Ihapari Comaana Cantikhiye ni Joau 3:1-36
3 Iriyari yo mafariseu, ahaavo nlopwana mmoca eehaniya Nikodemu, nhooleli ayuuta.
2 Uyo aahorwaa uhiyu nipuro naaryaawe Yesu ni ahomwiirela: “Raapi, ninaacuwela wiira nyuuva nrumiye ni Nluku, kontha miiriirya nnopankeenyu khaavo nokhitiri upanka hikaviheriyaka ni Nluku.”
3 Vano, Yesu ahomwaakhula, eeraka: “Kinoohimerya ikhweeli wiira, uhikhanle wiira ntthuuyo hooyariya-tho, khanhala ukela Muumweneni wa Nluku.”
4 Nikodemu ahonkoha co: “Manannani ntthu owuuluvala nohalaawe uyariya-tho? Niireke uyo pooti uturuwela mmirimani waanumwaane wiira ayariye ikwaha ikhwaawe?”
5 Yesu ahomwaakhula: “Uhikhanle wiira ntthu naayariya nimaaci ni nnepa, khanhala ukela Muumweneni wa Nluku.
6 Ule yariye ni ntthu, nokhala mwaana antthu, ule yariye ni nnepa wowaarya, nokhala mwaana a Nluku.
7 Uhikhale ootikhinaca nlattu mi woowiirela: Uhaana uyariyaka-tho.
8 Iphyoo inaavukela mphantte umpheelaaya ni uvukawayanwo unawiiwannya, masi khaavo nocuwela mphantteni unweelaaya ni unrwaaya, iyo phimmwiirannyeela ntthu noyariya ninnepa wowaarya.”
9 Vano, Nikodemu aahonkoha Yesu amwiirelaka co: “Manannani cimmwiirannyeelaaya ntthu nnya citthunnya?”
10 Yesu ahomwaakhula eeraka: “Weeva ukhanle mwiitthucihi aasarayeli, masi nanlelo khuncuwela mananna ciniirannyaaya nnya citthunnya?
11 Kinoohimyeera ikhweeli wiira: Hiiva, ninooluma citthu nincuweleehu ni noonileehu. Masi nyuuva mwaatthiva, khannokupaleela itthu invaheehu usaahiti.
12 Mi kihoohimeryani citthu co va watuninyani va, masi uhookhalaru commo, nyuuva khannokupali. Kiireke nnaahala ukupali koohimeeryakani citthu cowiirimu?
13 Uhiya commo, khaavo pinaatamu rweele wiirimu, hikhanle ule khuruwile wiirimu Mwaana a Pinaatamu.
14 Ni khampa Moceesi waathomeelyaawe inwaa ukati waaryaawe muuthakoni, Mwaana a Pinaatamu ciicammo naahala uthomennya.
15 Wiira otheene ale anhala umwaamini aphwanye ukumi woohimala.
16 “Kontha Nluku haafenta cinene apinaatamu, phimaana haavaha mwanawe mmoca wiira ntthu nohala umwaamini hitankanyiye, masi aphwanye ukumi woohimala.
17 Kontha Nluku khanveleelihile mwanawe va watuninyani va wiira aahukhumu atthu. Masi wiira apinaatamu yoopwee nlattu waawawe uyova.
18 Ule nothoonyera umwaamini mwaana a Nluku, khanhala uhukhumwiya. Masi ule hinthoonyera umwaamini mwaana a Nluku, hohukhumwiya nlattu woohaamini ncina na mwaana mmoca a Nluku.
19 Phimaana, itthu inhala uwiiriha atthu uhukhumwiya phiila: Iluusu yaahoowa watuninyani, masi apinaatamu khayaacivenle iyo iluuswiiyo, ukhala wiira ayova yaapanka citthu coohinamaana.
20 Kontha ntthu nopanka citthu coonanara khinoncivela iluusu, ni khanaattamela nipuro niri iluusu, wiira iluuswiiyo ihoonihere citthu coohinamaana cimpankaawe.
21 Masi ntthu nopanka citthu comaana, nawaattamela nipuro niryaaya iluusu, wiira ooniye wiira citthu cimpankaawe cinaavaranaca ni citthu cimpheelaawe Nluku.
22 Yesu umaliha wawe wuulumaca nnya citthunnya, ahorwaa ncoko wo Yuuta, ni nwo ahoviriha ukati nkhayi naayuutaayo, ni ahaapattisa atthu.
23 Masi Joau ciicammo eera aapattisaka atthu u Enoni, waattamela u Sali, kontha yaahaavo wonwo maaci menci ni atthu enci yanrwaa nipuro naaryaawe wiira yapattisiye.
24 Uyo ukatyuuyo Joau aari hinaaya utthukeliya nkhattya.
25 Vano, atthari a Joau yahopacera uvaanyihana ni nyuuta mmoca, nhina malakihero yuuluma wiirattela.
26 Ni ayo yaahorwaa umwiirela Joau co: “Nlopwana aari nkhayi ni nyuuva mphantte nkhwaawe womooloko Jordau, mwaamuulumakeenyu, neera aapattisaka atthu ni atthu enci anaarwaa mpaka nipuro niryaawe.
27 Joau ahaakhula co: “Khaavo naakhela hataa itthu imoca, uhikhanle wiira iyo itthwiiyo inkhuma wiirimu.
28 Nyuuva mwaatthi vaa nhopaca ukiiwa kiiraka, akinakhala Kristu, kihowaaca uveleelihiya uhoolo wawe paasi.
29 Ule rina nthiyana oopheela unthela phiri mpakaneli. Mpatthannyaawe mpakaneli akhalaka wakhiviru ni amwiiwaka, nokhala ootteeliya nlattu wowiiwa ncu nampatthannyaawe. Phimaana, mi kiri ootteeliya cinene.
30 Miteko ca Kristu cihaana ciincivaka, masi miteko caka cihaana civukuwacaka.
31 Ule nokhuma uculu, nawaapwaha atthu otheene, ule nokhuma watuninyani khanle owatuninyani vaava ni nooluma citthu cowatuninyani. Ule nokhuma wiirimu nawaapwaha atthu otheene.
32 Uyo nohimya citthu coonilyaawe ni ciiwilyaawe, masi khaavo nokupali itthu inhimyaawe.
33 Ule nokupali usaahiti uvahilyaawe , naathoonyera wiira Nluku khanle eekhweeli.
34 Kontha ule rumiye ni Nluku, nooluma citthu ca Nluku, ukhala wiira uyo khanvaha nnepa wowaarya vakaani-vakaani.
35 Nluku, nanfenta Mwanawe ni honvaha citthu cotheene mmatatani wawe.
36 Ule nothoonyera umwaamini Mwaana a Nluku naahala waakhela ukumi woohimala, masi ule himmwiiwelela Mwaana a Nluku, khanhala waakhela ukumi woohimala, kontha uviruwa wa Nluku unhala ukhala ni uyova.
