Yantikheliyaaya Afilipo 2:1-30
2 Mayaamunna, ukhala wiira nnaalipihana nlattu wookhala ni Kristu, ukhala wiira nnaamaalihana ninifento, ukhala wiira nnaalipihana nhina mminepani, ukhala wiira nnawooniherana unamaana ni uthunku,
2 muncerere utteeliya waka, nkhalanaka wuupuwela wiinyu umocaaru ni nifento, nkhalaka owaataana, nkhalanaka moopuwelelo mamocaaru.
3 Nhipanke hataa itthu nsinttanaka ni hataa ninttima, masi mwiiyevihaka, ni mwaawehere akhunaninyu ukhala oolupale wuupwahani nyuuva,
4 mwaavyaka kahi paahi citthu cinoocivelani nyuuva, masi ciicammo cinaacivela akhunaninyu.
5 Nkhalane moopuwelelo mamocaaru Yesu Kristu yaarinaawe:
6 Hataa ukhalaka wiira aakhala khampa Nluku, khoopuwenle hataa vakaani umananiha unlikanana Nluku.
7 Uhiya commo, uyo ahohiya citthu cotheene caarinaawe, ahotthuna ukhala khampa ipottha ni ahokhala pinaatamu.
8 Kahi iyo paasi, ukati waawilyaawe khampa pinaatamu, aheeyeviha ni aheewelela mpaka ahotthuna ukhwa, iyee, ukhwa wanipottoni.
9 Nlattu wo iyo itthwiiyo, Nluku honttitthimiha cinene ni honvaha ninrimaawe wotheene ncina nuulupale noopwaha macina makhwaawe otheene,
10 wiira nlattu wo ncina na Yesu, akhorome uhoolo waya aale ari wiirimu ari watuninyani ni vathi waya ituninya,
11 ni wiira atthu otheene acuwele sana-saana wiira Yesu Kristu khanle Pwiiya, wiira attitthimihiye Nluku, athumwaane.
12 Phimaana, mayamunna, khampa nneeweleleenyu ikhumelo yokhalayi, kahi paahi ukati waaryaaka ni nyuuva, masi nna co ninrimeenyu wotheene ukati kihiryaaka ni nyuuva, nhihiyerere wiikurumica wiira mwiitthenkacere woopoliya winyu moovaka ni nthukumelaka.
13 Kontha Nluku khanle ule nopanka inoncivela, nawukurumicaani, ni nawuuvahani upheela ni ikuru wiira nvare nteko.
14 Nhihiyerere upanka citthu cotheene woohittokutta hataa woohinyakulihana,
15 wiira nkhale ooreera nrima ni oohittheka, asaana a Nluku oohipahuwa, ankhala iriyari yaatthu oohinamaana ni oottheka, masi nyuuva wiira mpharele iriyaryaaya khampa mithuko contuninyani,
16 nhihiyereraka uvaresesa nuulumo nookumi. Vano, kinaahala ukhalana isariya yootteeliya nihuku na Kristu, nlattu woocuwela wiira akitthawile mahala ni hataa akiikurumicile mahala.
17 Uhiya commo, hataa kiittheliyaka toko itthuvo yo iviinyu wakhilompini ni nteko nnovareenyu nlattu wowaamini winyu, nnaakitteeliha nrima ni kintteeliya nkhayi ni nyuuva otheene.
18 Woolikanaca, nyuuva ciicammo wuutteelekeni nrima ni ntteeliyeke nkhayi ni miiva.
19 Kinawaaweherera Apwiiya Yesu wuuveleeliherani Timotiyu woohipica, wiira ni mi kilipihiye kaakhelaka ihapari cinyu.
20 Akirina-tho ntthu nkiina nopheela ukavihera toko uyo, noohala wuuwacerani sana-saana.
21 Kontha atthu otheene akiinaayo, anaavya citthu cinaacivela paasi ayova, kahi cinaacivela Apwiiya Yesu Kristu.
22 Masi nyuuva nnacuwela wiira uyo hoonihera mwaneene wiira hokivarana nteko khampa ipottha nilalyeeraka ihapari comaana, khampa mwaana naathumwaane.
23 Phimaana, kinweherera ucuwela itthu inhala ukiraneela wiira kinvelelihe.
24 Kinawaakhuluvela Apwiiya wiira ni miiva ciicammo kinaahala uwa woohipica.
25 Masi nna vaa, kinoona wiira itthu yomaana ukhanle wuuveleeliherani Epafrotitu, munnaaka kinonvaranaaka nteko ni naana ikhotto nkhayi ni miiva, ule munveleelihileenyu wiira akikavihere citthu cahaahalaaka ukhitiri veekha,
26 ni ukhala wiira uyo naapheela cinene uwoonani, ni nokhala ooriipiya nrima nlattu woocuwela wiira nyuuva nheewa wiira uyo aanawerennya.
27 Khweeliini, uyo ahowerennya venci mpaka aahanle vakaani ukhwa, masi Nluku homoonela ikiriri. Khweeliini, khamoonenle ikiriri uyo paahi, masi ciicammo miiva, wiira kihikhalane citthu cookiriipiha nrima.
28 Phimaana, kinanveleeliha wowaakuvyaaca, wiira mwamoonaka, nturuwele wuutteelani nrima ni mi akivukuwe masukhuli.
29 Phimaana, mmwaakhelele khampa cilemalenleenyu mwaapwiiya, wuutteelakani nrima ni nhihiyerere waawacera atthu khampa uyo,
30 kontha uyo aahanle vakaani ukhwa nlattu wo miteko ca Kristu alevaka ukumyaawe wiira akhale ni miiva ni wiira avare nteko waahaleenyu ukivarela.
