Ihapari Comaana Cantikhiye ni Joau 14:1-31
14 “Nhiriipiye nrima. Moonihere umwaamini Nluku; ni moonihere ukaamini miiva ciicammo.
2 Waapaapa ahaavo mapuro menci ookhala. Yahaarivo, mi kaanoohimyeerani, kontha kinrwaa wonwo wiira kuutthenkacereni mapuro.
3 Karwaaka ni kuutthenkacerakani mapuro, kinaahala uwaa-tho ni wuukusani, wiira nipuro ninhalaaka ukhala nyuuva ciicammo nkhale vaa va.
4 Ni nyuuva nnaacuwela iphiro miiva kinrwaaka.”
5 Vano, Tomee ahomwiirela: “Pwiiya, khanincuwela nipuro nnorweenyu. Vano ninhala ucuwela cani nttalooyo?
6 Yesu ahomwaakhula eeraka co: “Mi kikhanle nttala, ikhweeli ni ukumi. Khaavo nowa Waapaapa uhikhanle nlattu waawaka.
7 Mwaakicuwela, mwaanaacuwela ciicammo Apaapa. Ukhuma nenna co, nyuuva nnawaacuwela ni nnaawoonaka.”
8 Filipe ahomwiirela co: “Pwiiya, nnoonihere Apaapa paahi, iyo inaahala unitosa.”
9 Yesu ahomwaakhula eeraka co: “Ikhumelo yokhalayi kiri ni nyuuva, vano mpaka nna co Filipe khunkicuwela? Ule nokoona, naawoona ciicammo Apaapa. Vano weeva uneerelani: “Nnoonihere Apaapa?
10 Khunkupali wiira miiva ni Apaapa ninawaataana sana-saana? Itthu kinoohimyeeryaakani khinkuma mmuru waka, masi Waapaapa ahinhiyerera waataana ni miiva, anvara miteko Caya.
11 Nkaamini kawiirelakani wiira mi ni Apaapa ninawaataana sana-saana; awula mwaamini nlattu wo miteko cinvaraaka.
12 Kinoohimyeerani ikhweeli wiira: Ule noonihera ukaamini, naahala uvara ciicammo miteko kinvaraaka. Ni uyo naahala uvara miteko cuulupale upwaha nnya, kontha mi kinrwaa Waapaapa.
13 Ciicammo, citthu cotheene nnohaleenyu ulepela mwancina naka, mi kinaahala wuupankelani wiira Apaapa attitthimihiye nlattu wo mwanaya.
14 Citthu cotheene nnohaleenyu ulepela mwancina naka, mi kinaahala wuupankelani.
15 “Wakhala wiira nyuuva nnaakifenta, nnaahala wiiwelela malamulwaaka.
16 Ni mi kinaahala waalepela Apaapa, ni ayo anaahala wuuvahani namakavihera nkhwaawe wiira akhale ni nyuuva mpaka:
17 Nnepa weekhweeli, uhinlamuliyaaya waakhela atthu ontuninyani kontha khaanoona hataa khancuwela. Nyuuva nnaacuwela, kontha uri ni nyuuva ni unhala ukhala ni nyuuva.
18 Akinhala wuuhiyani veekha. Mi kinawuuturuwelani.
19 Woohipica, atthu ontuninyani khanhala ukoona-tho, masi nyuuva nnaahala ukoona, kontha mi kinaakhala ni nyuuva nnaahala ukhala.
20 Nenno nihukunno, nyuuva nnaahala ucuwela wiira mi kinaawaataanana Apaapa ni nyuuva nnaakaataanana ni mi kinaawaataananani nyuuva.
21 Ule nokupali malamulwaaka ni neettela, phinoonihera ukifenta. Ni ule nokifenta naahala ufentiya ni Apaapa, ni mi kinaahala unfenta ni kinaahala umwiiriha ukicuwela sana-saana.”
22 Yuuta nkhwaawe, kahi Yuuta Iskariyote ahonkoha co: “Pwiiya, kontha isiyani nnopheeleenyu uniiriha wuucuwelani sana-saana hiiva paahi, uhiya atthu otheene?”
23 Yesu ahomwaakhula eeraka co: “Ntthu akifentaka naahala weettela moolumwaaka, ni Apaapa anaahala unfenta, hiiva ninaahala urwaa mpaka nipuro niryaawe ni ninaahala ukhala nkhayi nuuyo.
24 Ule hinkifenta khaneettela moolumwaaka. Moolumo ankiiwaa khaanakhala aawaka, masi akhanle Apaapa akirumile.
25 “Kinoohimyeerani nnya citthunnya kihinarwaa.
26 Masi namakavihera, ukhanle nnepa wowaarya, Apaapa anhalaaya wuuveleeliherani mwancina naka, unaahala uwiitthucihani citthu cotheene ni uwuupuserani citthu cotheene kuuhimyenryaakani.
27 Kinoohiyerani nnema, kinoovahani nnema naka. Akinoovahani toko atthu ontuninyani anvahaaya. Nhisanke, hataa nhoove.
28 Nhiiwa kuuhimenryaakani: ‘Mi kinaarwaa ni kinaahala wuuturuwelani’ Mwaakifenta wanhala wuutteelani nrima nlattu woocuwela wiira kinrwaa Waapaapa, kontha Apaapa akhanle oolupale ukipwaha miiva.
29 Kuuhimyenreni nnya citthunnya cihinaaya wiirannya, wiira nkupali ceerannyaaka.
30 Akinhala uwuulumani-tho venci, kontha nhooleli o ila ituninyeela hophiya, ni uyo kharina ikuru ukipwaha miiva.
31 Masi, wiira atthu ontuninyani acuwele wiira mi kinawaafenta Apaapa, kinaapanka khampa Apaapa cikirumilyaaya. Munwace nttwee, nikhume nna nipuronna.