Ihapari Comaana Cantikhiye ni Joau 6:1-71
6 Wiirannya waya nnyo citthunnyo, Yesu ahorwaa mphantte nkhwaawe wo ipahari wo u Kalileya awula u Tiperiyate.
2 Ni atthu enci yaahontthara, kontha yaanoona miiriirya uyoova caapankaawe, aavonihaka aretta.
3 Vano, Yesu ahowela wamwaakoni ni ahonkoma vaava wamoca naattharyaawe.
4 Ule ukatyuule eera aattamelaka Paasikuwa, ifesta yaayuuta.
5 Yesu uwoona wawe wiira atthu enci yeera yawaaka mpaka nipuro naaryaawe, uyo ahonkoha Filipe co: “Ninkoothuma vayi iphaawu cowaatosera atthu otheene ala?”
6 Uyo aankohile commo wiira anttehattehe, ukhala wiira ancuwela itthu yaahalaawe upanka.
7 Filipe ahaakhula eeraka: “Iphaawu co itenaariyu 200 khacinhala utosera khula ntthu usiphwanya mwaapetaasu yo iphaawu.”
8 Vano mwiitthucyaawe mmoca eehaniya Antere, ari mwanhimaawe Simau Peturu, aheera:
9 “Haavo va mwanhima rina iphaawu* thanu ni ihopa piili. Masi niireke cinaahala unitosera atthu otheene va?”
10 Yesu aheera: “Kinawuulepelani nwiirele atthwaayo yunkomace.” Nne nipuro nne yahaavo malasi menci, vano, yahonkomaca nne nipuro nne alopwana oophiyaka 5.000.
11 Yesu ahokusa iphaawu nnyo ni aholompa, umaliha wawe ulompanwo ahaakawela atthu yaari nipuro naaryaawe, itthu imocaaru yeeyo ahopanka niihopannyo ni ayo atthwaayo yahokhuura mpaka waatosa.
12 Vano, atthwaayo waatosa waya, Yesu ahowiirela eetthucyaawe co: “Nthukumanihe ipetaasu cophaawu cihanleenyo wiira cihirihakyee.”
13 Vano cennyo iphaawu thanunnyo, uthukumanihiya waya ipetaasu caahiilyaaya atthwaayo, cahocara itthuttu 12.
14 Ukati apoovwaayo woonilyaaya mwiiriirya waapankilyaawe Yesu, yahancera wuulumaca, yiiraka: “Khweeliini ula thi porofeeta aalamuliya uwa va watuninyani va.”
15 Vano, Yesu ucuwela wawe wiira atthwaayo yeera yawaaka wiira anvahacere umwene, uyo ahokhuma nuurwa-tho umwaakoni veekha-cawe.
16 Wiila waya, eetthucyaawe yahorwaaca mphantte wopahari,
17 yahokela nkalawani nuulapuwa ipahariiyo yarwaaka u Kafarnau. Wahopacera uripela ni Yesu ari hinaaya uwoonanana.
18 Ni ipahariiyo yancaca cinene kontha yanvuka iphyoo yinci.
19 Masi weettiha waya ikalaweeyo ikiloometuru cookhalaka 5 awula 6, yahomoona Yesu eettaka waculu maaci, aattamelaka nipuro naaryaaya ikalaweeyo, nlattu wo iyo itthwiiyo yahoova.
20 Masi uyo ahowiirela co: “Nhoove, thi miiva!”
21 Vano ayo yaapheela umwaakhelela nkalawani waya, masi woohipica, ikalaweeyo yahophiya nipuro naarwaaya.
22 Usa waya, atthu yaari mphantte nkhwaawe wopahari, yahoonelela wiira khayaarivo hataa ikalawa imoca. Yahaavo vale ikalawa imoca yankaani, masi Yesu khaakenle iyo ikalaweeyo nkhayi naattharyaawe, kontha attharyaawe yaakhumile veekha.
23 Vano, ikalawa co u Tiperiyate, cahaattamela nipuro caakhuuriye iphaawu Yesu umaliha wawe unlompa Nluku.
24 Vano, atthwaayo woona waya wiira Yesu wamoca naattharyaawe khayaarivo, yahokela nkalawani ni yahorwaa u Kafarnau umwaavya Yesu.
