Mahafinaritra sa Mahasorena ny Miasa?
Mahafinaritra sa Mahasorena ny Miasa?
“Tsy misy mahasoa ny olona mihoatra noho ... ny mampahafinaritra ny tenany amin’ny fisasarany.”—Mpitoriteny 2:24.
“VIZANA be rehefa hariva ny andro.” Izany matetika no tsapan’ny mpiasa 1 ao anatin’ny 3, araka ny fanadihadiana natao vao haingana. Tsy mahagaga izany satria maro no miady saina any am-piasana. Miasa ela kokoa izy ireo, be kokoa ny asa entiny mody, ary mahalana vao mankasitraka ny ataony ny mpampiasa azy.
Mihamaro ankehitriny ny orinasa mamokatra zavatra be dia be indray miaraka. Betsaka àry ny olona miasa amin’izy ireny no mieritreritra fa toy ny tsy misy vidiny mihitsy ny zavatra ataony, eo amin’ny fampandehanana ny orinasa. Tsy afaka manome soso-kevitra na mamorona zava-baovao izy ireo matetika. Tsy mahagaga àry raha misy fiantraikany eo amin’ny fahitany ny asa izany. Vetivety dia tsy mahaliana azy intsony
ilay asa, ka tsy voatosika hanao izay tsara indrindra vitany izy. Hanjary tsy ho tia ny asany izy, ary angamba hankahala azy io mihitsy.Aoka isika handinika ny toe-tsaintsika
Marina aloha fa tsy ho afaka hanova ny toe-javatra misy antsika foana isika. Azo ahitsy kosa anefa ny toe-tsaina, sa tsy izany? Tsara ny mandinika ny hevitr’Andriamanitra sy ny toro lalany momba ny asa, raha hitanao fa lasa tsy mahafinaritra anao ny miasa. (Mpitoriteny 5:17) Rehefa nanao izany ny olona maro, dia hitany fa lasa mahafaly sy mahafa-po azy ireo kokoa ny asany.
Mpiasa Faran’izay Mahay Andriamanitra. Mpiasa koa Andriamanitra. Mbola tsy nieritreritra an’izany mihitsy angamba isika, nefa izany no resahiny voalohany momba azy ao amin’ny Baiboly. Vao manomboka ny Genesisy, dia voalaza fa namorona ny lanitra sy ny tany i Jehovah. (Genesisy 1:1) Eritrereto ny asa rehetra nosahaniny tamin’izy nanomboka namorona: mpamolavola, mpandamina, injeniera, artista, manam-pahaizana amin’ny fifidianana akora, mpanao lamin’asa sy mpanatontosa, mpahay simia, manam-pahaizana momba ny zavamananaina sy ny fiteny, mpamorona programa, sy ny sisa.—Ohabolana 8:12, 22-31.
Manao ahoana ny asa vitan’Andriamanitra? Milaza ny Baiboly fa “tsara” sy “tsara indrindra” izy io. (Genesisy 1:4, 31) “Mitory ny voninahitr’Andriamanitra” tokoa ny zavaboary, ary tokony hidera azy koa isika!—Salamo 19:1; 148:1.
Tsy hoe vita ny asan’Andriamanitra, rehefa avy namorona ny lanitra sy ny tany ary ny olombelona izy. Hoy i Jesosy Kristy Zanany: “Ny Raiko tsy mitsahatra miasa mandraka ankehitriny.” (Jaona 5:17) Mbola miasa foana tokoa i Jehovah. Manome ny sakafo sy ny zavatra hafa ilain’ny zavaboariny izy, ary mamonjy ny mpanompony mahatoky. (Nehemia 9:6; Salamo 36:6; 145:15, 16) Mampiasa olona mihitsy aza izy, dia ireo ‘mpiara-miasa aminy’, mba hanampy azy amin’ny asa sasany.—1 Korintianina 3:9.
