Ihapari Comaana Cantikhiye ni Joau 19:1-42
19 Vano, Pilatu ahoncisa Yesu ni ahoruma wuufyulaciya.
2 Anatoropa yaahopanka ikorowa* yomwiiwa ni yahonwariha mmuru, ni yahonwariha ikuwo yooseerya.
3 Ayo yanrwaaka nipuro naaryaawe ni yammwiirela: “Wiicopole, mwene aayuuta!” Ciicammo yaanompatahaka.
4 Pilatu ahokhumela-tho vate ni ahowiirela apoovu: “Nkiviriyane! Kinankumihera va vate va, ni ncuwele wiira akoonile hataa itthu yootakhala ipankilyaawe.”
5 Vano,Yesu ahokhuma nawarihiye ikorowa yomwiiwa ni ikuwo yooseerya. Pilatu aheera: “Nlopwanooyo phuula!”
6 Masi, ukati ahooleli aanankuttho ni makwarta* wamonnyaaya, yahokhuwela yiiraka: “Akhomeliye wanipottoni!* Akhomeliye wanipottoni!” Pilatu ahowiirela: “Munciseke mwamwiiveke mwaaneeneenyu, kontha mi akinoona hataa itthu yootakhala ipankilyaawe.
7 Ayuutaayo yahomwaakhula yeeraka: “Hi nihaana nlamulo ni nlamulonno nineera uyo haana wiiviya, nlattu wowiikhaliha mwaana a Nluku.”
8 Ukati Pilatu wiiwilyaawe itthu yaahimilyaaya, uyo ahotepa woova;
9 ahokela mpaani wa kovernatooremmo ni ahonkoha Yesu co: “Weeva oovayi?” Masi Yesu khaakhunle itthu.
10 Phimaana, Pilatu ahomwiirela: “Unaakhotta ukuulumana? Khuncuwela wiira mi kihaana ukhulupale woopheela wuutthukula ni hataa woopheela uwiiva?”
11 Yesu ahomwaakhula eeraka: “Nyuuva khamwaahala ukhalana ukhulupale uhoolo waka, uhikhanle wiira ukhulupale nrineenyu nvahiye ni Nluku. Phimaana, nlopwana kiwaanile mmatatani winyu hovara itampi yuulupale.”
12 Phimaana, Pilatu ahaavyaavya mananna ontthukula, masi ayuuta yankhuwela yiiraka: “Mwantthukulaka uyo nlopwanooyo, khannakhala apatthannyaawe Seesari. Kontha ntthu neekhaliha mwene, nonrukunuwela Seesari.”
13 Vano, Pilatu wiiwa wawe ayo moolumwaayo, ahonkumihera Yesu vate ni ahorwaa wonkoma utiripunaali, nipuro neehaniya maluku oopapattheliya, niiheperewu ineehaniya Kapataa.
14 Naari nihuku nootthenkaciya Paasikuwa, waari 12 oora. Uyo ahowiirela ayuuta: “Mweneenyuuyo phuuyo!”
15 Vano, ayo yaahokhuwela yiiraka: “Eeviye! Eeviye! Akhomeliye wanipottoni!” Pilatu ahaakoha: “Kimwiiveke Mweneenyuuyo?” Ahooleli aanankuttho yaahomwaakhula yiiraka: “Hi khanirina mwene nkhwaawe hikhanle Seesari.”
16 Nlattu wo iyo itthwiiyo, Pilatu ahonleva urwaa ukhomeliya wanipottoni.
Vano, ayo yaahoncisa Yesu.
17 Nateesileene nipotto,* ahokhuma arwaaka nipuro neehaniya muru woohala makhuvaru, niiheperewu uneehaniya u Kolkoota.
18 Nwo, aahokhomeliya wanipottoni iriyari yaalopwana eeli, mmocooyo aari moono wonlopwana ni nkinooyo aari moono wonthiyana.
19 Pilatu ciicammo ahantikha moolumo ni ahokhomela wanipottoni aakhomeliyaawe Yesu. Ayo moolumwaayo yeera: “Yesu, o Nasaree, Mwene aayuuta.”
20 Ayuuta enci yaahosoma ayo moolumwaayo, kontha nipuro Yesu naakhomeliyaawe wanipottoni naahowaattamanana usittatti. Ni ayo moolumwaayo yantikhiye niiluka iheperewu, ilati ni ikereku.
21 Masi ahooleli aanankuttho aayuuta, yahomwiirela Pilatu co: “Nhantikhe: ‘ Mwene aayuuta’, masi mwantikhe toko ciiralyaawe: ‘Mi kikhanle mwene aayuuta.’”
22 Pilatu ahowaakhula eeraka: “Yeeyo yantikhilyaakeeyo, phiyeeyo.”
23 Vano, unkhomela waya Yesu wanipottoni, anatoropa yaahokawelana ikuwo cawennyo miphantte micese, khula natoropa mphantte mmoca ni ciicammo yahokusa ihancwaawe. Masi ihancwiiyo khayaattotthiye, kontha yaari ikuwo yootthaviya ikhumelo vathi mpaka nculu.
