Ihapari Comaana Cantikhiye ni Joau 12:1-50
12 Yahaleelaka mahuku 12 wiira niphiye nihuku no Paasikuwa, Yesu aahorwaa u Petaaniya, aliteeya yaakhalaawe Laazaru nlopwana aamunwelelihilyaawe.
2 Ni aahaapyeeliya iyoolya yoohiyu; ni Marta haapyeele iyo iyoolyeeyo, ni Laazaru aari nkhayi naatthu yaalya* ni Yesu.
3 Vano, Maria ahocisa makhura oonukhela, ookhalaka imeyu yo iliituru,* yaapankiye ni nartu, oohitakaniheyiya itthu, onsurukhu mwiinci; vano aheetthela nnyaani ca Yesu ni aahowutaca niikharari cawe. Vano, mpaani motheene waahomwaryeela unukhela wo ayo makhuraayo.
4 Masi mwiitthuci mmoca a Yesu Kristu eehaniya Yuuta Iskariyote, aapheela untumiha, aheera:
5 “Kontha isiyani ahitumihiyaaya ala makhura oonukhelaala itenaariyu 300 ni uyo nsurukhuuyo avahiyaka amasikhini?”
6 Yuuta Iskariyote oolumacile commo kahi wiira nlattu aanaawacera amasikhini, masi nlattu wiira uyo aari latarawu; uyo phaasunkaka ikoofiri yonsurukhwiiyo ni aanennyasaka nsurukhuuyo.
7 Vano Yesu aheera co: “Munhiye upanka iyo itthwiiyo nenna co, wiira atthenkace uvithiya waka.
8 Kontha nyuuva nnawaakhalana amasikhini ikhumelo yokhalayi, masi miiva, khannohala ukikhalana mahuku otheene.”
9 Vano, ayuuta enci ucuwela waya wiira Yesu aari u Petaaniya, ayo yaholakela urwaa, kahi wiira yamoone Yesu paahi, masi wiira yamoone Lazaru, ule onwelelihiye ni Yesu.
10 Ahooleli aanankuttho ciicammo yaaholeehana umwiiva Lazaru,
11 ukhala wiira ayuuta enci yanrwaa u Petaaniya wiira yamoone Lazaru ni yamwaamini Yesu.
12 Waasele waya, atthu enci yaarweele ufestani yaahocuwela wiira Yesu eera awaaka u Yerusalemu.
13 Vano, ayo yaahocisa makutthi ni yaahonsikamela Yesu, ni yahopacera ukhuwela yiiraka: “Sontte mmoopole! Ooreeriya phuule nowa mwancina na Yehova! Ooreeriya khanle Mwene o Isarayeli!”
14 Yesu ahomoona puuru mwankaani ni ahonwela, khampa cantikhiyaaya:
15 “Uhoove, mwaana mwanthiyana o Siyau. Wooneke! Mwennyaa neera awaaka, nanwenle puuru mwankaani.”
16 Wiipaceroni, eetthuci a Yesu khayaacuwelenle nlattuni wiirannyaaya nnyo citthunnyo, masi, Yesu uttitthimihiya wawe, ayo yaahoopuwela wiira citthu campankenlyaaya, caahantikhiya wiira canhala umwiirannyeela.
17 Atthu yaarivo ukati Yesu aamunwelelihilyaawe Lazaru, amwiihanaka wiira akhume mmahiye, yaanaahimyeera atthu akhwaawe wiira iyo itthwiiyo khweeliini yaaheerannya.
18 Phimaana atthu enci wansikamenlyaaya, kontha yaahowiiwa wiira hopanka uyo mwiiriiryooyo.
19 Phimaana, mafariseu yaaneerelana co: “Unawoonannya wiira khaninkhitiri upanka itthu. Mooneke, atthu otheene anontthara yooyo!”
20 Wafestani, yaahaavo ciicammo akereeku yaarweele unswalela Nluku.
21 Ayo yahorwaa mpaka nipuro naaryaawe Filipe, aari o Petesaayita ncoko wo Kalileeya ni yaahonlepela yiiraka: “Pwiiya, nampheela umoona Yesu.”
22 Filipe ahorwaa unhimyera Antere iyo itthwiiyo, vano, Antere ni Filipe yaahorwaa umuulumana Yesu.
23 Masi Yesu ahowaakhula awiirelaka co: “Uhophiya ukati wiira Mwaana a Pinaatamu attitthimihiye.
24 Kinoohimyeerani ikhweeli wiira: Wakhalaka wiira itthaka yotiriku inaamorela watthayani ni woohikhwa, iyo khinhala uhiya ukhala itthaka; masi wakhalaka wiira inaakhwa, iyo inaahala wiimiha mihokorokho cinci.
