Ihapari Comaana Cantikhiye ni Joau 15:1-27
15 Mi kikhanle mwiri wo uva weekhweeli, ni Apaapa phinlimela.
2 Anaakikumihaca miritta cihineema mihokorokho cotheene, ni anaawacera miritta cineema mihokorokho, wiira citepe wiima-tho mihokorokho.
3 Nyuuva nkhanle miritta coowaceriyeene, nlattu wo nuulumo koohimenryaaka.
4 Nhihiyerere ukaataanana, ni miiva akinhala uhiyerera uwaataananani nyuuva. Toko iritta ihineemaaya mihokorokho veekhayaaru uhikhanle mmwirini wo uva, nyuuva ciicammo khannohala ukhitiri wiimiha mihokorokho uhikhanle wiira nnaakaataanana.
5 Miiva kikhanle mwiri wo uva, nyuuva nkhanle miritta. Ule hinhiyerera ukaataanana ni miiva kiinaahala umwaataanana, nawiima mihokorokho cinci, kontha mwaahikaataananeke, nyuuva khannohala ukhitiri upanka itthu.
6 Ntthu aahikaataananeke, uyo naarihiya khampa nritta ni nawuuma. Nnyo mirittannyo cinaathukumanihiya, cinaavonyeriya wamooroni ni cinaavya.
7 Nyuuva mwaahihiyerereke ukaataanana ni wiiwelela moolumwaaka, nlepele impheeleenyu ni iyo itthwiiyo nnaahala uvahiya.
8 Iyo inawaattitthimiha Apaapa: Nhihiyerere wiima mihokorokho ni moonihere wiira nkhanle eetthucyaaka.
9 Khampa Apaapa cinkifentaaya ni miiva ciicammo kinawuufentani nyuuva; nhihiyerere wiiwelela, wiira kihihiyerere wuufentani.
10 Ni nyuuva mwiiwelelaka malamulwaaka, akinhala uhiyerera wuufentani, khampa miiva kiniiwelelaaka malamulo Apaapa ni ahinhiyereraaya ukifenta.
11 Mi kuuhimenryenhi nnya citthunnya, wiira nyuuva ntteeliye khampa miiva, ni mphwanye utteeliya venci.
12 Nna phinlamulo naka: Nfentane, khampa mi coofentilyaakani.
13 Khaavo rina nifento ninci, umpwaha ule noleva ukumyaawe wiira awoopole apatthannyaawe.
14 Nyuuva nnaakhala apatthannyaaka mwapankaka itthu inoorumaakani.
15 Akinwiihanani-tho anantekwaaka*, kontha nanteko khancuwela itthu apwiiyaawe impankaaya. Masi mi kinwiihanani apatthannyaaka, kontha kihoohimeeryani citthu cotheene cikihimenryaaya Apaapa .
16 Nyuuva khankithanlile mi, masi thi mi kuuthanlileni nyuuva, ni kihuurumani wiira nrwee ni nhihiyerere wiima mihokorokho, mihokorokho cihimmala, wiira itthu piitthu inhaleenyu waalepela Apaapa mwancina naka, ayo yuuvaheni.
17 “Mi kinuurumani nnya citthunnya wiira nfentane.
18 Yakhala wiira atthu ontuninyani anawuuthanyani, nyuuva nnaacuwela wiira ayo apacenre ukithanya miiva ahinuuthanyani nyuuva.
19 Unari wiira nyuuva nri toko atthu ontuninyani, atthu ontuninyani yanhala wuufentani. Vano, ukhala wiira nyuuva khanri toko atthu ontuninyani, masi mi kuthanlileni ntuninyani, phimaana, atthu ontuninyani anawuuthanyani.
20 Nhiliyale moolumo kuuhimenryaakani: ‘Nanteko khanompwaha pwiiyaawe.’ Wakhala wiira mi kiholupatthiya ni nyuuva ciicammo nnaahala ulupatthiya; wakhala wiira ahiiweleliya* moolumwaaka, moolumweenyu ciicammo anaahala wiiweleliya.
21 Masi anhala wuupankani nnya citthunnya nlattu woncina naka, kontha khaanoncuwela ule kirumile.
22 Wiiriyaka akaawile uwuulumana, khayaahala uvara itampi. Masi nna va, ayo khaarina itthu yowoothereriha itampi caya.
23 Ule nokithanya, ciicammo nawaathanya Apaapa.
24 Unari wiira akaapankile citthu hinatokwaawe upanka ntthu nkhwaawe, khayaahala uvara itampi; masi ayo ahoona, ahokithanya miiva ni ciicammo Apaapa.
25 Iyo ikhumelenle commo wiira yiirannye itthu yantikhiye munlamuloni waya: ‘Ahokithanya woohisariya.’
26 Ukati unhalaawe uwa namakavihera kinhalaaka unveleeliha nokhuma Waapaapa owiirimu, ukhanle nnepa uncuweliha ikhweeli, unkhuma Waapaapa, unaahala uvaha usaahityaaka;
27 ni nyuuva nnaahala waakavihera atthu akhwaawe ukicuwela, kontha ikhumelo wiipaceroni mwaari ni miiva.
