Ihapari Comaana Cantikhiye ni Joau 7:1-52
7 Wiirannya waya iyo itthwiiyo, Yesu aheetta ikwahaawe arwaaka u Kalileya, kontha khaapheela uvira u Yuteya, ukhala wiira ayuuta yaanonlupattha wiira amwiive.
2 Vano, yahaattamela ifesta yo Maparantta yaapankesaaya ayuuta,
3 ni asihimaawe yahomwiirela co: “Nkhume mu ni nrwee u Yuteya wiira ciicammo atthariinyu yoone citthu cimpakeenyu.
4 Kontha khaavo nopanka citthu mmwiitihoni apheelaka ucuweliya naatthu enci. Wakhala wiira nnaapanka nnya citthunnya paahi nhiivithavitheke.”
5 Khweeliini, asihimaawe khayamwaamini uyova.
6 Vano, Yesu ahowiirela co: “Ukatyaaka nanlelo khunaaya uphiya, masi nyuuva ukati wotheene nnoona ukhala womaana.
7 Atthu ontuninyani khaarina isariya yowuuthanyani, masi anaakithanya miiva, ukhala wiira kinaalalya citthu cotakhala cimpankaaya.
8 Nrwaaceke ufestaninwo; mi ankinhala urwaa, kontha ukatyaaka nanlelo khunaaya uphiya.”
9 Vano, waahimeerya wawe nnyo citthunnyo, uyo ahohala u Kalileya.
10 Masi, asihimaawyaayo urwaa waya ufestaninwo, uyo ciicammo ahorwaa, masi eevithavithaka wiira hicuweleliye.
11 Phimaana, ayuuta yahopacera umwaavya ufestaninwo, yeeraka: “Rivayi yoole nlopwanoole?”
12 Ni atthu enci yanomwaapa. Akinaayo yeera: “Uyo nlopwana omaana.” Khwaawe yeera: “Mena. Uyo nawaathepya aatthu.”
13 Khweeliini, khaavo aamuuluma waatthuni, kontha yaanooviya ayuuta.
14 Ukati weettelaaya ifesteeyo iriyari, Yesu ahokela ntempulu ni ahopacera wiitthuciha.
15 Ayuuta yahokhala ootikhinihiya, ni yaaneera: “Ula nlopwanoola nocuwelaca cani cowantikhiya cowaarya, ni ula khasomile*?”
16 Vano, Yesu ahowaakhula: “Citthu kineetthucihaaka khacinakhala caawaka, masi cikhanle caawawe ule kirumile.
17 Wakhala wiira haavo ntthu nopheela upanka impheelaawe Nluku, naahala ucuwelela wakhala wiira citthu cineetthucihaaka cikhanle ca Nluku awula cikhanle caawaka.
18 Ule nooluma citthu cinonkhuma mmuru wawe, nopheela uttottopeliya; masi ule nopheela wiira attottopeliye ule nrumile nooluma ikhweeli, ni khampanka citthu cohisariya.
19 Moceesi hoovahani nlamulo, keera? Masi khaavo nanka mmoca neettela nno nlamulonno. Kontha isiyani nnopheeleenyu ukiiva?”
20 Atthwaayo yahomwaakhula yeeraka: “We uhaana nciini. Thipani nopheela uwiiva va?”
21 Woowakhula, Yesu ahowiirela co: “Kipankile mwiiriirya mmoca paasi, masi nhotikhinihiya.
22 Vano, muupuwele co: “Moceesi hoovahani nlamulo nowuulihana (khunakhala wiira nno nlamulonno nipacenre ni Moceesi, masi wasinhiya-taateenyu), ni nyuuva nnaawuuliha alopwana nihuku nosaapatu.
23 Wakhala wiira nlopwana nawuulihiya nihuku nosaapatu wiira niiweleliye nlamulo na Moceesi, vano nlattuni nyuuva unkiviruweleenyu nlattu wonvoniha ntthu nihuku nosaapatu?
24 Nhiye unhukhumu ntthu ni citthu cinooneenyu paasi, masi munhukhumu niisariya.”
25 Vano, atthu akhwaawe yaakhala u Yerusalemu yahopacera wuuluma yeeraka: “Ula khanakhala yoole nlopwana nopheela wiiviyoole?
