“Noho ny Zazalahy Iray Sivy Taona”

ISAKY ny tonga tao amin’i Wiesława ny Vavolombelon’i Jehovah, dia nisaotra azy ireo tamim-pahalalam-pomba fotsiny izy, fa tsy nety niresaka tamin’izy ireo. Any atsimon’i Polonina no misy an’io vehivavy io. Tonga nitsidika azy anefa i Samuel, sivy taona, sy ny reniny, indray andro. Vonona hihaino ny hafatra nentin’izy mianaka i Wiesława tamin’io, ary nandray gazety momba ny paradisa an-tany.

Efa nanakaiky ny Fahatsiarovana ny nahafatesan’i Kristy, ka naniry hanasa an’i Wiesława hanatrika an’io fotoan-dehibe io i Samuel. Nitsidika azy indray izy sy ny reniny sady nitondra taratasy fanasana. Nahita an’ilay zazalahy nanao fitafiana tsara i Wiesława ka niangavy azy ireo mba hisolo akanjo vetivety. Nihaino an’i Samuel izy nony tafaverina. Nekeny ilay fanasana, ary nanontany izy hoe: “Izaho irery ve no tokony ho any sa izahay mivady?” Hoy koa izy: “Ho avy aho na dia tsy ho afaka aza ny vadiko. Noho ianao ry Samuel no hanaovako izany.” Faly be i Samuel satria tonga tokoa i Wiesława.

Nipetraka teo akaikiny i Samuel nandritra ny lahatenin’ny Fahatsiarovana, ary nampiseho azy an’ireo andinin-teny nohazavaina. Tsy nampoiziny izany. Nahafinaritra azy ilay Fahatsiarovana. Faly izy satria hevi-dalina no nodinihina tao, nefa nohazavaina tamin’ny fomba tsotra. Tsara fanahy taminy koa ny fiangonana ka nanohina ny fony izany. Nanomboka teo dia nanjary liana tamin’ny Baiboly i Wiesława, ary lasa nifanerasera tsy tapaka tamin’ny Vavolombelon’i Jehovah. Hoy izy vao haingana: “Menatra aho satria tsy nety nihaino anareo taloha. Tsoriko anefa fa matoa aho nihaino ny hafatra nentinareo, dia noho ny zazalahy iray sivy taona, dia i Samuel.”

Maro ny tanora Vavolombelona, toa an’i Samuel avy any Polonina, no midera an’Andriamanitra amin’ny alalan’ny fitoriana sy ny fitondran-tena tsara. Raha tanora ianao, dia ho azonao atao koa ny hanampy olona tso-po haniry hianatra Baiboly.