Ihapari Comaana Cantikhiye ni Joau 4:1-54
4 Ukati Yesu waacuwenlyaawe wiira mafariseu yaheewa citthu caapankaawe ni wiira aanaapattisa eetthuci enci umpwaha Joau,
2 (uhookhalaru wiira kahi Yesu phaapattisa masi eetthucyaawe),
3 uyo ahokhuma u Yuteya waaryaawe ni ahoturuwela u Kalileeya.
4 Masi uyo ahaana aviraka u Samariya.
5 Vano, ahophiya isittatti yo Samariya yeehaniya Sikaari, waattamela imatta Yakopi yanvahalyaawe mwanawe eehaniya Yusufu.
6 Khweeliini, vale phaaryaaya iluusi ya Yakopi, ni Yesu noocyeeleene nlattu wokwaha, ahonkoma wakhiviru waya iluusi, waari 12 oora.
7 Athiyana amoca o Samariya yahowa urika maaci, Yesu ahowiirela co: “Nkimeele maaci kiwurye.”
8 (Yooyo ukatyuuyo eetthucyaawe yaarweele usittatti uthuma iyoolya.)
9 Vano, athiyana o Samariyaayo yahomwiirela: “Nyuuva nkhale nyuuta, vano nnowa cani nkilepelaka maaci miiva nsamariya va?” (Yuulumacile commo nlattu asamariya ni aayuuta khayeewanana.)
10 Yesu ahowaakhula eeraka: “Mwaacuwenle iparakha* ya Nluku, ni mwaancuwenle ntthu nowiirelani: ‘Nkimeele maaci kiwurye,’ nyuuva mwanhala unlepela, ni uyo anhala wuuvahani maaci ookumi.”
11 Ayo yaheera co: “Nyuuva khanrina ipaarti wiira nrike maaci, ni ila iluusiila yowiisa. Vano nnophwanya vayi maaci ookumyaayo?
12 Niireke nyuuva nkhale oolupale waapwaha anhiya-taateehu Yakopi, anihiyenre ila iluusiila yaawuryaaya ayova, asaanaaya ni inama caya?”
13 Yesu ahowaakhula co: “Ule nohala uwurya ala maacyaala ninaahala unvola-tho ntthona.
14 Ule nohala uwurya maaci miiva kinonvahaaka khaninhala unvola-tho ntthona, masi ayo maacyaayo anhala ukhala mwiirutthuni wawe khampa nipuro ninweela maaci anvaha ukumi woohimala.”
15 Athiyanaayo yaheera: “Nkivahe yaayo maacyaayo wiira nihikivole-tho ntthona ni kihiweele-tho maaci va waluusi va.”
16 Uyo aheera: “Nrwee mwawiihane awannyu ni mwaawaane va.”
17 Athiyanaayo yahaakhula: “Miiva akitheliye.” Yesu ahowiirela co: “Nhaana isariya yowiira: ‘Miiva akitheliye.’
18 Kontha nhopaca utheliya imaara thanu ni nlopwana nrineenyu nenna co khaanakhala awannyinyu. Nhooluma ikhweeli.”
19 Athiyanaayo yahomwiirela: “Moonelwaaka nyuuva porofeeta.
20 Amuciihu okhalayi yaalompaka yoola mwaakooloola, masi apoovwiinyu nyuuva aneera wiira nipuro ninlamuliyaaya atthu urwaa ulompa ukhanle u Yerusalemu.”
21 Yesu aheera: “Athiyana, nkupali wiira: unaahala uwa ukati uhinhaleenyu waaswalela Apaapa va wamwaakoni va ni hataa u Yerusalemu.
22 Nyuuva nnonswalela Nluku nhinoncuweleenyu; masi hiiva ninonswalela Nluku ninoncuweleehu, kontha woopwa unkhuma* waayuuta.
23 Masi, unaahala uphiya ukati ni khweeliini uyo ukatyuuyo uhophiya, aswali eekhweeli unhalaaya waaswalela Apaapa ninnepa ni ikhweeli. Kontha khweeliini, Apaapa anawaatotha atthu toko ayo wiira akhale aswalyaaya.
24 Nluku khanle nnepa, ni ale anonswalela ahaana yeettiheriyaka ninnepa ni ikhweeli.
25 Vano, athiyanaayo yaheera: “Miiva kinaacuwela wiira Mesiya, neehaniya Kristu, naahala uwa. Ni awaaka vale, uyo naahala unihimeerya citthu cotheene woohinikhuwakhuwa itthu.”
26 Yesu aheera: “Yooyo nnomwaaceenyuuyo, thimiiva.”
27 Yoole ukatyuule, yahowa eetthucyaawe ni yaahokhala ootikhinihiya cinene, kontha uyova aawuulumana athiyana. Masi, khaavo ankohile co: “Unaapheelela isiyani?” awula “Kontha isiyani unwuulumanaa ala athiyanaala.”