26 Uyo, ninamwiiwa va oolumaka waatthu ni ayo khaanompanka itthu. Niireke wiira ahooleliihwaayo ahoomoona ukhala Kristu?
27 Awaaka Kristu hi khaninhala ucuwela nipuro ninkhumaawe; masi ula nlopwanoola, ninaacuwela unkhumaawe.”*
28 Vano, Yesu eetthucihakoono ntempulu, ahokhuwela eeraka: “Nyuuva nnaakicuwela ni nnaacuwela unkhumaaka. Mi kihoorumiya, masi ule kirumile khanle okhweeli, ni nyuuva khannocuwela.
29 Miiva kinancuwela, kontha mi kiwaale mwancina naawawe ni uyo phikirumile.”
30 Nlattu wo iyo itthwiiyo, yahomananiha untthuka, masi khaavo aakhitinri unvara, kontha ukatyaawe nanlelo waari uhinaphiya.
31 Vano, atthu enci yahomwaamini, ni yaaneera: “Kristu awaaka, niireke naahala upanka miiriirya upwaha cimpankaawe ula nlopwanoola?”
32 Mafariseu yahowiiwa atthwaayo yaapaka amuulumaka Yesu, ni ahooleli aanankuttho ni mafariseu yahaaruma makwarta wiira yantthuke.
33 Vano, Yesu aheera: “Kinaahala ukhala ukati vakaani ni nyuuva, kihinaaya urwaa wa ule kirumile.
34 Nyuuva nnaahala ukaavya, masi khamunhala ukiphwanya, ni nipuro ninrwaaka nyuuva khannohala ukhitiri uphiya.”
35 Vano, ayuuta yahopacera ukohana ayaayooru yiirelanaka: “Nopheela urwaa vayi ula nlopwanoola, nihinhaleehu uphwanya? Niireke nopheela uvira awaavyaka ayuuta ari iriyari yaakereku ni wiira awiitthucihe akerekwaayo?
36 Isiyani impheelaawe uhimya wiira wawe: ‘Nyuuva nnaahala ukaavya masi khannohala ukhitiri ukiphwanya, ni nipuro ninrwaaka nyuuva khannohala ukhitiri uphiya?’”
37 Nihuku nuulupale, nihuku naamalaaya ifesteeyo, Yesu ahonwa ni ahokhuwela eeraka: “Wakhala wiira haavo ninvole ntthona, akaattamele va ni aawuryeke.
38 Toko cinhimyaaya cowantikhiya cowaarya, ‘ule nohala ukaamini miiva, wanrimani wawe anaahala uphattuwaca maaci anvaha ukumi.’”
39 Masi, oolumacile iyo itthwiiyo, aacaka nnepa wowaarya, waahalaaya waakhela ale ammwaamini; ule ukatyuule yaari ahinaakhela nnepa, kontha Yesu aari hinaaya uttitthimihiya.
40 Atthu akhwaawe wiiwa waya ayo moolumwaayo yahopacera wuuluma yeeraka: “Khweeliini ula nlopwanoola Porofeeta.”
41 Akina yeera: “Ula phiri Kristu.” Masi akina yeera: “Niireke Kristu nohala ukhumelela u Kalileya?
42 Keera cowantikhiya cowaarya cineera wiira Kristu aahala ukhumelela nloko na Davidi ni u Pelee aliteeya yaari a Davidi?”
43 Naayo manannaayo, atthwaayo yahokhala ookawannya nlattu waawawe.
44 Masi, atthu akhwaawe yahopheela untthuka, masi khaavo aakhitinri unvara.
45 Vano, makwarta yahoturuwela waahooleli aanankuttho ni mafariseu, ni yahokohiya: “Nhinwanenleni nlopwanooyo va?”
46 Makwarta yahaakhula yiiraka: “Hi khaninamoona nlopwana oolumaka khampa ule!”
47 Vano, mafariseu yaheera: “Niireke ni nyuuva mwaatthu va nhothepiya?
48 Niireke ahaavo ahooleli awula mafariseu ammwamini yooyo?
49 Ala atthu ahincuwela malamulwaala, akhanle atthu oolaphakaciya.”
50 Nikodemu aapacile umoonanana, ni ciicammo aari nfariseu, ahokoha co:
51 “Niireke nlamulo nihu ninanhukhumu ntthu hinapaca uviriyaniya wiira icuweliye itthu ipankilyaawe?”
52 Ayo yahomwaakhula yiiraka: “Niireke wiira weeva ciicammo nkalileya? Usomasome ni unaahala woona wiira khaavo porofeeta nohala ukhumelela u Kalileya.”
