Efa maneran-tany ankehitriny no misy olana. Mahantra sy mijaly ny ankamaroan’ny olona any amin’ny tany sasany. Manana mihoatra noho izay tena ilainy kosa ny olona maro any an-tany hafa. Tsy ho voazara mitovitovy mihitsy ny harena eto an-tany raha tsy fanjakana iray ihany no mitondra ny tany manontolo.—Vakio ny Mpitoriteny 4:1; 8:9.

Tsy hisy hanaiky mihitsy ny hoe mpitondra iray ihany no hitondra ny tany manontolo, satria tsy misy olona hahavita tsara an’izany. Tsy misy olona heken’ny olon-drehetra ho mpitondra izany koa. Miharatsy toetra koa ny olona rehefa mahazo fahefana. Mampatahotra na ny mieritreritra fotsiny aza hoe olona iray no hanjakazaka amin’ny olona rehetra.—Vakio ny Ohabolana 29:2; Jeremia 10:23.

Nifidy an’i Jesosy Zanany i Jehovah Andriamanitra mba hitondra ny olombelona mandrakizay. (Lioka 1:32, 33) Efa niaina tetỳ an-tany i Jesosy. Nanasitrana ny marary izy tamin’izany, nampianatra ny olona ambany, ary niaraka tamin’ny ankizikely. (Marka 1:40-42; 6:34; 10:13-16) I Jesosy àry no Mpitondra tsara indrindra.—Vakio ny Jaona 1:14.

Notendren’Andriamanitra hitondra ny tany avy any an-danitra ny Zanany. (Daniela 7:13, 14) Tsy voatery hankany amin’ny faritra rehetra hanjakany ny mpitondra olombelona rehefa manjaka. Toy izany koa fa tsy voatery hanketỳ an-tany i Jesosy vao ho afaka hitondra ny olombelona.—Vakio ny Matio 8:5-9, 13.

Tsy ny olon-drehetra anefa no hanaiky an’i Jesosy ho Mpitondra, fa izay tia ny tsara ihany. Horinganin’i Jehovah izay tsy manaiky an’io Mpitondra be fitiavana sy tia rariny io.—Vakio ny Matio 25:31-33, 46.

Toy ny mpiandry ondry manangona ny ondriny i Jesosy. Efa manangona ny mpandefitra avy any amin’ny firenena rehetra izy, ary mampianatra azy ireo ny lalàn’Andriamanitra momba ny fitiavana. (Jaona 10:16; 13:34) Lasa mpanohana mafana fo an’i Jesosy sy ny fitondrany izy ireo. (Salamo 72:8; Matio 4:19, 20) Mampahafantatra ny olona eran-tany izy ireo fa efa lasa Mpanjaka i Jesosy.—Vakio ny Matio 24:14.

Kely sisa i Jesosy dia hanafaka ny olombelona amin’ny mpitondra ratsy fanahy. Nifidy ny sasany tamin’ny mpanara-dia azy izy mba hiara-manjaka aminy avy any an-danitra. (Daniela 2:44; 7:27) Hahalala an’i Jehovah ny olona rehetra rehefa hitondra i Jesosy, ary ho lasa paradisa toy ny tamin’ny voalohany ny tany.—Vakio ny Isaia 11:3, 9; Matio 19:28.