25 Umphwanya waya Yesu mphantte nkhwaawe wopahari, yahonkoha co: “Rapi, mphiile mwaani uno?”
26 Yesu ahowaakhula: “Kinoohimeeryani ikhweeli wiira: nyuuva khannakaavya nlattu wo miiriirya coonileenyu, masi nlattu wo iphaawu nkhuurileenyu mpaka wuutosani.
27 Nvare nteko wiira mphwanye iyoolya, kahi inontta masi iyoolya ihinontta, ni imphwanyiha ukumi woohimala ile inhalaawe wuuvahani mwaana Apinaatamu, ukhala wiira mwaneene Nluku honvahacera upanka iyo itthwiiyo.
28 Vano, ayo yahonkoha co: “Isiyani ninlamuliyeehu upanka wiira nipanke citthu cinoncivela Nluku?”
29 Yesu ahowaakhula eeraka: “Itthu inoncivela phiila: mmwaamini ule uyova nveleelihilyaawe.”
30 Vano, yahonkoha-tho co: “Mwiiriiryani weeva unhalaa upanka wiira noone ni nuukupali? Isiyani inhalaa upanka?
31 Amuciihu okhalayi yaholya manaa ukati yaaryaaya muuthakoni, khampa cantikhiyaaya wiira: ‘Nluku hoovahani iphaawu yo wiirimu wiira nlye.’”
32 Vano, Yesu aahowiirela: “Kinoohimeeryani ikhweeli wiira: Moceesi khoovahaleni iphaawu yo wiirimu, masi Apaapa phinoovahani iphaawu yeekhweeli yo wiirimu.
33 Kontha iphaawu ya Nluku, phiile inkhuma wiirimu ni inaavaha ukumi atthu.*
34 Ayo yaheera: “Pwiiya, nnivahase iyo iphaawiiyo.”
35 Yesu ahowiirela: “Mi kikhanle iphaawu yookumi. Ule nokitthara, khinhala unvola-tho itala, ni ule nothoonyihera ukaamini khaninhala unvola-tho ntthona.
36 Masi khampa kuuhimenryaakani, nyuuva nhokoona ni uhookhalaru commo nyuuva khannokaamini.
37 Otheene ale Apaapa anhalaaya ukivaha, anaahala uwa nipuro niryaaka, ni miiva akinhala waakhotta ale anhala uwa nipuro niryaaka.
38 Kontha kikhuruwile wiirimu kahi wiira kipanke itthu inkicivela, masi inaacivela ale akirumile.
39 Itthu inaacivela ale akirumile phiila: Ayo khampheela wiira akirimyarimye hataa ntthu mmoca akivahilyaaya, masi ampheela wiira kimunwelelihe wuumaleloni.
40 Kontha itthu impheelaaya Apaapa phiila: Khula ntthu noncuwela ni nothoonyera umwaamini mwanaya, aphwanye ukumi woohimala ni miiva kinaahala umunweleliha wiimaleloni.”
41 Vano, ayuuta yaahancera umuuluma pusya, nlattu uyo aahowiira co: “Miiva kikhanle iphaawu ikhuruwile wiirimu.”
42 Ni yahanca wiira: “Ula khanakhala Yesu, mwaana a Yusufu? Keera ninawaacuwela athumwaane ni anumwaane? Vano nowa cani eeraka: ‘Miiva kikhuruwile wiirimu?’”
43 Yesu ahowaakhula eeraka: “Mwaatthi va nhiye waapa.
44 Khaavo nohala ukitthara miiva uhikhanle wiira Apaapa akirumile anonthanla, ni miiva kinaahala umunweleliha wiimaleloni.
45 Maporofeeta ahantikha co: ‘Otheene anhala wiitthucihiya ni Yehova.’ Ule naaviriyana Apaapa ni neetthuca, nokitthara miiva.
