Ya Filemoni 1:1-25
1 Miiva Paulu, kitthukiye nlattu wa Kristu, wamoca ni Timotiyu munneehu, ninanveleelihera iwarakha Filemoni munneehu owiikurumica,
2 Afiiya nrokorihu, Rikhipu nkhunanihu ookhottoni ni nloko ninthukumana uwannyaa:
3 Nluku Paapeehu ni Yesu Kristu apwiiyeehu, awoonihereni unamaana woonironya.
4 Kinansukhuru Nlukwaaka, ukati wotheene kinooromolaaka kilompaka,
5 ukhala wiira akinhiyerera wiiwa wuulumiyaka waamini waa, waafenta waa Apwiiya Yesu ni atthu otheene ookhuluvelya.
6 Kinaalompa wiira waamini urineehu, uwiirihe ucuwela wiira citthu comaana cotheene nirinaa nlattu wa Kristu.
7 Kontha kahokhala ootteeliya ni oomaalihiya cinene ukati wiiwalyaaka nuulumiyaka nifento naa, ukhala wiira weeva, munnaaka, uhaalipiha nrima atthu ookhuluvelya.
8 Phimaana, hataa ukhalaka wiira kihovahaceriya mwancina na Kristu wuuruma upanka itthu yomaana,
9 kimpheela wuulepela ninifento. Mi, Paulu, nlopwana owuuluvala ni nna co kitthukiye nlattu wa Kristu,
10 ihaavo impheelaaka wuulepela nlattu wa Oneesimu, khanle mwanaka kinari nkhattya.*
11 Khalayi, uyo khoopankile citthu comaana, masi nna va, uyo naapanka citthu cowuuphwanyiha maana weeva ni hataa miiva.
12 Kinaamwiirela wiira aturuwele nwo, kontha mi kinanfenta.
13 Kampheela wiira uyo akhale nimiiva, avaraka nteko weeva waahalaa ukivarela kinaryeene nkhattya kitthukeliyaaka nlattu wohapari comaana.
14 Masi, akimpheela upanka hataa itthu woohuukoha, wiira ureera waa nrima uhikhale wookhanyererihiya, masi ukhale wootthuna waa.
15 Atthunaka phimaana waatthawilyaawe ukati vakaani,* wiira wahoolo ooturuwele ni unkhalakhalane mpaka.
16 Kahi khampa ipottha, masi oophwanela ufentiya uvikana ipottha, ukhala wiira uyo munna kinonfentaaka. Uhaana unfentaka cinene, kahi nlattu wookhala pinaatamu paahi, masi nlattu wookhalaka munna oofentiya toko hiiva.
17 Wakhala wiira unaakoona ukhala mpatthannya, umwaakhelele saana toko caahalaa ukaakhelela miiva.
18 Uhiya commo, wakhala wiira unanlokiha awula hookosera, ukilokihe miiva.
19 Miiva Paulu, kinantikha ila iwarakheela nintata naka: mi kinaahala wuuliva. Wuupuwele wiira ni weeva ciicammo uhokikophela; kinawuulokiha ukumyaa.*
20 Munnaaka, kimpheela ukikavihere, wamoca ni Apwiiya, ukhomaalihe nrimaaka wamiithoni wa Kristu.
21 Kinaakupali wiira unaahala upanka itthu kinoolepelaaka. Phimaana, kinwantikhelaaka ila iwarakheela, kontha kinaacuwela wiira unaahala upanka citthu uvikana cantikhilyaaka nhina ila iwarakheela.
22 Uhiya commo, utthenkace nipuro ninhalaaka ulukama. Nlattu woolompa winyu, kinaakupali wiira kinaahala utthukuliya wiira kituruwele ukhala nkhayi ninyuuva.
23 Epaafara, tthukiye nkhayi nimiiva nlattu woomwaamini Yesu Kristu, nawuuveleelihera isalamu,
24 ni ciicammo Markus, Aristariku, Temasi ni Luka, anavaranaaka nteko anawuuveleelihereni isalamu.
25 Apwiiyeehu Yesu Kristu yuuthoonyere unamaana woonironya, nlattu wooreera waa nrima.
