Ihapari Comaana Cantikhiye ni Joau 1:1-51
1 Wuupaceroni naari Nuulumo, ni Nuulumo naari ni Nluku ni Nuulumo naari nluku.
2 Wuupaceroni aari ni Nluku.
3 Citthu cotheene cumpiye nlattu waawawe ni ahaari uyo citthu khacaahala wumpiya.
Itthu yumpiye
4 nlattu wo uyova ukhanle ukumi, ni uyo ukumyuuyo waari iluusu yaapinaatamu.
5 Iluusu inaapharela wapiphini, masi ipiphiiyo khikhitinri uvukula upharela wayanwo.
6 Aahokhumelela nlopwana aarumiye ni Nluku; ncina nawe naari Joau.
7 Uyo nlopwanooyo aawile khampa saahiti, wiira avahe usaahiti woluusu, wiira otheene yaamini nlattu waawawe.
8 Ni uyo khaari iyo iluuswiiyo, masi uyo aawile uvaha usaahiti wo iyo iluuswiiyo.
9 Yanhala uwa watuninyani iluusu yeekhweeli, iluusu inaamwaleela atthu otheene.
10 Uyo aahowa watuninyani ni ituninya* yumpiye nlattu waawawe, masi atthu ontuninyani khayancuwenle.*
11 Uyo aawile nlattu waapoovwaawe, masi ayo khayantthunile.
12 Vano, otheene ale yaamwaakhelenle, uyo ahaavaha ukhulupale wiira akhale asaana a Nluku, kontha yahothoonyera umwaamini.
13 Ayo khaayariye naapinaatamu awula khaayariye nuutthuna waapinaatamu ni khaayariye nuutthuna wantthu, masi nuutthuna wa Nluku.
14 Vano, Nuulumo naahokhala pinaatamu ni nno nihokhalakhalana, nihoona uttitthima waya, uttitthima unlikanaca nuule unkhalanaawe mwaana oopaceriya naathumwaane; ni uyova antthuniya cinene wiirimu ni weekhweeli.
15 (Joau ahomuuluma eeraka: “Ula phuule kaamwaacaaka keeraka: ‘Ule nohala uwa uttuli waka, hokipwaha miiva, kontha miiva kihinayariya uyo ahaavo.’”)
16 Kontha uyo aahoocarana unamaana, phimaana honithoonyera otheene cihu venci cinene unamaana woonironya.
17 Kontha Nlamulo niwile avareliyaka nteko Mooceesi; unamaana woonironya ni ikhweeli, ciwile nlattu wa Yesu Kristu.
18 Khaavo pinaatamu tokile umoona Nluku, nluku mmoca ri mphantte Waathumwaane, phinicuwelihile.
19 Ila phi itthu Joau oolumilyaawe ukati ayuuta waaveleelihilyaaya anankuttho ni malevita u Yerusalemu, wiira yankohe: “Weeva tipani?”
20 Uyo khaakhottile waakhula, ahohimya ikhweeli eeraka: “Mi akinakhala Kristu.”
21 Ayova yahonkoha: “Vano weeva tipani? Weeva Eliyasi?” Uyova ahaakhula: “Mena, akinakhala.” Weeva Porofeeta? Uyova ahaakhula: “Mena, akinakhala!”
22 Vano ayova yahonkoha-tho: “Weeva tipani? Unicipwe, wiira nacuwele yoowaakhula ale anirumile. Nieereke wiira weeva tipani?
23 Uyo ahaakhula eeraka: Mi kikhanle ncu nantthu nokhuwela muuthakoni eeraka: ‘Mookolele nttala wa Yehova,’ khampa coolumilyaawe Isaiya, porofeeta.”
24 Ale atthu yaarumiyaale, yaari mafariseu.
25 Vano yahonkoha-tho, yeeraka: “Vano, kontha isiyani unaapattisaa atthu, ni weeva khunakhala Kristu, khunakhala Eliyasi ni hataa ciicammo khunakhala porofeeta?”
26 Joau ahowaakhula awiirelaka co: “Mi kimpattisa ni maaci. Iriyariinyu, ahaavo ahinoncuwela,
27 ule nowa uttuli waka miiva, ni miiva khunkiphwanela unrula isantaliya cawe.”
28 Citthu cotheene nnya ciirannya u Petaaniya, mphantte nkhwaawe wo mooloko Jordau, nipuro Joau naapattisaawe atthu.
29 Waaseele, uyo ahomoona Yesu awaaka nipuro naaryaawe ni aheera: “Mooneke ikhontwaa ya Nluku, inkumiha matampi ntuninyani motheene!