Mety hahafinaritra ny asa. Fa angaha moa ny Baiboly tsy milaza fa ozona ny asa? Izany angamba no fandraisan’ny sasany ny Genesisy 3:17-19. Mety hisy hieritreritra fa nasain’Andriamanitra niasa i Adama sy Eva, ho fanasaziana azy ireo noho ny fikomiany. Hoy izy tamin’i Adama rehefa nanameloka azy mivady: “Ny fahatsembohan’ny tavanao no hahazoanao hanina mandra-piverinao any amin’ny tany.” Tsy toy ny te hilaza ve izany fa tena ratsy ny asa?
Tsia. Ny tsy fankatoavan’i Adama sy Eva aza no tsy nahafahan’izy mivady nanitatra ny sisin’ny Paradisan’i Edena. Nanjary voaozona ny tany. Tsy maintsy niasa mafy sy tsemboka àry ny olona vao nahazo izay nilainy.—Romanina 8:20, 21.
Tsy asehon’ny Baiboly ho toy ny ozona na zavatra mahasorena ny asa, fa toy ny zavatra mahafinaritra tokony hankamamina. Miasa mafy Andriamanitra, araka ny efa voalaza teo. Noforoniny tahaka ny endriny ny olombelona, ary nomeny fahaizana sy fahefana hikarakara ny zavaboariny etỳ an-tany. (Genesisy 1:26, 28; 2:15) Nampanaoviny an’io asa io izy ireo, talohan’ny nilazany ny teny ao amin’ny Genesisy 3:19. Tsy ho nampirisika ny olona hiasa mihitsy i Jehovah raha mahasorena sy ratsy ny miasa. Niasa be ry Noa mianakavy taloha sy taorian’ny Safodrano. Nampirisihina hiasa koa ny mpianatr’i Jesosy.—1 Tesalonianina 4:11.
Fantatsika rehetra anefa fa mety handreraka ny asa ankehitriny. Anisan’ireo “tsilo sy hery” tsy maintsy atrehin’ny mpiasa ny adin-tsaina, loza, sorisory, fahadisoam-panantenana, fifaninanana, fitaka, ary tsy rariny. Tsy ozona na zavatra mahasorena anefa ny asa. Antsoin’ny Baiboly hoe fanomezana avy amin’Andriamanitra ny asa sy ny vokatra azo avy aminy, ao amin’ny Mpitoriteny 3:13.—Jereo ny efajoro “Fomba Iatrehana ny Adin-tsaina Vokatry ny Asa.”
Afaka manome voninahitra an’Andriamanitra ianao amin’ny asanao. Nohindrahindraina foana hatramin’izay ny asa vita tsara. Ary izany no anisan’ny lafiny lehibe Eksodosy 31:1-11) Midika izany fa tena nahaliana an’Andriamanitra ny zavatra namboarin’izy ireo, sy ny hatsaran’ilay asa, ny endriny, ary ny tsipiriany hafa.
asongadin’ny Baiboly, rehefa miresaka momba ny asa izy io. Manao asa faran’izay tsara Andriamanitra. Nomeny talenta sy fahaizana isika, ary tiany hampiasaintsika amin’ny fomba tsara izany. Nofenoin’i Jehovah fahendrena sy fahiratan-tsaina ary fahalalana, ohatra, i Bezalila sy Oholiaba, nandritra ny fanorenana ny tranolay teo amin’ny Israely fahiny. Nahavita zavatra kanto sy nahasoa àry izy ireo. (Misy vokany lalina eo amin’ny fiheverantsika ny fahaizana sy ny fahazarana miasa izany. Lasa takatsika fa toy ny fanomezana avy amin’Andriamanitra izy ireny, ka tsy tokony hohamaivanina. Ampirisihina toy izao àry ny Kristianina, mba hihevitra ny asany ho toy ny asa hojeren’Andriamanitra: “Izay rehetra ataonareo dia ataovy Kolosianina 3:23) Nodidiana hanao tsara ny asany ny mpanompon’Andriamanitra. Hahatonga ny mpiara-miasa sy ny olon-kafa ho liana amin’ny hafatra torin’ny Kristianina izany.—Jereo ny efajoro “Ampiharo any Am-piasana ny Toro Lalan’ny Baiboly.”
