Ihapari Comaana Cantikhiye ni Joau 18:1-40
-
Yuuta nanvariiha Yesu (1-9)
-
Peturu naavarela nteko ikatana (10, 11)
-
Yesu naarwaaniya wa Anaasi (12-14)
-
Ikwaha yoopacera Peturu ankhottilyaawe Yesu (15-18)
-
Yesu naarwaaniya wa Anaasi (19-24)
-
Ikwaha yonayeeli ni yoneeraru Peturu ankhottilyaawe Yesu (25-27)
-
Yesu uhoolo wa Pilatu (28-40)
-
“Umwennyaaka khunakhala wo ila ituninyeela” (36)
-
18 Umaliha wawe wuuluma nnyo citthunnyo, Yesu ahokhuma naattharyaawe ni ahorwaa mphantte nkhwaawe wo mooloko wo Seetro, nwo yaahaavo ijardim ni Yesu naattharyaawe yaahokela njardimmo.
2 Yuuta, yooyo aahala unvariiha Yesu, ciicammo ancuwela nno nipuronno, kontha Yesu ahothukumana imaara cinci naattharyaawe nne nipuronne.
3 Vano, Yuuta wamoca naanatoropa ni ciicammo makwarta yaarumiye naanankuttho ni mafariseu, yaahophiya mpaka nno nipuronno anakusacile mithuko, ilampata, mikopo ni ikatana.
4 Vano, Yesu acuwelaka itthu yaahala umwiirannyeela, aahorwaa uhoolo ni ahowiirela: “Nnomwaavya tipani?”
5 Ayo yahaakhula yiiraka: “Nimmwaavya Yesu, o Nasaree.” Vano, uyo aheera: “Thi miiva.” Yuuta, yoole antumihilyoole, aari nkhayi naayo atthwaayo.
6 Masi Yesu uwiirela wawe: “Thi miiva.” Ayo yahoturuwela uttuli ni yahomora.
7 Vano, Yesu ahaakoha-tho: “Mwinre nnomwaavya pani?” Ayo yahaakhula yiiraka: “Yesu, o Nasaree.”
8 Yesu ahowaakhula eeraka: “Mi kihoohimyeerani wiira phi miiva. Vano, wakhala wiira nnokaavya miiva, mwaahiye ala alopwanaala arwee.”
9 Uyo oolumacile commo wiira yiirannye ile yaahimilyaawe eeraka: “Ale akivahileenyu khaavo rimenle.”
10 Vano, Simau Peturu ahokumiha ikatanaawe ni ahothikila nnyaru nananteko anankuttho muulupale. Uyo nantekooyo eehaniya Maaliku.
11 Yesu ahomwiirela Peturu co: “Uturusele ikataneeyo munrupani waya. Mi akinlamuliya uwurya ikoopu ikivahilyaaya Apaapa?”
12 Vano, anatoropa, ahooleli aanatoropa ni makwarta aayuuta yaahonvara Yesu ni yaahontthuka.
13 Ayo yaapacenre unrwaana wa Anaasi nlattu wonthelela Kayifasi, aari nankuttho ule mwaakhoole.
14 Khweeliini Kayifasi phaahimyenre ayuuta wiira yanhala uphwanyera ifayita, nlopwana mmoca akhwaaka wiira awoopole apoovu.
15 Simau Peturu ni mwiitthucihi nkhwaawe, yaanontthara Yesu. Uyo mwiitthucyuuyo ancuweliya ni nankuttho muulupale ni aahokela nkhayi ni Yesu mpaka wapuwani wa nankuttho muulupale,
16 masi Peturu ahohala nkhora woovate. Vano, ntthari aacuweliya ni nankuttho muulupalyooyo, aahokhuma ni aahorwaa wuuluma ni nthiyana eemela wankhorani ni Peturu ahokela.
17 Vano, nanteko nthiyana aakhalenla wankhorannyuuyo ahonkoha Peturu eeraka: “Weeva ciicammo khunakhala nttharyaawe uyo nlopwanooyo?” Peturu ahaakhula eeraka: “Mena, akinakhala.”
18 Vano, ananteko ni makwarta yaahoorukuryeerya mooro waaparihenlyaaya, kontha waari ukati wooririya ni yaanoottha. Ni Peturu ciicammo aari nkhayi naayo ootthaka.
19 Vano nhooleli aanankuttho ahopacera unkohakoha Yesu attharyaawe ni citthu ceetthucihaawe.
20 Yesu ahaakhula eeraka: “Kuulumile uhoolo waatthu enci. Khula ukati kaaneetthuciha mmasinakooka ni ntempulu, mapuro ayuuta otheene anthukumanaaya ni khiivo itthu yuulumilyaaka kivitha-vithaka.