24 Phimaana, yaaherelana: “Nihaanyule, masi nipanke mwaavi wiira nimoone tipani nohala uhalana.” Iyo itthwiiyo yaakhumelenle wiira yiirannye moolumo amphwanyannya nhina cowantikhiya cowaarya, aneera: “Ayo ahokawana ikuwo caka ni ahopanka mwaavi wiira alakele tipani aahala uhalana ikuwo caka.” Ni iyo khweeliini phiitthu yaapankilyaaya anatoropaayo.
25 Anumwaane Yesu ni mwaamunnaya, ni ciicammo Maria amwaara Klopa ni Maria Mataleena yaari wakhiviru ninipotto naakhomeliyaawe Yesu.
26 Vano, Yesu woona wawe wiira anumwaane ni mwiitthuci anfentaawe yaari wakhiviru, Yesu ahowiirela anumwaane co: Ula phimwaninyu!”
27 Woottharelana uyo ahomwiirela mwiitthucyaawyooyo co: “Ala phaanumwana!” Ukhuma nne nihukunne, ahaacisa ayo athiyanaayo uwannyawe wiira aakhalane.
28 Vano, Yesu woona wawe wiira caaherannya citthu cotheene, ni wiira yiirannye itthu yantikhiye nhina cowantikhiya cowaarya, Yesu aheera: “Ukivola ntthona.”
29 Nno nipuronno, yahaavo ijaaru yaaheliye iviinyu yoonyuunya. Vano, yaahoruwenya isponja njaarunimmo ni yaahotthukeleliya wantathini ni yahorwaaniya mpaka wamalakuni wa Yesu.
30 Yesu uvahiya wawe ivinywiiyo yoonyuunyeeyo, uyo aheera: “Citthu cotheene ciheerannya!” Ahooromela vathi ni ahokhwa.
31 Ukhala wiira naari nihuku nowiitthenkaciya, wiira irutthu caatthu yaakhomeliye cihiphiye nihuku no isaapatu (kontha ile isaapatwiile yaari isaapatu yuulupale), ayuuta yahonlepela Pilatu wiira arume wuntakaciya metto caalopwana yaakhomeliye ni ukumihiya irutthu cayannyo wanipottoni va.
32 Vano, anatoropaayo yahorwaa wuntakaca metto canlopwana oopacerooyo ni nlopwana aari moono nkhwaawe wa Yesu.
33 Masi, uphiya waya nipuro naaryaawe Yesu yahoona wiira uyo aahokhwa; phimaana, khayaamuntakacile metto cawe.
34 Vano, natoropa mmoca ahonhoma ninivaka mmarupelani, ni woohipica yahokhuma iphome ni maaci.
35 Ni ule oonile iyo itthwiiyo naavaha usaahiti, ni usaahityaawe ukhanle weekhweeli, ni uyo naacuwela wiira nohimya ikhweeli, wiira ni nyuuva ciicammo nkupali.
36 Khweeliini, nnyo citthunnyo caakhumelenle wiira yiirannye moolumo ari nhina cowantikhiya cowaarya, aneera: “Khaninhala wuntyaa hataa nikhuva nawe nimoca.”
37 Ni ciicammo wiira yiirannye moolumo makhwaawe amphwanyannya nhina cowantikhiya cowaarya cineera: “Anaahala unweheeha ule anhomilyaaya.”
38 Wiirannya waya nnyo citthunnyo, Yusufu o Arimateya ( aari antthari a Yesu, masi mmwiitihoni nlattu woowoova ayuuta ) ahonlepela Pilatu wiira akumihe irutthu ya Yesu wanipottoni. Ni Pilatu ahontthunihera. Vano, uyo ahorwaa ukumiha irutthwiiyo.
39 Nikodemu, nlopwana aarweele umoonanana Yesu ikwaha yoopacera uhiyu, ciicammo ahorwaa, nakusile makhura oonukhela ootakaniheriya imiira ni aalowee, yaalemela ikiilo cookhalaka 33.
40 Ayo yaahocisa irutthu ya Yesu ni yahovilinkelela nkuwoni yoovevyaala, anamoottihacileene makhura oonukhela, khampa ayuuta cimpankesaaya yapheelaka unsikha ntthu.
41 Vano, yahaavo ijardim nipuro naakhomeliyaawe ni ijardiiyo yaahaavo mahiye onaanaano, mahiye yaari hinasikhiya ntthu.
42 Ukhala wiira naari nihuku nowiitthenkaca ayuuta ni mahiyaayo yaari wakhiviru, Yesu ahosikhiya mommo.
Notas
^ Awula: “ikhara.”
^ Awula: “makwaarta ootempulu.”
^ Awula: “eeviye wanipottoni.”
^ Awula: “nipotto noohuviheriya.”
