Ihapari Comaana Cantikhiye ni Joau 13:1-38
13 Nihinaaya uphiya nihuku no Paasikuwa, Yesu ancuwela wiira wahophiya ukati woohiya ila ituninyeela ni urwaa Waathumwaane. Vano, ukhala wiira aanaafenta eetthucyaawe yaari mu ntuninyani mu, uyo ahaafenta mpaka wuumaleloni.
2 Ukati waalyaaya, Tiyapu aheesa wanrimani wa Yuuta Iskariyoti aari mwaana a Simau, ankhili oopheela utumiha Yesu.
3 Yesu ancuwela wiira Athumwaane ahonvaha citthu cotheene ni ancuwela wiira aakhuma wa Nluku ni aarwaa wa Nluku;
4 Yesu ahonwa nipuro nonkomilyaawe ni ahorula ikuwo yoovate yaawanryaawe. Ahocisa itowalya ni ahiitthukelela nnyuununi wawe.
5 Vano, ahohela maaci mpasiyani ni ahancera uvululaca inyaa caattharyaawe ni uvutaca nitowaalya yiitthukelenlyaawe nnyuununi wawe.
6 Uphiya wawe wa Peturu, Peturu ahonkoha eeraka: “Pwiiya, nnopheela uvululaca inyaa caka?”
7 Yesu ahaakhula eeraka: “Itthu impankaakeela va, khunhala ucuwelela phiyaaru, masi wahoolo unaahala ucuwelela maanaaya isiyani.”
8 Peturu aaheera: “Nyuuva pooti ihimiye khannohala uvululaca inyaa caka.” Yesu ahaakhula eeraka: “Kaahivululaceke inyaa caa, weeva khuri wamoca ni miiva.”
9 Simau Peturu ahaakhula eeraka: “Pwiiya, wakhala commo nhivululace inyaa caka paasi, masi ciicammo matataaka ni murwaaka.”
10 Yesu aheera: “Ntthu rapile ri ooreereene mwiirutthuni wawe ni khampheela urapa-tho, uhikhanle uvululaca inyaa cawe. Ni nyuuva nri ooreereene, masi kahi otheene cinyu.”
11 Kontha uyo ancuwela thipani aahala untumiha. Phimaana wenryaawe co: “Kahi otheene cinyu nri ooreereene.”
12 Vano, umaliha wawe waavululaca ni uwara wawe ikuwo yoovate, uyo ahoturuwela wonkoma ni ahaakoha co: “Nhocuwelela maanaaya isiyani itthu yuupankilyaakani?
13 Nyuuva mwaatthi nnokiihanaa miiva ‘Mwiitthucihi ni Pwiiya’, ni khannavonya itthu.
14 Vano, wakhala wiira mi kikhanle Pwiiyeenyu ni mwiitthucihiinyu, kihovululaca inyaa cinyu, nyuuva ciicammo nhaana uvululaca inyaa caakhwiinyu.
15 Kontha mi kihoothoonyiherani mananna oopheela upanka, wiira toko miiva cipankilyaaka ni nyuuva mwaapanke akhunaninyu.
16 Kinoohimeeryani ikhweeli wiira: Nanteko kharina ukhulukupale waapwaha apwiiyaawe, ni hataa ule norumiya kharina ukhulupale umpwaha ule nrumile.
17 Wakhala wiira nnaacuwela nnya citthunnya, nnaahala ukhala ootteeliya mweettelaka vale.
18 Akinawaacakani otheene winyu, mi kinawaacuwela ale yaathanlilyaaka. Masi ukhanle commo, wiira yiirannye moolumo amphwanyannya nhina cowantikhiya cowaarya cineera: ‘Ule aalya wamoca ni miiva hokirukunuwela.’
19 Kinoohimeeryani iyo itthwiiyo ihinaaya wiirannya, wiira ukati unhalaaya wiirannya, nyuuva mwaatthi nkaamini.
20 Kinoohimeeryani ikhweeli wiira: Ule nomwaakhelela ntthu kinonveleelihaaka, ciicammo naakaakhelela miiva, ni ule nokaakhelela miiva, ciicammo naamwaakhelela ule kirumile.”
21 Wulumaca wawe nnyo citthunnyo, Yesu ahoriipiya nrima cinene ni aheera: “Kinoohimeeryani ikhweeli wiira: Mmoca-mmoca va, naahala ukivariiha.”
22 Eetthuci yahopacera uwehana, woohincuwela tipani aamwaacaawe.
23 Mwiitthuci mmoca a Yesu aatepaawe unfenta, unkomile wakhiviru ni Yesu.
24 Vano, Simau Peturu ahonttikhinyera muru uyo mwiitthucyuuyo ni ahomwiirela: “Nkanihimerye ntthu nomwaacaawyooyo.”
25 Vano, uyo ahophiteerya ikhakaca ya Yesu ni ahonkoha: “Pwiiya, tipani yooyo?”
26 Yesu ahomwaakhula eeraka: “Ule kinhalaaka unvaha iphaawu kinreryaaka ntigelani. Vano, urerya wawe iphawiiyo, ahonvaha Yuuta, mwaana a Simau Iskariyoti.
27 Yuta waakhelela wawe ipetaasu yophaawiiyo, ahonkela Sotwani. Vano Yesu ahomwiirela: “Itthu impankeeyo, upanke woohipica.”
28 Masi atthu otheene yaaphitenrye meecaayo, khaavo aacuwelenle nlattuni wenryaawe commo.
29 Khweeliini, ukhala wiira Yuuta phaasunka ikoofiri yonsurukhu, eetthuci akhwaawe yooniha toko Yesu aamwiirela co: “Uthume citthu cimpheeleehu wafestani,” awula ihaavo itthu yaalamuliyaawe waavaha amasikhini.
30 Vano, waakhelela wawe ipetaasu yophaawiiyo, woohipica uyo ahokhuma. Waari uhiyu.
31 Vano, Yuuta ukhuma wawe nno nipuronno, Yesu aheera: “Vano Mwaana a Pinaatamu naattitthimihiya, ni Nluku naattitthimihiya nlattu waawawe.
32 Mwaneene Nluku naahala unttitthimiha, ni naahala unttitthimiha woohipica.
33 Asaanaaka, kinaahala ukhala-tho ni nyuuva ukati vakaani. Nyuuva nnaahala ukaavya, ni khampa kaahimenryaaka ayuuta, ni nyuuva ciicammo kinawuuhimeryani: ‘Nipuro kinrwaaka, nyuuva khannohala ukhitiri uphiya.’
34 Kinawuuvahani nlamulo nonaanaano: Nfentane, khampa miiva cuufentilyaakani, nyuuva ciicammo nfentane.
35 Mwafentanaka, atthu otheene anaahala ucuwela wiira nyuuva nkhanle eetthucyaaka.”
36 Simau Peturu aheera: “Pwiiya, nnorwaa vayi?” Yesu ahaakhula eeraka: “Nipuro kinrwaaka weeva khunlamuliya ukitthara nenna co, masi unaahala ukitthara wahoolo.”
37 Peturu ahomwiirela: “Pwiiya, nlattuni wahinlamuliyaaka wuuttharani nenna co? Mi kinaakupali uleva ukumyaaka nlattu wawinyu.”
38 Yesu ahomwaakhula: “Unaakupali uleva ukumyaa nlattu wawaka? Kinoohimeerya ikhweeli wiira: Unaahala ukikhotta imaara tthaaru, nthupi hinaaya wiipa.”
