Ihapari Comaana Cantikhiye ni Joau 16:1-33
16 “Mi kuuhimenryeni nnya citthunnya wiira nhikakathuwe.
2 Atthu anaahala uwoomolani mmasinakooka. Khweeliini, unaahala uphiya ukati ntthu nohala uwiivani nohalaawe wooniha toko nonvarela nteko Nluku.
3 Masi ayo anhala upanka iyo itthwiiyo, nlattu woohikicuwela miiva ni hataa woohaacuwela Apaapa.
4 Mi kuuhimyenreni nnya citthunnya wiira waphiyaka ukati unhalaaya wiirannya, nyuuva muupuwele wiira kahuhimeeryani.
“Mi akuuhimenryeni nnya citthunnya wiipaceroni, kontha miiva kaari ni nyuuva.
5 Masi nna va kinrwaa nipuro ryaawe ule kirumile; uhookhalaru commo nyuuva khannokikoha wiira: ‘Nnorwaa vayi Pwiiya?’
6 Uhiya commo, nhowiira uriipiya nrima nlattu wo wuuhimeeryani nnya citthunnya.
7 Masi, mi kinoohimyeerani ikhweeli wiira: Kinrwaa, wiira mphwanyere ifayita. Kontha mi kaahirweeke nnepa wowaaryooyo khunhala uwa; masi, mi karwaaka kinaahala wuuveleeliherani nnepa wowaaryooyo.
8 Ni nnepa wowaarya wawaaka unaahala woonihera sana-saana wiira atthu ontuninyani ahovara itampi, wiira mi kaapanka citthu cosariya ni unaahala uwoonihera atthu, Nluku naahukhumwaawe:
9 Yoopacera unaahala woonihera wiira ahovara itampi kontha khayoonihenre ukaamini;
10 yonayeeli unaahala woonihera wiira kaavara citthu cosariya kontha mi kinrwaa Waapaapa ni nyuuva khannohala ukoona-tho;
11 Vano, unaahala uwoonihera atthu Nluku naahukhumwaawe kontha nhooleli o ila ituninyeela hohukhumwiya.
12 “Nanlelo kihaana citthu cinci cowuuhimeeryani, masi nna vaa nyuuva khannohala ukhitiri uhela citthu cotheene mmuru.
13 Masi, awaaka namaakaviherooyo, ukhanle nnepa uncuweliha ikhweeli, unaahala wuucuwelihani ikhweeli, kontha khanhala wuuluma citthu cinkhuma mmuru wawe, masi nohala wuuluma citthu nohalaawe wiiwa wa Nluku ni naahala wuuhimyeerani citthu cinhala wiirannya uhoolo.
14 Uyo namakaviherooyo naahala ukittitthimiha, kontha nohala wuuhimyerani itthu ikiiwilyaawe.
15 Citthu cotheene ca Apaapa cikhanle caawaka. Phimaana, kiwiirenlyaakani wiira nohala wuuhimyeerani citthu cikiiwilyaawe.
16 Woohipica, nyuuva khannohala ukoona-tho; ni ciicammo woohipica nyuuva nnahala ukoona.”
17 Nlattu wo ayo moolumwaayo, eetthuci akhwaawe yahopacera ukohana: “Isiyani impheelaawe uhimya eeraka: ‘Woohipica khannohala ukoona; ni ciicammo woohipica nnahala ukoona’ ni ‘kontha kinrwaa Waapaapa’?”
18 Ayo yeera: “Isiyani impheelaawe uhimya eeraka: ‘Woohipica?’ Khanincuwela itthu impheelaawe uhimya.”
19 Yesu ancuwela wiira ayo yaapheela unkohakoha, phimaana, ahowiirela: “Nyuuva nnaakohana itthu impheelaaka uhimya, wiira waka: ‘Woohipica nyuuva khannohala ukoona; ni woohipica nnaahala ukoona’?
20 Kinoohimyeerani ikhweeli wiira: Nyuuva nnaahala wunla ni nnaahala ucukulaca, masi atthu ontuninyani unaahala waatteela nrima; nyuuva nnaahala uriipiya nrima; masi uriipiya winyu nrima unaahala urukunusiya wiira ukhale utteeliya winyu nrima.
21 Athiyana waphiyaka ukati wooyara, ayo anaahuva-huva, kontha uhophiya ukatyaaya; masi, yanyaraka mwanayooyo ayo khanoopuwela uhuvahuva waarinaaya, ankhala ootteeliya nlattu woocuwela wiira howa pinaatamu ntuninyani.
22 Inanna imocaaru, nnaco nyuuva nri ooriipiya nrima; masi mi kinaahala uwoonani-tho ni nnaahala utteeliya nrima, ni utteeliya winyu khaavo nohala umalamaliha-tho.
23 Nno nihukunno, nyuuva khannohala ukikoha hataa itthu. Kinoohimyeerani ikhweeli wiira: Itthu phiitthu nnohaleenyu waalepela Apaapa mwancina naka, ayo anaahala wuuvahani.
24 Mpaka nna co nyuuva khannalepela hataa itthu mwancina naka. Nlepele ni nnaahala uvahiya, wiira ntepe utteeliya nrima.
25 “Mi kuuhimenryeni nnya citthunnya ni malattanihero, masi unaahala uphiya ukati kinhalaaka wuuhimyeerani sana-saana myaha ca Apaapa woohimalattanihero.
26 Nno nihukunno nnaahala waalepela Apaapa mwancina naka. Kahi kineera wiira kinaahala wuulepelelani.
27 Kontha Apaapaayo anawuufentani, ukhala wiira nyuuva nnaakifenta ni nnaakupali wiira ayo phikiveleelihile.
28 Kiveleelihiye ni Apaapa ni kihowa mu ntuninyani mu. Vano, kinaakhuma ila ituninyeela ni kinaaturuwela Waapaapa.”
29 Vano, attharyaawe yaheera: “Vano ninawiiweeha itthu nnohimyeenyu ukhala wiira khannooluma nimalattanihero.
30 Vano, nihoona wiira nyuuva nnaacuwela citthu cotheene ni pooti wahinkohakohiyeenyu. Phimaana, ninaakupali wiira nyuuva nnokhuma wa Nluku.”
31 Yesu ahowaakhula eeraka: “Vano nnawaamini?
32 Nkiviriyane: Unaahala uphiya ukati ni khweeliini uyo ukatyuuyo uhophiya nnohaleenyu umwarusiya, khula ntthu naahala urwaa uwannyawe, ni naahala ukihiya veekha. Masi mi akiri veekha, kontha Apaapa ari miiva.
33 Mi kuuhimenryeni nnya citthunnya wiira, nlattu wawaka, nyuuva nkhalane nnema. Ntuninyani nyuuva nnaahala waanana masakha, masi nlipe nrima! Mi kihotthema ituninya.”