28 Vano athiyanaayo yahohiya mwapwaayooyo vaava ni maaci, yaahorwaa usittatti ni yahowiirela apoovu co:
29 “Mwaatthi nttwee mwamoone nlopwana kihimenrye citthu cotheene kivanryaaka. Kiireke khanakhala yooyo phiri Kristu?”
30 Ayo yaahokhuma nsittattimmo ni yaahorwaa umoonanana.
31 Ceerannya citthu cotheenennyo, attharyaawe yankhanyererihaka yiiraka: “Raapi, nlyeeke.”
32 Masi uyova aheera co: “Kihaana iyoolyaaka nyuuva ihincuweleenyu.”
33 Vano, wiira wawe commo, attharyaawe yahopacera ukohana yiirelanaka: “Niireke haavo ntthu nwaanenle itthu yoopheela ulya?”
34 Yesu ahowiirela co: “Iyoolyaaka, ukhanle upanka itthu inoncivela ule kirumile ni umalihaca ntekwaawe.
35 Keera nyuuva mwaatthi nnawuulumaka wiira cihanle myeeri micese wiira uphiye ukati woohepha? Nviriyane itthu inoohimeeryaakani: Ntthukule miitho moone wiira icoolya cihottokottha* wiira cihephiye. Ukhuma nenna coo
36 namahepha ri mowaakhela nsurukhwaawe ni ri moohepha mihokorokho cookumi woohimala, wiira ule naala ni ule nohepha atteelaciye nkhayi.
37 Khweeliini, ala moolumwaala akhanle eekhweeli: Mmocooyo phinaala ni nkhwaawyooyo phinhepha.
38 Mi kihoorumani uhepha itthu ihaalileenyu ni nhaakhela citthu comaana conteko waavaraaya atthu akhwaawe.
39 Atthu enci o Samariya yaakhala ile isittattiile, yahomwaamini uyova nlattu wo itthu yoolumilyaaya athiyanaayo yiiraka: “Uyo hokihimeerya citthu cotheene civanryaaka.”
40 Vano, asamariya urwaa waya umoonanana Yesu, yahonlepela wiira akhale wamoca naayova, ni aahokhala naayo mahuku meeli.
41 Ni ayo manannaayo, atthu enci yahonkupali nlattu wo itthu yuulumilyaawe.
42 Ni atthwaayo yahowiirela athiyanaayo co: “Hi ninaamwaamini ula kahi nlattu wo itthu inihimenryeenyu paasi, kontha hiiva naasineeneehu niheewa ni nihoona wiira ula nlopwanoola moopoli ontuninyani.
43 Uvira waya mahuku meelyaayo, uyo aahorwaa u Kalileeya.
44 Yesu mwaneene yooyo, aaneeraka wiira khaavo porofeeta nottitthimihiya ncoko woowannyawe.
45 Vano, uphiya wawe u Kalileeya, atthu o Kalileeyaayo yaahomwaakhelela saana, kontha yahoona citthu caapankilyaawe u Yerusalemu nihuku nofesta, ukhala wiira ayo atthwaayo yaahaavo nno nipuronno.
46 Vano, Yesu aahoturuwela-tho u Kanaa oncoko wo Kalileeya, nwe waatatusilyaawe maaci iviinyu. Ni nwo ahomphwanya nlopwana mmoca ari nanteko aamwene, ni mwanawe uyo nlopwanooyo anwerennya, ilapo yo u Kafarnau.
47 Ukati nlopwanooyo weewilyaawe wiira Yesu hokhuma u Yuteya ni horwaa u Kalileeya, ahorwaa umoonanana ni ahonlepela wiira arwee u Kafarnau anvonihe mwanawe, ukhala wiira aahanle ukhwa.
48 Yesu aahomwiirela: “Mwaahipaceke toko woona mathoonyeero ni miiriirya, khannohala ukupali.”
49 Nanteko aamwennyooyo aheera co: “Pwiiya, nkanttwee mwanakooyo hinaaya ukhwa.”
50 Yesu ahomwiirela co: “Urweeke, mwanooyo hovona.”
51 Arwaakoono, anantekwaawe yaahowa mpaka nipuro naaryaawe nunhimeerya wiira mwanawyooyo hovona.
52 Vano, uyo ahaakoha iwoorani yaavonnyaawe mwanawyooyo. Ayo yaahomwaakhula yeeraka: “Uyo vonne ikopweeyo ncana 13 oora.”
53 Athumwaane mwaanooyo, yaahoona wiira mwaanooyo aavonile yoole ukati yeereliyaaya ni Yesu: “Mwaninyuuyo hovona.” Phimaana, ayova ni atthu otheene owapuwani waya yahomwaamini Yesu.
54 Ula phaari mwiiriirya wonayeeli Yesu waapankilyaawe ukhuma wawe u Yuteya nuurwaa u Kalileeya.
