Ihapari Comaana Cantikhiye ni Joau 11:1-57
11 Ahaavo nlopwana mmoca aawerennya eehaniya Lazaru; uyo aakhala u Petaniya, aliteeya yaakhalaaya asirokorawe, Maria ni Marta.
2 Maria aari phiyoole aawoottihile makharura oonukhela a Pwiiya ni aawutacaka inyaa caya niikharari cawe; Lazaru, yooyo aawerennyooyo aari mwanrokorawe.
3 Phimaana, asirokorawe Lazaru yahoruma wiira ahimeriye Yesu co: “Pwiiya, yoole nnofentenyuule naawerennya.”
4 Masi Yesu wiiwa wawe iyo itthwiiyo, aheera: “Iyo iretteeyo khinhala umwiiva, masi inaahala wiiriha uttottopeliya Nluku ni ciicammo Mwaana a Pinaatamu, naahala uttottopeliya nlattu wo iyo iretteeyo.”
5 Yesu aanonfenta Marta, Maria ni Lazaru.
6 Masi, wiiwa wawe wiira Lazaru anwerennya, ahoviriha mahuku meeli hinakhuma ncoko waaryaawe.
7 Uvira waya mahuku meelyaayo, uyo aahowiirela attharyaawe co: “Nttwee nituruwele u Yuteya.”
8 Attharyaayo yaahomwiirela co: “Raapi, mahuku avinryaale, atthu o Yuteya yaapheela wuuvonnyakacani ni maluku, vano nnopheela uturuwela-tho wonwo?”
9 Yesu ahowaakhula eeraka: “Keera uthana urinaa iwoora 12? Ntthu eettaka uthana, khankakatthuwa, kontha nawoona nthuko ummwaleela ila ituninyeela.
10 Masi ntthu neetta uhiyu, naakakathuwa, kontha khuuvo nthuko unommwaleela.”
11 Umaliha wawe wuulumaca nyu citthunnyo, Yesu ahoolumaca-tho eeraka: “Mpatthaniihu Lazaru horupa, masi kinaahala urwaa wiira kanwuse.”
12 Vano, attharyaawe yaheera: “Pwiiya, wakhala wiira uyo naarupa, naahala wunwa.”
13 Yesu, aaca ukhwa wa Lazaru, masi attharyaawe yoopuwela wiira aaca urupa ikhove.
14 Vano, Yesu ahaahimerya sana-saana eeraka: “Lazaru hokhwa;
15 ni unaakitteela nrima nyuuva ucuwela wiira miiva nkaari wonwo, kontha itthu inhalaaka urwaa upanka, inaahala ulipiha waamini winyu. Vano, nttwee nirwee wonwo uryaawenwo.
16 Phimaana, Tomee, yooyo eehaniya nivatta, ahowiirela atthari akhwaawyaayo co: “Nttwee ni hiiva ciicammo, nakhwe nkhayi ni Yesu.”
17 Ukati Yesu waaphiilyaawe, aahohimeriya wiira yahovira mahuku macese Lazaru navithiyeene mmahiye.
18 U Petaaniya ni Yerusalemu, ittalivelwaaya caari ikiloometuru tthaaru paasi,
19 ni ayuuta enci yaahorwaa ummaliha Marta ni Maria nlattu wookhweliya nrokoraya.
20 Marta wiiwilyaawe wiira Yesu eera awaaka, ahokhuma wiira amoonanane; masi Maria aahanle nonkomile uwaani.
21 Marta ahomwiirela Yesu co: “Pwiiya unari wiira mwaari moomu, mwanrokoraka khaahala ukhwa.
22 Masi mi kinaacuwela wiira hataa nenna co, khula itthu inhaleenyu unlepela Nluku, Nluku naahala wuuvahani.”
23 Yesu aheera: “Nrokoraa naahala wunwelela.”
24 Marta ahaakhula eeraka: “Mi kinaacuwela wiira uyo naahala wunwelela, naphiyaka nihuku noomalela.”
25 Vano, Yesu ahomwiirela co: “Miiva kikhanle wunwelela ni ukumi. Ule nokaamini miiva, hataa akhwaaka, naahala uturuwela ukhala nkumi;
26 ni otheene ale ari akumi ni ankaamini, khanhala-tho ukhwa. Kiireke wiira weeva unaakupali iyo itthwiiyo?”
27 Marta ahomwaakhula Yesu eeraka: “Iyeeni Pwiiya, miiva kinawaamini wiira nyuuva nkhanle Kristu, mwaana Nluku, yoole weeriye wiira anhala uwa watuninyani.”
28 Umaliha wawe wuulumaca, Marta ahorwaa umwiihana Maria, mwaamunnawe, ni ahomwiirela mmwiitihoni co: “Mwiitthucihi howa ni naawiihana.”
29 Maria wiiwa wawe iyo itthwiiyo ahorwaa woohipica wiira amoonanane Yesu.
30 Yesu nanlelo aari hinakela mwaaliteeya, masi aari nenne nipuro naaphwanyiyaawe ni Marta nne.
31 Ayuuta yaawile uwannyawe Maria wiira ammaalihe, ukati waamoonilyaaya onwaka woohipica ni akhumaka, yahontthara, yoonihaka toko wiira aarwa umahiye wiira onle.