25 Ntthu nofenta ukumyaawe, naahala wiiriha umalamalihiya uyo ukumyuuyo, masi ule unonrusa ukumyaawe ila ituninyeela, naahala ukhikicera wiira aphwanye ukumi woohimala.
26 Ntthu apheelaka ukivarela nteko, akitthare! Ni nipuro kinhalaaka ukhala, nno nipuronno naahala ukhala ule nokivarela nteko. Ntthu apheelaka ukivarela nteko, Apaapa anaahala unttitthimiha.
27 Vano mi kihosanka, kinhala wuulumani? Paapa, nkoopole ula ukatyuula. Masi, ila phaawenlyaaka.
28 Paapa, nttitthimihe ncina ninyu.” Vano, naaheewannya ncu naakhuma wiirimu neeraka: “Mi kihottitthimiha ncina naka ni kinaahala uturuwela uttitthimiha.”
29 Atthu yaarivo nno nipuronno yaaheewa ayo moolumwaayo ni yaahopacera wiira irumilee itari. Akinaayo yeera: Nlayikha phimuulumanne.”
30 Yesu ahowaakhula eeraka co: “Nno ncunno khaniwile nlattu waawaka, masi niwile nlattu wawinyu.
31 Vano uhophiya ukati woohukhumwiya ila ituninyeela; vano naahala woomoliya nhooleli o ila ituninyeela.
32 Masi, ukati unhalaaka weemesiya watuninyani, kinaahala uwiiriha atthu okhapila cotheene uwa nipuro kiryaaka.”
33 Yesu oolumacile commo wiira ahimyace mananna caahalaawe wiiviya.
34 Vano atthwaayo yaahomwaakhula yeeraka co: “Niheewa munlamuloni wiira Kristu khanhala ukhwa. Vano nlattuni weeva uneera wiira Mwaana a Pinaatamu haana eemesiyaka ila ituninyeela? Tipani yooyo Mwaana a Pinaatamu ummuulumooyo.”
35 Vano Yesu ahowiirela co: “Iluusu inhala ukhala ni nyuuva, ukati vakaani paahi. Mweette nna vaa irivwaaya iluusu, wiira ipiphi ihuuphwanyeni; kontha ule neetta wapiphini khancuwela unrwaawe.
36 Ula ukati urivwaaya iluusu, mwaamini iyo iluuswiiyo, wiira nkhale asaana o iluusu.”
Yesu waahimyeera wawe nnyo citthunnyo, ahokhuma nno nipuronno ni aheepitha.
37 Uhookhalaru wiira uyo ampanka miiriirya cinci uhoolo waya, ayo khayaamwaamini.
38 Wiira yiirannye moolumo a porofeeta Isaiya enre: “Yehova, tipani aaminni ile nuulumileehu? Ni tipani himeriye ikuru ca Yehova?”
39 Isaiya ciicammo aahohimyaca itthu yaahala uwiiriha uhimwaamini eeraka:
40 “Uyo hotthuka miithwaaya ni holipiha mirima caya, wiira ahoone ni aheese wanrimani waya itthu kinaahimyeraaka ni yarukunusaka makhalelwaaya wiira kaavonihe.
41 Isaiya oolumacile commo, kontha aahoona uttitthima wawe ni aahomuuluma.
42 Uhookhalaru commo, maliiteri ayuuta yammwaamini, masi nlattu wo mafarisewu ayo khayaahimya-himya kontha yaanoova woomoliya nsinakooka.
43 Kontha waanaacivela cinene uttitthimihiya naatthu uvikana uttitthimihiya ni Nluku.
44 Masi Yesu aahokhuwela venci eeraka: “Ule nokaamini, khankaamini miiva paahi, masi ciicammo ule kiveleelihile.
45 Ni ntthu nokoona, naamoona ciicammo ule kiveleelihile.
46 Mi kihowa mu ntuninyani mu toko iluusu, wiira atthu otheene anhala ukaamini akhume mpiphini.
47 Masi, ntthu noviriyana moolumwaaka masi hineetela mi akinonhukhumu; kontha akaawile uhukhumu ituninya, masi woopola.
48 Ule hinwacera ni hinkupali moolumwaaka haavo ntthu nohala unhukhumu. Nuulumo kilalyenryaaka thinhala unhukhumu nihuku noomalela.
49 Kontha akuulumile citthu cinkhuma mmuru waka, masi ca Apaapa akirumile, ayo phikihimyenre itthu inlamuliyaaka uhimya ni wuuluma.
50 Ni mi kinaacuwela wiira citthu Apaapa cikihimyenryaaya cinaaphwanyiha ukumi woohimala. Phimaana citthu cotheene kinoolumaaka, kinooluma khampa Apaapa cikihimyenryaaya.”
Notas
^ Awula: “yaaphitenrye meeca.”
^ Awula: “iliipara imoca.” Iyo maanaaya, iliipira imoca yaarooma, yaakhalana ikaraama cookhalaka 327.
