Ihapari Comaana Cantikhiye ni Joau 21:1-25
21 Wiirannya waya nnyo citthunyo, Yesu ahaakhumelela-tho attharyaawe ipahari yo Tiperiyate. Ni uyo aakhumelenle ala manannaala:
2 nno nipuronno ahaavo Simau Peturu, Tomee ( eehaniya nivatta), Nataniyeli, o Kanaa-Ookalileya, asaana a Sepeteu ni attharyaawe eeli.
3 Simau Peturu ahowiirela: “Kinrwaa umenca.” Ayo yahomwiirela co: “Ninawuutthara.” Vano, yahorwaa ni yahokela nkalawani, masi ule uhiyuule khayaavanre itthu.
4 Ukati waasaaya, Yesu aari upahari, masi attharyaayo khayancuwelenle wiira uyo aari Yesu.
5 Vano, Yesu ahaakoha eeraka: “Asaanaaka, nhaana itthu* yoopheela ulya?” Ayo yahaakhula yeeraka: “Mena, khanirina”
6 Uyo ahowiirela: “Nvonyere ntthavinno moono wonlopwana wokalawa ni nnaahala uphwanya itthu.” Vano, ayo yahovonyera ntthavinno, masi khayaakhitinri upurulela nkalawani, kontha caari ihopa cinci.
7 Vano, ntthari Yesu aatepaawe unfenta ahomwiirela Peturu: “Ale Apwiiya!” Peturu wiiwa wawe wiira yaari Apwiiya, aahowara ikuwo cawennyo, ukhala wiira aari woohiwara ni ahiivonyera mmaacini.
8 Masi atthari akinaayo yaawile nkalawani yankaani, yapurulacaka ntthavi nohopanno, kontha yaari wakhiviru ni nseresere waya ipahari, yaari meeturu ookhalaka 90.*
9 Ukati waakhuruwilyaaya nkalawanimmo, nno nipuronno yahoona mooro, niihopa cineesiye wamooroni vaa, ni iphaawu.
10 Yesu ahowiirela: “Ihopa civanreenyunyo nwaane vakaani.”
11 Vano, Simau Peturu ahowela nkalawanimmo ni ahopurulela ntthavi nohopanno vate; caari ihopa cinci, cahaavo ihopa 153 cuulupaleru. Waahookhalaru wiira cahaavo ihopa cinci, ntthavinno khanaanyuwile.
12 Yesu ahowiirela: “Mwaalyeeke.” Khaavo hataa ntthari mmoca aalipile nrima wiira ankohe uyo aari tipani, kontha yancuwela wiira yaari Apwiiyaaya.
13 Yesu ahocisa iphaawunnyo ni ahaakawela, ciicammo ahaakawela ihopannyo.
14 Ila yaari ikwaha yoneeraru Yesu aakhumelenlyaawe attharyaawe, wunwelelihiya wawe.
15 Umaliha waya ulya, Yesu ahonkoha Simau Peturu: “Simau mwaana a Joau, weeva unaakifenta upwaha nnya?” Uyo ahaakhula eeraka: “Iyeeni Pwiiya, nyuuva nnaacuwela wiira kinawuufentani.” Uyo ahomwiirela: “Ulihe ikhontwaa caka cooyevaca.”
16 Yesu ahonkoha-tho ikwaha yonayeeli: “Simau, mwaana a Joau, weeva unaakifenta?” Uyo ahaakhula eeraka: “Iyeeni Pwiiya, nyuuva nnaacuwela wiira miiva kinawuufentani.” Uyo ahomwiirela: “Uhakhele ikhontwaa caka cooyevaca.”
17 Yesu ahonkoha ikwaha yoneeraru: “Simau, mwaana a Joau, weeva unaakifenta?” Peturu ahoriipiya nrima nlattu wookohiya ikwaha yoneeraru: “Weeva unaakifenta?” Phimaana, uyo ahaakhula eeraka: “Pwiiya, nyuuva nnaacuwela citthu cotheene. Ni nnaacuwela wiira miiva kinawuufentani.” Yesu ahomwiirela: “Ulihe ikhontwaa caka cooyevaca.
18 Kinoohimeerya ikhweeli wiira: Ukati waarya mmiravo, wanwara ni wanrwaa mapuro waapheela. Masi, wuuluvalaka vale, unaahala uteesera matataa nculu ni ntthu nkhwaawe, naahala wuuwariha ni naahala wuucisa mapuro uhimpheelaa.
19 Anhimenrye iyo itthwiiyo wiira amoonihere mananna caahalaawe ukhwa, wiira anttitthimihe Nluku. Unhimeerya wawe iyo itthwiiyo, ahomwiirela: “Uhihiyerere ukitthara.”
20 Peturu ahorukunuwa ni ahoona wiira ntthari Yesu aatepaawe unfenta aanawaatthara, ule amphitenrye Yesu ukati waalyaaya ni amwiirelaka: “Pwiiya, tipani nopheela wuutumihani?”
21 Vano, ukati Peturu waamonnyaawe, ahonkoha Yesu: “Pwiiya, vano isiyani inhala umwiirannyeela ula nlopwanoola?”
22 Yesu ahomwiirela: “Mi kapheelaka wiira uyo akhale mpaka ukati unhalaaka uwa, inootikhiniha isiyani? Weeva uhihiyerere ukitthara.”
23 Vano, wahomwaryeela uyo mwahooyo iriyari yomayamunna wiira uyo nttharyuuyo khaahala ukhwa. Masi, Yesu khaamwiirenle wiira uyo khaahala ukhwa, masi enre: “Kapheelaka wiira uyo akhale mpaka ukati unhalaaka uwa, weeva inootikhiniha isiyani?”
24 Ula khanle ntthari novaha usaahiti wo nnya citthunnya ni antikhile nnya citthunnya ni hi ninaacuwela wiira usaahityaawe, ukhanle weekhweeli.
25 Khweeliini, cihaavo ciicammo citthu cikhwaawe cinci Yesu pankilyaawe. Yeeriyaka wiira caahantikhiya citthu cotheene Yesu cipankilyaawe, moonelwaaka hataa ila ituninyeela khayaahala ukhala ikhato wiira cisunkiye nnyo iroolunnyo.
