Yantikheliyaaya Afilipo 3:1-21
3 Phimaana, mayamunna, nhihiyerere ukhala ootteeliya waapwiiya. Khunkirikela uwantikhelani-tho moolumo mamocaaru, ukhala wiira ayo anawuukhikicerani.
2 Ratta naatthu anlikana naasilapwa; ratta naatthu ookwanyula; ratta naatthu aneettottopa nlattu wowuula.
3 Kontha thi hiivano nuulihiye weekhweeli, ninonvarela nteko Nluku nikaviheriyaka ni nnepa wowaarya ni ninawiittottopa nlattu wa Yesu Kristu. Khaninkhuluvela citthu comwiirutthuni,
4 hataa ukhalaka wiira mi kihaana isariya yookhuluvela citthu contuninyani, waapwaha atthu otheene.
Akhala ntthu noopuwela wiira haana isariya yoopheela ukhuluvela citthu comwiirutthuni, mi kihotepa ukhalana iyo isariyeeyo:
5 kuulihiye uphiya waya mahuku 8 kinayariyeene, nhina nloko naasarayeli, kiyariye nihimo na Pencamii, asipaapaaka maheperewu, toko cinhimyaaya nlamulo, miiva kinfariseu.
6 Kuulumaka nhina wiikurumica, akimala woomolaniha nloko nomakristau; kuulumaka nhina weettela isariya yommalamuloni, kaakhala toko ntthu osariya.
7 Citthu cotheene kaavahaaka ifayita khalayi, nna co kinoonela ukhala citthu coohifayita nlattu wa Kristu.
8 Uhiya commo, citthu cotheene nna co kinwehera ukhala coohifayita nlattu woocuwela ifayita irinaaya uncuwela Yesu Kristu, Pwiiyaaka. Nlattu wo uyova, kiholeva citthu cotheene ni kinwehera khampa ikokhola wiira kimphwanye Kristu,
9 ni wiira kiphwanyiye kinvaresesaka, kahi nlattu woweettela isariya yomalamulo masi nlattu wosariya yoomwaamini Kristu ni isariya inweela wa Nluku.
10 Itthu impheelesaaka ukhanle uncuwela uyova ni ikuru yowunwelelihiya wawe, ni uhuva toko caahuvalyaawe, ukhwa toko caakhwilyaawe,
11 wiira koone wakhala wiira wanaahala ukhitirya wunwelelihiya kakhwaaka, ukati unhalaaya wunwelelihiya atthu ookhwa, unhala wiirannya woohipica.
12 Kahi wiira kihopaca waakhela, awula kahi wiira kihopaca ukhala oohipahuwa, masi kinawiikurumica wiira koone wakhala wiira kinaahala ukhitiri waakhela ile Yesu Kristu ikithanlenlyaawe.
13 Mayamunna, nanlelo akineecoona wiira kihaakhela; masi itthu imoca kinkupalyaaka phiila: Kineera kiikurumicaka uliyala citthu cokhalayi ni wiimananiha wiira kiphwanye citthu coohoolo,
14 kinawiikurumica wiira kaakhele itthuvwaaka, yowiihaniya uculu wa Nluku nlattu wa Yesu Kristu.
15 Vano, otheene hiiva nikhanle oolipa nhina mminepani, ninlamuliya ukhalana ayo moopuwelelwaayo; ni wakhala wiira nyuuva nnawuupuwela ni mananna makhwaawe, Nluku naahala wuuhimyeerani itthu yooreera upanka.
16 Hataa niikurumicaka manannani, nihihiyerere weetta uyo nttalooyo.
17 Mayamunna, nkhale owaataana nkitakihaka, nhihiyerere waatakiha ale antthara ntakihero nuuvahileehuni.
18 Ahaavo atthu enci kaaromonlyaaka imaara cinci, masi nna vaa, ayo kinaaromola kunlaka, kontha anaathanya ukhwa wa Yesu Kristu.
19 Wiimaleloni anrwaa utankanyiya, nlukwaaya nikhanle nthuukwanaya, anaattitthimiha citthu cowoonihaca ihaaya ni anoopuwela citthu co watuninyani.
20 Masi ilapweehu iri wiirimu, wonwo unonweherereehu Yesu Kristu, moopoliihu.
21 Uyo naahala utatusa irutthwiihu alikanihaka ni yawawe yowaarya niikuru cawe, cinonkhitiriha wiiriha citthu cotheene umwiiwelela.