Ihapari Comaana Cantikhiye ni Joau 10:1-42
10 “Kinoohimeeryani ikhweeli wiira: ule nokela muncicini nokhontwaa woohivira wankhora, masi awelaka ncicinnno, uyo latarawu.
2 Masi ule nokela aviraka wankhora phiri makampuci okhontwannyo.
3 Kwaarta nanhulela makampucyuuyo, ni ikhontwaa cinaacuwelela ncu nawe. Uyo nawiihana khula ikhontwaa nincina naya ni naakumihera vate.
4 Akumiheraka ikhontwaa cotheene vate, uyova naahoolela ni nnyo cinantthara, kontha cinaacuwela ncu nawe.
5 Ni nnyo ikhontwannyo, khacinhala untthara ntthu cihinoncuwelaaya, masi cinhala wiira untthawa, kontha khacincuwela ncu nawe.”
6 Yesu ahopanka nna nlattaniheronna, masi ayova khayiiweehile itthu yaapheelaawe uhimya.
7 Phimaana, Yesu ahowiirela-tho co: “Kinoohimeeryani ikhweeli wiira: Thi miiva kikhanle nkhora wokhontwaa.
8 Otheene ale yeehimya ukhala amakampuci eekhweeli yaari malatarawu; ni ikhontwaa khacaawiiwelenle.
9 Miiva kikhanle nkhora woncici. Ule novira uyo nkhorooyo naahala woopwa, naahala ukela ni ukhuma, ni naahala uphwanya iyoolya wiira alihe ikhontwaa cawe.
10 Latarawu itthu inweelaawe ukhanle paasi winnya, wiiva ni utankanya. Masi mi kiwile wiira mphwanye ukumi, ukumi woolikana.
11 Mi kikhanle makampuci omaana; makampuci omaana, naaleva ukumyaawe wiira aakihere ikhontwaa cawe.
12 Nanteko, hikhanle makampuci ni hikhanle mwaneene ikhontwaa, ukati unwaawe mwiici, uyo naahiya ikhontwannyo ni naatthawa, ni mwiici cinaatuphela ikhontwannyo ni nnyo cinaamwaryaana;
13 Uyo naatthawa kontha nanteko paasi ni khanwacera ikhontwannyo.
14 Mi kikhanle makampuci omaana, ni kinaacuwela ikhontwaa caka, ni ikhontwaa caka cinaakicuwela.
15 Khampa Apaapa cinkicuwelaaya ni miiva ciicammo kinaawaacuwela, ni miiva kinaaleva ukumyaaka wiira koopole ikhontwaa caka.
16 “Ni miiva kihaana ikhontwaa cikhwaawe, cihikhanle co nna ncicinna; ni ciicammo kinaahala utakanihera ni nnya, ni nnyo cinaahala wiiwelela ncu naka ni cinaahala ukhala nkupitti mmoca paasi, ni cinhala ukhalana makampuci mmoca paasi.
17 Phimaana, Apaapa ankifentaaya, kontha kinaavaha ukumyaaka, wiira kihale waakhela-tho.
18 Khaavo nokaakha ukumyaaka, masi miiva kinvaha woohikhanyererihiya ni ntthu. Kihaana isariya yooleva ukumyaaka ni isariya yowaakhela-tho. Commo, phikirumilyaaya Apaapa.
19 Vano, ayuuta yahanca uhiiwanana nlattu wo ala moolumwaala.
20 Atthu enci yeera: “Uyo haana nciini ni hovahuwa. Kontha isiyani nnonviriyaneenyu?”
21 Akhwaawe yeera: “Nnya citthunnya khacinonkhumakhuma ntthu rina nciini. Niireke wiira nciini pooti waavoniha atthu oohoona?”
22 Yooyo ukatyuuyo yahopankiya Ifesta Yoovahereriya Itempulu u Yerusalemu. Yaari iyiita,
23 ni Yesu eera eetteettaka utempulu, nipuro neehani Nipirothi na Salomau.
24 Vano, ayuuta yahonrukureerya ni yahomwiirela: “Ninhala wuutikhinaca mpaka mwaani? Wakhala wiira weeva u Kristu, unihimeerye ratta.”
25 Yesu ahaakhula eeraka: “Miiva kihoohimeeryani, masi nyuuva khankikupanli. Citthu cimpankaaka mwancina Naapaapa cinaavaha usaahiti.
26 Masi nyuuva khannokupali, kontha khannopanka mphantte wo ikhontwaa caka.
27 Ikhontwaa caka cinawiiwelela ncu naka; mi kinaacuwela ni nnyo cinaakitthara.
28 Mi kinaahala uvaha ikhontwaa caka ukumi woohimala, ni khaavo nohala ukhitiri utankanya, ni khaavo nohala ukaakha mmatatani waka.
29 Ikhontwaa Apaapa cikivahilyaaya, cikhanle cofayita cinene upwaha citthu cotheene, ni khaavo nohala ukhitiri ukumiha mmatatani Waapaapa.
30 Miiva ni Apaapa niri ninawaataana.*
31 Ayuuta, yaahottottaca-tho maluku wiira anvonyakace Yesu.
32 Vano, Yesu ahowiirela co: “Kihowooniherani miteko cinci cinkhuma Waapaapa. Vano ntekoni nyuuva nnopheeleenyu ukivonyakacera?”
33 Ayuuta yahomwaakhula yeeraka: “Hiiva khaninapheela wuuvonyakaca ni maluku nlattu woovara nteko womaana, masi nlattu wonveeha Nluku, kontha weeva uhookhalaru pinaatamu unawiipanka khampa nluku.”
34 Yesu ahowaakhula eeraka: “Khawantikhiye munlamuloni winyu: ‘Mi kiheera: “Nyuuva nkhanle anluku”’?
35 Vano wakhala wiira ale yantikheliye nuulumo na Nluku, aheehaniya anluku, ni cowantikhiya cowaarya khacinlamuliya waakakhanihiya.
36 Masi miiva kireerihiye ni kirumile ntuninyani ni Apaapa, nnokiirela: ‘Weeva uveeha’, nlattu miiva wowiira: ‘Kikhanle mwaana a Nluku’?
37 Wakhala wiira akinvara miteko Caapaapa, pooti uhikaamini.
38 Masi wakhala wiira kinaavara, hataa nhikaaminiki, nkupali citthu cimpankaaka, wiira ncuwele ni nkupali wiira mi ni Apaapa, ninawaataana sana-saana.
39 Vano, ayo atthwaayo yahomananiha-tho unvara Yesu wiira yantthuke, masi uyo ahokhuma nne nipuronne.
40 Ni Yesu ahokhuma-tho nne nipuronne ni ahorwaa mphantte nkhwaawe wo mooloko Jordau, nipuro Joau aapattisaawe atthu khalayi ni ahokhala wonwo.
41 Atthu enci, yahorwaa mpaka nipuro naaryaawe Yesu, ni yaheera: “Joau mpattisa khapankile hataa mwiiriirya mmoca, masi citthu cotheene cuulumilyaawe amwaacaka ula nlopwanoola. Caari ceekhweeli.”
42 Ni atthu enci yaari nne nipuronne yaahomwaamini.
Notas
^ Awula: “ninawiiwanana.”