32 Maria uphiya wawe nipuro naaryaawe Yesu ni umoona wawe, ahokhoroma uhoolo wawe ni aheera: “Pwiiya, unari wiira mwaari moomu, mwanrokoraka khaahala ukhwa.”
33 Umoona wawe uyova ni ayuuta yanvelenle yonlaka, Yesu ahoriipiya nrima venci ni ahosanka.
34 Yesu ahokoha: “Vithiye vayi?” yahaakhula yeeraka: “Pwiiya nweeke uno mwaamooneke.”
35 Ni Yesu ahopacera wunla.
36 Vano, ayuuta umoona waya Yesu onlaka, yaheera: “Mmooneke, ule khweeliini aanonfenta!”
37 Masi ayuuta akhwaawe yeera: “Ula nlopwanoola honvoniha nlopwana ahoona, niireke khaalamuliya upanka itthu wiira Lazaru hikhwe?”
38 Vano, nariipiyeene nrima, Yesu ahorwaa umahiye. Khweeliini, naari nikhuku ni nahaavo nluku naattiyela nipuro naaviriya.
39 Yesu aheera: “Nikumihiye nlukunno.” Nankhweli Marta aheera: “Pwiiya, atthunaka uyo hopacera unukha, kontha ahovira mahuku macese nakhwileene.”
40 Yesu ahomwaakhula eeraka: “Mi akoohimenrye wiira, waminiki, wanhala woona uttitthima wa Nluku?”
41 Vano, nahokumihiya nlukunno. Yesu ahoweha wiirimu ni aheera: “Paapa, mi kinawuusukhuruni kontha nhokiiwa.
42 Khweeliini, mi kinaacuwela wiira ukati wotheene nnaakiviriyana, masi kuulumile nlattu waatthu kirinaakaala va, wiira yaamini wiira thi nyuuva nkirumile.”
43 Umaliha wawe wuulumaca nnya citthunnya, Yesu ahokhuwela cinene eeraka: “Lazaru, ukhumele vate!”
44 Nlopwana aakhwilyooyo, ahokhuma mmahiye nattukaciye inyaa cawe ni matataawe niikuwo* ni ciicammo navilinkeleliye uwiitho. Yesu aheera: “Muntthukulace ikuwonnyo ni munhiye arwee.”
45 Vano, ayuuta enci yaarwaale umootola Maria, woona waya itthu Yesu yaapankilyaawe yahomwaamini,
46 masi ayuuta akhwaawyaayo, yahorwaa waahimerya mafarisewu itthu Yesu yaapankilyaawe.
47 Vano, akhulupale aanankuttho ni mafariseu yahothukumaniha Isinedriyu yotheene ni yahokohana yiiraka: “Nipanke isiyani ukhala wiira uyo nlopwanooyo naapanka miiriirya cinci?
48 Nanhiyereraka apankaka nnyo citthunnyo, atthu otheene anaahala umwaamini, ni arooma anaahala unaakha nipuro nihu* ni apoovweehu.”
49 Phimaana, nlopwana mmoca eehaniya Kayifasi, aari nankuttho muulupale ule mwaakhoole, aheera co: “Nyuuva khannocuwela itthu,
50 ni hataa khamuupuwenle wiira mwanhala umphwanyera ifayita nlopwana mmoca akhwaaka wiira awoopole apoovu, uhiya apoovu otheene urwaa utankanyiya.”
51 Masi, uyo khoolumacile moolumo yaakhuma wanrimani wawe, oolumacile ayo moolumwaayo kontha aari nankuttho muulupale ule mwaakhoole, masi aanaaca uhimyaca khalayiiru wiira Yesu anhala ukhwa wiira awoopole ayuuta,
52 masi khahi ayuuta paasi, ciicammo wiira aathukumanihe asaana a Nluku yaamwaryenle mapuro menci.
53 Vano, ukhuma nenne nihukunne, yaholeehana wiira amwiive.
54 Phimaana, Yesu aaneevithavitha wiira hooniye ni ayuuta, masi ahokuma ncoko waaryaawe ni ahorwaa ncoko waattamenle muuthakoni, isittatti yeehaniya Efrayimi ni ahokhala wonwo wamoca naattharyaawe.
55 Vano, ahaattamela Paasikuwa aayuuta, ni ayuuta enci yaakhala waaliteeya, yahorwaa u Yerusalemu nihinaaya uphiya nihuku nopaasikuwa, wiire yeereerihe khampa naahimyaaya nlamulo na Moocesi.
56 Ayo yaamwaavya Yesu, ni yankohakohana ntempulu ayaayoru, yeeraka: “Nnoonela cani? Niireke wiira uyo naahala uwa va wafestani va?”
57 Masi akhulupale aanankuttho ni o mafariseu yaahoruma wiira ntthu aahala umoona Yesu, aahimeerye, wiira arwee yantthuke.