amin’ny fo manontolo toy ny ho an’i Jehovah, fa tsy ho an’olona.” (Tsara àry ny anontaniantsika tena hoe manao ahoana ny hatsaran’ny asantsika sy ny fahazotoantsika miasa. Hahafaly an’Andriamanitra ve ny asa vitantsika? Mahafa-po antsika tanteraka ve ny fiantsorohantsika ny asa asaina ataontsika? Azo hatsaraina izy io, raha tsy izany no izy.—Ohabolana 10:4; 22:29.
Mahaiza mampifandanja ny asa sy ny fivavahana. Marina fa tena tsara ny miasa mafy, nefa misy zavatra hafa tena ilaina raha tiantsika hahafa-po ny asantsika sy ny fiainantsika. Tsy inona izany fa ny fifandraisantsika amin’Andriamanitra. Niasa mafy i Solomona Mpanjaka, ary nanana harena sy izay rehetra nampiadana. Izao anefa no fanatsoahan-keviny: “Andriamanitra no atahory, ary ny didiny no tandremo, fa izany no tokony hataon’ny olona rehetra.”—Mpitoriteny 12:13.
Tsy maintsy manisy fiheverana ny sitrapon’Andriamanitra àry isika amin’izay rehetra ataontsika. Manao zavatra mifanaraka amin’ny
sitrapony ve isika, sa manao zavatra mety hifanohitra amin’izany? Miezaka mafy hampifaly azy ve isika, sa miezaka hampifaly tena fotsiny? Ho kivy sy hahatsiaro ho manirery isika amin’ny farany, ary tsy hisy dikany ny fiainantsika raha tsy manao ny sitrapon’Andriamanitra isika.Nilaza i Steven Berglas fa tokony ‘hitady zavatra mahasoa sy tena mahaliana hataony eo amin’ny fiainana’, ireo mpiasa lanaka tanteraka. Tsy misy mahasoa kokoa noho ny fanompoana an’ilay nanome antsika ny fahaizana hanao asa tsara anefa. Ho afa-po isika raha manao asa mampifaly an’ilay Mpamorona. Hitan’i Jesosy fa nahasoa sy nahafa-po ary nanome hery toy ny sakafo, ny asa nasain’i Jehovah nataony. (Jaona 4:34; 5:36) Tadidio koa fa manasa antsika ‘hiara-miasa’ aminy Andriamanitra, ilay Mpiasa Faran’izay Mahay.—1 Korintianina 3:9.
Manampy antsika hahita fahafaham-po amin’ny asantsika sy ny andraikitsika, ny fanompoana an’Andriamanitra sy ny fandrosoana ara-panahy. Fahita any am-piasana ny adin-tsaina sy ny fifamaliana ary ny fitakiana zavatra be loatra. Afaka manome ny hery ilaintsika hiatrehana izany anefa ny finoantsika lalim-paka sy ny fifandraisantsika amin’Andriamanitra, raha mbola miezaka ho tonga mpiasa na mpampiasa tsara kokoa isika. Etsy an-danin’izany, dia manampy antsika hahita izay lafiny ilantsika finoana bebe kokoa ny zava-misy eto amin’ity tontolo ratsy ity.—1 Korintianina 16:13, 14.
Mbola hahafinaritra ny asa
Manantena ireo miezaka mafy manompo an’Andriamanitra, fa ho avy ny fotoana hamerenany indray ny Paradisa. Hahafinaritra ny asa rehetra hatao eran-tany amin’izay. Izao no ilazalazan’i Isaia, mpaminan’i Jehovah, ny fiainana amin’izany fotoana izany: “Hanao trano ny olona ka hitoetra ao; ary hanao tanimboaloboka ny olona ka hihinana ny vokatra aminy. Tsy hanao trano hitoeran’olon-kafa izy, na hamboly zavatra hohanin’olon-kafa; ... Ireo voafidiko dia hanaram-po amin’ny asan’ny tànany.”—Isaia 65:21-23.