46 Kahi wiira haavo tokile uwoona Apaapa, hikhanle ule velelihiye ni Nluku uyo hiwoonile Apaapa.
47 Kinoohimyeerani ikhweeli wiira: Ule naamini naahala uphwanya ukumi woohimala.
48 Miiva kikhanle iphaawu yookumi.
49 Amuciinyu okhalayi yaaholya manaa ukati yaaryaaya muuthakoni, masi yahokhwa.
50 Ila phiiphaawu ikhuruwile wiirimu, wiira otheene ale anhala ukhuura ahihale ukhwa.
51 Mi kikhanle iphaawu ikumi ikhuruwiile wiirimu. Ule nohala ukhuura iphaawaaka, naahala ukhala mpaka. Khweeliini iphaawu miiva invahaaka ikhanle irutthwaaka, wiira kaaphwanyihe ukumi atthu otheene.
52 Vano, ayuuta yahancera unyakulihana ayaayoru, yiiraka: “Manannani ula nlopwaanoola nohalaawe univaha irutthwaawe wiira nikhure?”
53 Vano, Yesu ahowiirela: “Kinoohimyeerani ikhweeli wiira: Nyuuva mwaahikhuureke irutthwaaka ni mwaahiwurweeke iphomyaaka, khannohala uphwanya ukumi.
54 Ule nokhuura irutthwaaka ni nowurya iphomyaaka, naahala uphwanya ukumi woohimala, ni miiva kinaahala umunweleliha wiimaleloni.
55 Kontha irutthwaaka ikhanle iyoolya yeekhweeli ni iphomyaaka ikhanle yoowuriya yeekhweeli.
56 Ule nokhuura irutthwaaka ni nowurya iphomyaaka, nawaataana ni miiva, ni miiva ciicammo kinawaataana ni uyoova.
57 Khampa Apaapa akirumile akhanlyaaya akumi, miiva kinkhalaka nkumi nlattu wo ayova, ciicammo ule nohala ukhuura irutthwaaka naahala ukhala nkumi nlattu wo miiva.
58 Ila ikhanle iphaawu ikhuruwiile wiirimu. Ila iphaawiila inaavirikana ni ile yakhurilyaaya amuciinyu okhalayi, kontha hataa ukhalaka commo ayova yahokhwa. Masi ntthu nohala ukhuura ila iphaawiila naahala ukhala mpaka.
59 Uyo oolumacile nnya citthunnya eetthucihaka nsinakoka yo Kafarnau.
60 Eetthuci enci wiiwa waya iyo itthwiiyo, yahanca wiira: “Ala moolumwaala akhanle oowereeha nrima. Tipani nohala uviriyana?”
61 Yesu ucuwelela wawe wiira atthwaayo yahanca waapa, uyo ahaakoha co: “Iyo itthwiiyo inawuutthekihani?
62 Isiyani yaahala wiirannya mwaamonne Mwaana a Pinaatamu aturuwelaka nokhumaawe?
63 Nnepa phinvaha ukumi; itthu impankaaya apinaatamu khirina ifayita. Citthu cuuhimenryaakani cikhanle comminepani ni cinaavaha ukumi.
64 Masi ahaavo ari vaava ahinkaamini.” Yesu oolumacile commo, kontha ikhumelo yo khalayi aanaacuwela ale yahaamwaamini ni ule aahala unrukunuwela.
65 Uyo aheera-tho: “Phimaana miiva kiwiirenlyaakani co: Khaavo nohala ukhitthara miiva, uhikhanle wiira Apaapa phinthanlile.”
66 Nlattu wo iyo itthwiiyo, atthu enci aawiitthucihaawe yahohiya untthara ni yahoturuwela upanka citthu yaapankaaya khalayi.
67 Vano, Yesu ahowiirela eetthuci 12 co: “Ni nyuuva ciicammo nnopheela urwaa?”
68 Simau Peturu ahaakhula: “Pwiiya, noohiyakani nyuuva ninhala utthara pani? Thi nyuuva nnohimyaca citthu cinlamuliyeehu upanka wiira niphwanye ukumi woohimala.
69 Hi ninaawaamini ni ninaacuwela wiira nyuuva nkhanle Owaarya ni nthanliye ni Nluku.”
70 Yesu ahowaakhula eeraka: “Keera phi mi kuuthanlileni otheene cinyu?” Masi, iriyariinyu, haavo namahimyahimya.”
71 Oolumacile commo, amwaacaka Yuuta, mwaana a Simau Iskariyote, kontha uyo phaahala unvariiha, hataa ukhala wiira ampanka mphantte waatthari 12.
