Eksodosy 34:6, 7) Nanampy olona an-tapitrisany maro hanao izany ny Fandikan-tenin’ny Tontolo Vaovao.

Avoaka amin’ny fiteny maro ny Fandikan-tenin’ny Tontolo Vaovao

Hatramin’ny nivoahan’izy io tamin’ny teny anglisy, dia naniry hahazo azy io tamin’ny fiteniny ny Vavolombelon’i Jehovah maneran-tany. Manana antony tsara izy ireo amin’izany. Sahirana ny olona tany amin’ny tany sasany vao nahazo Baiboly amin’ny fiteniny. Tsy faly mantsy ireo solontenan’ny Fikambanana Mpampiely Baiboly, satria lasan’ny Vavolombelon’i Jehovah avokoa ny tahiriny. Matetika koa no manafina fampianarana lehibe sasany ireny Baiboly ireny. Misy andinin-teny iray, ohatra, miresaka momba ny anaran’Andriamanitra. Tsy mamoaka izany anefa ny Baiboly iray any Eoropa Atsimo. Novany mantsy ilay tenin’i Jesosy hoe “Hohamasinina anie ny anaranao” ka nataony hoe “Hohajain’ny olona anie ianao.”​—Matio 6:9.

Tamin’ny 1961 dia efa natomboka nadika tamin’ny fiteny hafa ny Fandikan-tenin’ny Tontolo Vaovao tamin’ny teny anglisy. Roa taona monja tatỳ aoriana, dia vita tamin’ny fiteny enina fanampiny Ny Soratra Grika Kristianina​—Fandikan-tenin’ny Tontolo Vaovao. Afaka namaky io Baiboly io tamin’ny fiteniny ny telo ampahefatry ny Vavolombelona naneran-tany, tamin’izany fotoana izany. Betsaka anefa ny asa mbola tsy maintsy nataon’ny Vavolombelon’i Jehovah, mba hahazoan’ny olona an-tapitrisany maro io Baiboly io.

Azo inoana kokoa fa ho tratra io tanjona io, rehefa naorina tany amin’ny foibe maneran-tanin’ny Vavolombelon’i Jehovah ny Sampan’asan’ny Fandikan-teny, tamin’ny 1989. Nisy fomba fandikan-teny nataon’io sampan-draharaha io, ka nampiarahiny tamin’izany ny fandinihana ny teny ao amin’ny Baiboly sy ny teknika samy hafa amin’ny ordinatera. Io fomba fiasa io no nahafahana nandika ny Soratra Grika Kristianina tamin’ny fiteny hafa tao anatin’ny herintaona, ary ny Soratra Hebreo, tao anatin’ny roa taona. Ela kokoa ny fandikana Baiboly raha ny fomba mahazatra no ampiasaina. Hatramin’ny nanarahana io fomba fiasa io, dia nadika tamin’ny fiteny 29, ampiasain’ny olona roa arivo tapitrisa mahery, ny Fandikan-tenin’ny Tontolo Vaovao. Adika amin’ny fiteny 12 fanampiny izy io ankehitriny. Hatramin’izao, dia voadika amin’ny fiteny 41 io Baiboly io, na izy manontolo izany na ny ampahany.

Maherin’ny 50 taona izay no lasa hatramin’ny nivoahan’ny tapany voalohany tamin’ny Fandikan-tenin’ny Tontolo Vaovao. Izany dia nandritra ny Fivoriamben’ny Vavolombelon’i Jehovah Fitomboan’ilay Fanjakana, tany New York, tamin’ny 3 Aogositra 1950. Hoy i Nathan Knorr tamin’ny mpanatrika tamin’izay: “Raiso ity fandikan-teny ity, ka vakio hatramin’ny farany. Hankafy izany ianareo. Ianaro izy  io, fa hazava kokoa aminareo ny Tenin’Andriamanitra. Omeo ny hafa koa izy io.” Mampirisika anareo hamaky ny Baiboly isan’andro izahay, satria hanampy anareo izy io hiorina amin’ny fomba feno sy amim-piekena mafy raha ny amin’ny sitrapon’Andriamanitra rehetra.​—Kolosiana 4:12.

[Tabilao/Sary, pejy 8, 9]

(Jereo ny gazety)

“Ny Namoahana ny Fandikan-tenin’ny Tontolo Vaovao”

Navoaka tamin’ny teny anglisy ny Fandikan-tenin’ny Tontolo Vaovao tamin’ny voalohany, ary misy amin’ny fiteny 41 izy io izao, na izy manontolo, na ampahany

Soratra Grika Kristianina Baiboly Iray Manontolo

1950 1

1960-1969 6 5

1970-1979 4 2

1980-1989 2 2

1990-Hatramin’izao 29 19