Ihapari Comaana Cantikhiye ni Joau 20:1-31
20 Nihuku noopacera no isumana, uhinaaya usa sana-saana, Maria Mataleena ahorwaa umahiye ni uphiya wawe nwo ahoona wiira nluku naattiyeliye nipuro naakeleliya, nahokumihiya.
2 Vano, uyo ahokhuma atthawaka ni ahomphwanya Simau Peturu ni mwiitthuci nkiina Yesu anfentaawe ni aheera: “Irutthu ya Apwiiya ihokumihiya mmahiyemmo, ni khanincuwela nipuro nirwaaniyaaya.”
3 Vano, Peturu ni mwiitthuci nkhwaawyooyo yaahokhuma yarwaacaka umahiyenwo.
4 Ooyeeli caya yaahopacera utthawa wonkwaha mmoca, masi mwiitthuci nkhwaawyooyo ahotthawa umpwaha Peturu ni haapacenre uphiya umahiyenwo.
5 Uthurumela wawe mmahiyemmo, uyo aahoona ikuwo caavilinkeleliyaawe Yesu, masi khaakenle.
6 Woohipica, Simau Peturu antthara, ciicammo ahophiya, ahokela mmahiyemmo ni aahoona ikuwo coovevyaala caahiiye.
7 Nttapwatta naavilinkeleliye mmuru wawe, khaneesiye nkhayi nimattapwatta makhwaawyaayo, masi naahoovilinkaciya nuweesiya mphanttyaayaru.
8 Vano, mwiitthuci aapacenre uphiya umahiye, ciicammo ahokela, ahoona ni ahokupali.
9 Kontha ayo yaari ahineeweeha itthu yaahimyaaya Cowantikhiya Cowaarya wiira uyo anhala wunwelelihiya akhwaaka.
10 Vano eetthucyaayo yaahoturuwela uwaani.
11 Vano, Maria ahohala umahiye onlaka. Onlakoono, ahothurumela mmahiyemmo
12 ni ahoona malayikha meeli yaawanre ikuwo cootteela anonkomile nipuro neesiye irutthu ya Yesu, nimocanno naari wiimuru ni nikhwaawenno naari wiimettoni.
13 Malayikhaayo yaahonkoha co: “Athiyana, nnonlelani?” Uyo ahaakhula eeraka: “Ahoocisiya Apwiiyaaka ni akincuwela nipuro nirwaaniyaaya.”
14 Wuulumaca wawe commo, Maria ahorukunuwa ni ahomoona Yesu neemenle nne nipuronne masi khancuwelenle wiira aari Yesu.
15 Yesu ahaakoha eeraka: “Athiyana, nnonlelani? Nnomwaavya tipani?” Oonihaka toko wiira aari nlopwana aawacera ijardim, Maria aahomwiirela: “Wakhala wiira thi nyuuva nkumihile irutthu ya Apwiiya, nkihimyeere nipuro neesileenyu, mi kinaarwa ucisa.”
16 Yesu aheera: “Maria!” Urukunuwa wawe Maria ahaakhula niiheperewu eeraka: “Raponi!” (maanaaya: “Mwiitthucihi!”).
17 Yesu aheera: “Uhiye ukivarannwo, kontha nanlelo akinaaya urwaa Waapaapa. Masi urwee waahimyeere asunnaka wiira: ‘Mi kinaahala urwaa Waapaapa ni akhanle Apaapeenyu, wa Nlukwaaka ni khanle Nlukwiinyu.’”
18 Maria Mataleena ahorwaa waahimyeera eetthuci akhwaawe nnyo ihaparinnyo eeraka: “Kihowoona Apwiiya!” Ni aahaahimyeera itthu yaahimyeeriyaawe ni Yesu.
19 Ucoocilo waya nne nihukunne, nihuku noopacera no isumana, ni mikhora conipuro atthari yaathukumannyaaya caahotthukiya, nlattu woowoova ayuuta. Yesu ahaakhumelela iriyaryaaya ni aheera: “Nnema nikhale ni nyuuva.”
20 Uwiirela wawe commo, Yesu ahowoonihera matataawe ni ahowoonihera mmarupelani waahomiyaawe. Vano, eetthuci yaahotteeliya nlattu woowoona Apwiiyaaya.
21 Yesu ahowiirela-tho: “Nnema nikhale ni nyuuva. Toko Apaapa cikirumilyaaya ni miiva ciicammo kinawuurumani.”
22 Wuulumaca wawe commo, aahowucelela mphantte waaryaaya ni aahowiirela co: “Mwaakhele nnepa wowaarya.
23 Nyuuva mwanlevelelaka ntthu itampi ivanryaawe, Nluku ciicammo naahala unlevelela; masi mwaahinleveleleke Nluku ciicammo khanhala unlevelela.”
24 Masi Tomee aapanka mphantte waatthari 12, eehaniya Nivatta, khaarivo ukati Yesu waakhumelenlyaawe.
25 Vano, eetthuci akhwaawe yaaheera: “Hiiva nihowoona Apwiiya!” Masi Tomee aheera: “Mi kaahooneke mapuro yaakhomeliyaaya niipereku, kikelihaka nikokho naka ayo mapurwaayo ni kikelihaka ntata naka nipuro yaahomiyaaya mmarupelani waya, akinhala ukupali mena vakaani.”
26 Uvira waya mahuku 8, eetthucyaawe yaahothukumana-tho, ni Tomee aari wamoca naayova. Hataa ukhalaka wiira mikhorannyo caahotthukiya, Yesu aahaakhumelela iriyaryaaya ni ahowiirela co: “Nnema nikhale ni nyuuva.”
27 Vano, ahomwiirela Tomee co: “Wooneke matataakaayo; ni uvareke mmarupelani wakammo. Uhiye waanyihacera ni ukupali.”
28 Tomee ahomwaakhula eeraka: “Apwiiyaaka ni Nlukwaaka!”
29 Yesu ahomwiirela: “Ukupanli kontha uhookoona?” Ootteeliya phaale ahoonile, masi uhookhalaru commo, anaakupali.”
30 Khweeliini, Yesu ahopanka miiriirya cinci uhoolo waattharyaawe, cihantikhiye nhina ila iroolwiila.
31 Masi nnya cantikhiye wiira nyuuva nkupali wiira Yesu khanle Kristu, mwaana a Nluku ni wiira nlattu wowaamini mphwanye ukumi nlattu wo ncina nawe.