30 Ula, phaamwaacaaka ukati woolumilyaaka co: ‘Ule nohala uwa uttuli waka, hokipwaha miiva, kontha miiva kihinayariya uyo ahaavo.’
31 Hataa miiva ciicammo akancuwela, phimaana kinaapattisaaka atthu ni maaci, wiira atthu otheene o Isarayeli ancuwele.”
32 Joau ahohimyaca-tho itthu ikhwaawe eeraka: “Kahoona nnepa wowaarya waakhuruwaka wiirimu toko ikhuntta ni wamweemelelaka uyova.”
33 Hataa miiva ciicammo akancuweIa, masi ule kirumile wiira kipattise ni maaci, ahokiirela: ‘Ule unhalaa umoona nnepa wowaarya wankhuruwelaka ni wamweemelelaka, yooyo phinhala upattisa ninnepa wowaarya.’
34 Ni mi kihoona iyo itthwiiyo yiirannyaaka, phimaana kihovaha usaahiti kiiraka wiira ula phiri Mwaana a Nluku.”
35 Waaseele waya, Joau aari-tho wonwo nkhayi naattharyaawe eeli,
36 ni umoona wawe Yesu eettaka, uyo aheera: “Mmooneke, mwaakhontwaa a Nluku!”
37 Atthari eelyaayo wiiwa waya iyo itthwiiyo, yahontthara Yesu.
38 Ni Yesu uweha wawe uttuli ni woona wawe wiira aanaatthariya, aahaakoha co: “Nnaavyani?” Vano ayova yahaakhula yeeraka: “Raapi! (nna nuulumonna nataphuleliyaka maanaaya “mwiitthucihi”), nlukamile vayi?”
39 Uyo ahowiirela: “Nttwee mwacuweleke.” Vano, ayova yahontthara ni yahocuwela nipuro naalukamilyaawe, ni yahokhala nuuyo nne nihukunne. Iyo yeerannya 16 oora.
40 Atthu eeli yeewile moolumo a Joau ni nuntthara Yesu, mmocooyo ari Antere, nhimaawe Simau Peturu.
41 Vano, uyova ahorwaa ni ahomoonanana* Simau, nyeenyaawe, ni ahomwiirela: “Nihomphwanya Mesiya” (nna nuulumonna nataphuleliyaka maanaaya Kristu),
42 Ni ahoncisa mpaka nipuro naaryaawe Yesu. Yesu umoona wawe, aheera: “Weeva ukhanle Simau, mwaana a Joau. Unhala wiihaniya Sefas.” (nna ncinanna nataphuleliyaka maanaaya Peturu)
43 Waaseele, Yesu ahopheela urwaa u Kalileya. Vano, ahonkumanana Filipe ni ahomwiirela: “Ukhale nttharyaaka.”
44 Filipe aari o Petesaayita, isittatti yaakhalaawe Antere ni Peturu.
45 Filipe ahonkumanana Natanayeli ni homwiirela: “Nihomphwanya ule antikhiye Munlamuloni na Moocesi, ni maporofeeta anhimilyaaya yeeraka: Yesu, mwaana a Yusufu, o Nasaree.”
46 Vano, Natanayeli aheera: “Niireke wiira u Nasaree inaakhumelela itthu yomaana?” Filipe ahomwaakhula: “Uweeke waamooneke.”
47 Yesu umoona wawe Natanayeli aattamelaka, ahoolumaca amwaacaka uyova: “Ula nsarayeeli eekhweeli ni hinootha.”
48 Natanayeli ahonkoha: “Mwaakicuwela cani?” Yesu ahomwaakhula: “Filipe waaryaawe hinaaya uwiihana, ukati waaryaa vathi waya mwiri wo ifiiku, mi kihowoona.”
49 Natanayeli aheera: “Raapi, Pwiiya nyuuva nkhanle Mwaana a Nluku, Mwene o Isarayeli.”
50 Yesu ahomwaakhula: “Unkaamini nlattu woowiirela wiira kihowoona ukati waaryaa vathi waya mwiri wo ifiiku? Unaahala woona citthu cuulupale upwaha nnya woonilyannya.
51 Vano, uyo ahomwiirela: “Kinoohimyeerani ikhweeli wiira: Nyuuva nnaahala woona irimu inahulyeele ni malayikha a Nluku yawelaka ni yankhuruwelaka Mwaana a Pinaatamu.”
Notas
^ Awula: “atthu otheene.”
^ Awula: “khayancuwelenle.”
^ Awula: “itthu yoopacera yaapankilyaawe, waari urwaa umoonanana.”