21 Nnokikohakoherani? Mwaakoheke ale yiiwile itthu yuulumilyaaka. Khweeliini, ayo anaacuwela kihimilyaaka.”
22 Yesu umaliha wawe uhimya iyo itthwiiyo, kwarta mmoca aari nne nipuronne ahomwaatta ni aheera: “Ummwaakhulelani commo nhooleli aanankuttho?”
23 Yesu ahaakhula eeraka: “Wakhala wiira kuulumile itthu yootakhala, nkihimyeere isiyani yuulumilyaaka yootakhala; masi wakhala wiira akuulumile itthu yootakhala, nlattuni unkaatteenyu?”
24 Vano, Anaasi ahoruma wiira arwaaniye natthukiye wa Kayifasi nankuttho muulupale.
25 Simau Peturu aari vaava ootthaka mooro. Vano, ahokohiya: “Weeva ciicammo khunakhala nttharyaawe ule nlopwanoole?” Peturu aahoruna, eeraka: “Mena, akinakhala.”
26 Nanteko mmoca a nankuttho muulupale, aari mmucyaawe nlopwana ule Peturu anthikinlyaawe nnyaru, aahonkoha eeraka: “Akiwoonile we unari nkhayi ni uyo nlopwanooyo u jardim?”
27 Masi, Peturu ahokhotta-tho ni woohipica waaheepa nthupi.
28 Vano, yaahoncisa Yesu yanrwaanaka wa Kayifaasi wa kuvernatoore. Waari wicisu. Masi ayo khayaakenle wakuvernatoore ukhala wiira yaapheela ahipanke itthu yoonanara, masi arwee yanlye Paasikuwa.
29 Vano, Pilatu ahorwaa mpaka nipuro naaryaaya ni ahaakoha eeraka: “Pankileni ula nlopwanoola?”
30 Ayo yahomwaakhula yamwiirelaka: “Unari wiira ula nlopwanoola khaari nakhirini, hi khanaahala wuuwaanelani.
31 Vano, Pilatu ahowiirela: “Munkuseke ni mwanhukhumuku nyeenyuva nttharihaka malamulweenyu.” Vano ayuuta yaahomwiirela: “Hi khanintthunihiya umwiiva ntthu.”
32 Yaakhumelenle iyo itthwiiyo wiira yiirannye itthu Yesu yuulumilyaawe aacaka mananna caahalaawe wiiviya.
33 Vano Pilatu aahoturuwela mpaani wa kovernatoore, ahomwiihana Yesu ni ahonkoha co: “Thi weeva ukhanle mwene aayuuta?”
34 Yesu aaheera: “Nikohonno ninookhumani mmuru winyu, awula atthu akhwaawe phuuhimyenreni?”
35 Pilatu ahaakhula eeraka: “Mi kihookhala nyuuta? Apoovwaa ni ahooleli aanankuttho phuuwaanile va. Upankileni?”
36 Yesu ahaakhula: “ Umwennyaaka khuunakhala wo ila ituninyeela. Unari wiira umwennyaaka ukhanle wo ila ituninyeela, atthwaaka yanhala waana wiira miiva kihivahereriye mmatatani waayuuta. Masi va, umwennyaaka khuunakhala wo ila ituninyeela.”
37 Vano Pilatu aahonkoha eeraka co: “Masi thi weeva ukhanle mwene?” Yesu ahaakhula eeraka: “Thi nyuuva nnohimya wiira mi kikhanle mwene. Iyo phi itthu yiirihile miivano uyariya ni iyo phi itthu yiirihile miiva uwa mu ntuninyani mu, wiira kiwiitthucihe atthu ontuninyani ikhweeli. Ule neettela ikhweeli nawiiwelela moolumwaaka.”
38 Pilatu ahonkoha eeraka co: “Ikhweeli ikhanle isiyani?”
Unkoha wawe commo, Pilatu ahoorwaa mpaka nipuro naaryaaya ayuuta ni ahowiirela: “Akinoona itthu yootakhala ipankilyaawe.
39 Uhiya commo, ihaavo ileema inhimya wiira kihaana kintthukulaka ntthu ukati wo Paasikuwa. Vano, nnaapheela wiira kintthukuleke mwene aayuuta?”
40 Ayo yaahokhuwela-tho yiiraka: “Ula nlopwanoola mena; hi ninompheela Parapasi!” Yaaneeraru commo, Parapasi aari nakhirini.