‘Mandrobona na dia efa Antitra Aza’

MAMBOLY palmie eo an-tokotaniny ny olona any amin’ny faritr’i Mediterane. Tsara tarehy ireo hazo ireo ary tsara be ny voany. Mbola mamoa foana izy ireny, na dia efa zato taona mahery aza.

Nanao tononkalo momba ny tovovavy solemita iray i Solomona mpanjakan’ny Israely fahiny. Nohariny tamin’ny hazo rofia na palmie, ny bikan’io tovovavy tsara tarehy io. (Tonon-kiran’i Solomona 7:8) Hoy ny boky Zavamaniry ao Amin’ny Baiboly (anglisy): “ ‘Tàmâr’ ny hoe palmie amin’ny teny hebreo. ... Nilazana zavatra tsara sy kanto izy io tamin’ny Jiosy, ary matetika no natao anaran’ankizivavy.” Nanana anabavy tsara tarehy atao hoe Tamara, ohatra, i Solomona. (2 Samoela 13:1) Mbola misy ray aman-dreny ankehitriny miantso ny zanany vavy hoe Tamara.

Tsy ny vehivavy tsara tarehy ihany anefa no oharina amin’ny palmie. Nihira toy izao ny mpanao salamo: “Ny marina hamololona tahaka ny rofia; hisandrahaka tahaka ny sedera any Libanona izy; efa nambolena tao an-tranon’i Jehovah izy ka maniry eo an-kianjan’Andriamanitsika; mbola manorobona ihany izy, na dia efa antitra aza; dofodofotra sy maitso izy.”—Salamo 92:12-14.

Azo oharina amin’ny palmie tsara tarehy koa ireo manompo an’Andriamanitra amim-pahatokiana mandritra ny fahanterany. Hoy ny Baiboly: “Satroboninahitra tsara tarehy ny volo fotsy, ao amin’ny làlan’ny fahamarinana no ahazoana azy.” (Ohabolana 16:31) Mihena ny herin’ny zokiolona, satria efa mandroso ny taonany. Matanjaka ara-panahy foana anefa izy ireo, rehefa mamaky tsy tapaka ny Tenin’Andriamanitra. (Salamo 1:1-3; Jeremia 17:7, 8) Tena mampahery ny hafa ny zokiolona mahatoky, satria manome ohatra tsara amin’ny teniny sy ny ataony. Azo lazaina hoe mamoa isan-taona izy ireo, satria mazoto manompo foana. (Titosy 2:2-5; Hebreo 13:15, 16) Toy ny palmie izy ireo, ka mbola mandrobona na dia efa antitra aza.