Ihapari Comaana Cantikhiye ni Joau 17:1-26
17 Yesu ahooluma nnya citthunnya ni ahoweha wiirimu, aholompa eeraka: “Paapa, uhophiya ukati. Munttitthimihe mwaninyu, wiira mwaninyu oottitthimiheni,
2 khampa munvahileenyu ukhulupale uhoolo waatthu otheene, wiira aavahe ukumi woohimala atthu otheene munvahileenyu.
3 Wiira ayo aphwanye ukumi woohimala: Ahaana yoocuwelakani nyuuva nkhanle Nluku eekhweeli ni ule munvelelihileenyu, Yesu Kristu.
4 Mi kihoottitthimihani watuninyani ni kihomaliha nteko mwaakivahileenyu wiira kivare.
5 Vano, Paapa nkittitthimihe toko mwaakittitthimihileenyu ukati kaaryaaka nkhayi ni nyuuva ahinaaya wumpiya apinaatamu.
6 “Kihaacuweliha ncina ninyu atthu ontuninyani nkivahileenyu. Ayo yaari aawinyu masi nhokivaha miiva ni ayo ahiiwelela nuulumo ninyu.
7 Vano, ayo anaacuwela wiira citthu cotheene nkivahileenyu caari caawinyu,
8 kontha mi kihaahimeerya citthu cotheene nkihimenryeenyu, ni ayo ahotthuna ni anaakupali wiira thi nyuuva nkiveleelihile.
9 Kinuulepelani nlattu waawaya ayo; akinuulepelani citthu nlattu waatthu ontuninyani, masi nlattu waale nkivahileenyu, kontha ayo akhanle awinyu;
10 ni citthu cotheene cawaka cikhanle caawinyu, ni citthu caawinyu cikhanle cawaka ni mi kihottitthimihiya iriyaryaaya.
11 “Vano miiva akirii ntuninyani, masi ayo ari ntuninyani, ni miiva kinaawa nipuro niriinyu, Apaapa Owaarya, mwaakhikicere ayo nlattu woncina ninyu, ncina nikivahileenyu, wiira ayo yaataane khampa hiiva cinaataaneehu.
12 Ukati waaryaaka naayo, kaanaakhikicera nlattu woncina ninyu, ncina nikivahileenyu; ni kihaakhikicera ni khaavo rimenle, hikhanle mwaana aayariye wiira atankanyiye, wiira yiirannye itthu inhimyaaya cowantikhiya cowaarya.
13 Masi nna va, miiva kinwa nipuro niriinyu ni kinooluma nnya citthunnya kinari watuninyani, wiira ayo atteeliye nrima toko miiva.
14 Mi kihaahimerya nuulumo ninyu, masi atthu ontuninyani anawaathanya, kontha ayo khaari toko atthu ontuninyani, toko miiva kihikhanlyaaka toko ayo atthwaayo.
15 “Akinoolepelakani wiira mwaakumihe mu ntuninyani mu, masi kinoolepelani wiira mwaakhikicere, nlattu wantakhali.
16 Ayo khaari toko atthu ontuninyani toko miiva kihikhanlyaaka toko ayo atthwaayo.
17 Nvarele nteko nuulumo ninyu neekhweeli wiira mwaakhalihe owaarya, kontha nuulumo ninyu nikhanle ikhweeli.
18 Toko nyuuva cikirumileenyu mu ntuninyani mu, miiva ciicammo kihaaruma.
19 Miiva kinaakhala owaarya nlattu waawinyu, wiira naayova akhalihiye owaarya ni nuulumo ninyu.
20 “Akinaalepelelaka nnyo citthunnyo ala paasi, masi ale anhala ukaamini nlattu wo citthu cinhalaaya uhimeriya naala,
21 wiira otheene akhale owaataana, khampa miiva ni nyuuva Paapa nikhanleehu owaataana. Vano, ayo ciicammo anaahala ukhala owaataana ni hiiva, wiira atthu ontuninyani akupali wiira thi nyuuva nkirumile.
22 Mi kihaavaha uttitthima wiira ayova akhale owaataana khampa nyuuva ni miiva nikhanleehu owaataana.
23 Mi kikhale owaataana naayo ni nyuuva nkhale owaataana ni miiva, wiira ayo yaataane sana-saana ni atthu ontuninyani acuwele wiira nyuuva nhookiruma ni nhaafenta ale nkivahileenyu toko cikifentileenyu.
24 Paapa, kimpheela wiira ale akivahileenyu akhale nipuro kinhalaaka ukhala, wiira yoone mananna cikittitthimihileenyu, kontha nnaakifenta ikhumelo waaryaaya ahinompiya apinaatamu.
25 Apaapa osariya, atthu ontuninyani khweeliini khaanoocuwelani, masi mi kinawuucuwelani, ni ala nkivahileenywaala anaacuwela wiira thi nyuuva nkirumile.
26 Mi kihaacuweliha ncina ninyu ni akinhala uhiyerera waacuweliha, wiira mananna cikifentileenyu naayo mwaafente ni miiva kiwaataanane.”