Hahafinaritra tokoa ny asa amin’izany! Ho anisan’ireo hotahin’i Jehovah sy ho ‘finaritra amin’ny fisasaranao rehetra’ ianao, raha mianatra ny sitrapony sy manao izany.—Mpitoriteny 3:13.
[Teny notsongaina, pejy 8]
Mpiasa Faran’izay Mahay Andriamanitra: Genesisy 1:1, 4, 31; Jaona 5:17
[Teny notsongaina, pejy 8]
Mety hahafinaritra ny asa: Genesisy 1:28; 2:15; 1 Tesalonianina 4:11
[Teny notsongaina, pejy 8]
Afaka manome voninahitra an’Andriamanitra ianao amin’ny asanao: Eksodosy 31:1-11; Kolosianina 3:23
[Teny notsongaina, pejy 8]
Mahaiza mampifandanja ny asa sy ny fivavahana: Mpitoriteny 12:13; 1 Korintianina 3:9
[Efajoro/Sary, pejy 6]
FOMBA IATREHANA NY ADIN-TSAINA VOKATRY NY ASA
Milaza ny mpitsabo fa ny adin-tsaina dia anisan’ny zavatra mety hampidi-doza ny mpiasa. Mety hampaharary vavony sy hahakivy izy io, ary mety hitarika ho amin’ny famonoan-tena mihitsy aza. Karoshi na “fahafatesana vokatry ny asa mafy loatra” no ilazan’ny Japoney azy io.
Betsaka ny zava-mitranga any am-piasana, ka mety hiteraka adin-tsaina. Ao ny fiovan’ny ora sy ny toerana iasana, tsy fifanarahana amin’ny lehibe, fiovan’ny andraikitra na ny asa atao, fisotroan-dronono, ary fandroahana. Inona no ataon’ny olona manoloana izany? Misy miova asa na mifindra any amin’ny tanàna hafa. Ny hafa indray miezaka manafina hoe miady saina izy, nefa mipoitra ihany ilay izy eo amin’ny lafiny hafa amin’ny fiainany, ary matetika no eo anivon’ny fianakaviana. Misy mihitsy aza kivy tanteraka, ka mamoy fo.
Ampy fitaovana tsara ny Kristianina mba hiatrehana ny adin-tsaina ateraky ny asa. Misy toro lalana sarobidy maro ao amin’ny Baiboly, izay manampy antsika hiatrika zava-tsarotra sy hifandray tsara amin’i Jehovah ary hilamin-tsaina. Nilaza, ohatra, i Jesosy hoe: “Aza manahy mihitsy ny amin’ny ampitso, fa ny ampitso hanana ny fanahiany. Ampy ho an’ny andro tsirairay ny ratsy mitranga eo aminy.” Mampirisika antsika io andininy io mba hifantoka amin’ny olana mitranga anio, fa tsy amin’izay mety hitranga rahampitso. Tsy hanitatra ny olana mahazo antsika isika amin’izay, satria hanampy trotraka ny adin-tsaintsika izany.—Matio 6:25-34.
Tena mila miantehitra amin’ny herin’Andriamanitra ny Kristianina, fa tsy amin’ny heriny fotsiny. Rehefa toa tsy ho zakantsika intsony ny zavatra manjo antsika, dia afaka manome antsika fiadanana sy fifaliana izy, ary koa ny fahendrena hiatrehana ilay zava-tsarotra. Hoy ny apostoly Paoly: “Aoka ianareo hahazo hery mandrakariva ao amin’ny Tompo sy ao amin’ny tanjaky ny heriny.”—Efesianina 6:10; Filipianina 4:7.
Mety hisy vokany tsara koa na dia ny toe-javatra miteraka adin-tsaina aza. Mety hanjary hitady fanampiana amin’i Jehovah sy hitoky aminy mantsy isika, rehefa iharam-pitsapana. Mety ho voatosika haneho hatrany ireo toetra kristianina koa isika, ary hianatra hanam-paharetana. Mampirisika antsika i Paoly hoe: ‘Aoka isika hifaly ao anatin’ny fahoriana, satria fantatsika fa ny fahoriana mahatonga fiaretana, ny fiaretana indray mahatonga fankasitrahan’Andriamanitra, ny fankasitrahan’Andriamanitra kosa mahatonga fanantenana.’—Romanina 5:3, 4.
Noho izany, na ny adin-tsaina aza dia mety handrisika antsika handroso ara-panahy, fa tsy voatery hiteraka famoizam-po sy alahelo.
[Efajoro/Sary, pejy 7]
AMPIHARO ANY AM-PIASANA NY TORO LALAN’NY BAIBOLY
Mety hahatonga ny mpiara-miasa sy ny olon-kafa ho liana amin’ny hafatry ny Baiboly, ny fihetsika sy ny fitondran-tenan’ny Kristianina any am-piasana. Manoro hevitra ny mpiasa ny apostoly Paoly ao amin’ny taratasiny ho an’i Titosy, mba “hanaiky ny [mpampiasa azy] amin’ny zava-drehetra ka hanao izay mahafinaritra azy, tsy hamalivaly, tsy hangalatra, fa ho faran’izay mahatoky kosa, mba hampamirapiratra ny fampianaran’Andriamanitra Mpamonjy antsika, amin’ny zava-drehetra.”—Titosy 2:9, 10.
Nanoratra toy izao tany amin’ny foiben’ny Vavolombelon’i Jehovah, ohatra, ny mpandraharaha iray: “Te hampiasa Vavolombelon’i Jehovah aho, ka mangataka alalana aminareo. Azoko antoka mantsy fa manao ny marina sy mendri-pitokisana ary tsy hamitaka ahy izy ireo. Ny Vavolombelon’i Jehovah ihany no tena atokisako. Mba ampio aho.”
Mpandray olona ao amin’ny sekoly iray tsy miankina, ilay Kristianina atao hoe Kyle. Tsy nifankahazo izy sy ny mpiara-miasa taminy, indray mandeha, ka nanompa azy teo anatrehan’ny mpianatra vitsivitsy izy io. Hoy i Kyle: “Tsy maintsy nitandrina aho, mba tsy hanala baraka ny anaran’i Jehovah.” Nieritreritra ny fomba hampiharany ny toro lalan’ny Baiboly izy, nandritra ny dimy andro. Iray amin’izany ny Romanina 12:18 manao hoe: “Raha azo atao, ka mbola miankina aminareo koa, dia mihavàna amin’ny olona rehetra.” Nandefa e-mail tamin’ilay mpiara-miasa taminy àry izy, ary niala tsiny noho ny tsy fifanarahana nisy teo amin’izy ireo. Niangaviany hijanona izy rehefa mirava, mba hahafahan’izy mirahavavy hiresaka sy hamitram-pihavanana. Tsy tezitra intsony ilay mpiara-miasa taminy rehefa vita ilay resaka, ary niaiky fa nety ny nataon’i Kyle. Hoy izy: “Azoko antoka fa ny fivavahanao no nahatonga anao hanao an’izao”, ary nofihininy mafy i Kyle rehefa nifanao veloma izy ireo. Inona no fanatsoahan-kevitr’i Kyle? “Mety foana ny atao rehefa ampiharina ny toro lalan’ny Baiboly.”
[Sary, pejy 4, 5]
Betsaka ny mpiasa mieritreritra fa toy ny tsy misy vidiny ny zavatra ataony, eo amin’ny fampandehanana ny orinasa
[Sary nahazoan-dalana]
Japan Information Center, Consulate General of Japan in NY
[Sary nahazoan-dalana, pejy 8]
Gilaoby: NASA photo