Ihapari Comaana Cantikhiye ni Joau 8:12-59
8 12 Vano, Yesu ahanca uwuulumana-tho eeraka: “Mi kikhanle nthuko wo ila ituninyeela. Ule nokitthara khanhala weetta wapiphini, masi naahala ukhalana nthuko umphwanyiha ukumi.”
13 Mafariseu yahomwiirela co: “Weeva unawiivaha usaahiti; ni usaahiti unvahooyo khunakhala wokhweeli.”
14 Yesu ahowaakhula eeraka: “Hataa kiivahaka usaahiti, usaahiti unvahaaka ukhanle wokhweeli, kontha mi kinaacuwela unkhumaaka ni kinaacuwela unrwaaka, masi nyuuva mwaatthi, khannocuwela unkhumaaka ni hataa khannocuwela unrwaaka.
15 Nyuuva mwaatthi, nnohukhumu nttharaka moopuwelelo aatthu; masi mi khaavo kinonhukhumwaaka.
16 Masi hataa ukhala wiira kinaahukhumu, uhukhumu wakanwo ukhanle wokhweeli, kontha mi akiri veekha, masi Apaapa akirumile ari wamoca ni miiva.
17 Ciicammo, munlamuloni winyu uhantikhiya co: ‘Usaahiti unvahaaya atthu eeli ukhanle wokhweeli.’
18 Mi kikhanle ntthu kineevaha usaahiti ni Apaapa akirumile, anaavaha usaahityaaka.”
19 Vano, ayo yahonkoha co: “Ari vayini athumwanaayo?” Yesu ahowaakhula eeraka: “Nyuuva khannokicuwela ni khannaacuwela Apaapa. Mwaakicuwela miiva, mwaanaacuwela ciicammo Apaapa.”
20 Uyo oolumacile ala moolumwaala nari ntempulu waattamela nipuro caaryaaya ikoofiri consurukhu. Masi khaavo antthukile ukhala wiira ukatyaawe waari uhinaphiya.
21 Yesu ahoolumaca-tho eeraka: “Mi kinaarwaa ni nyuuva mwaatthi nnaahala ukaavya, masi nnaahala ukhwa niitampi cinyu. Nipuro ninrwaaka nyuuva mwaatthi-va khannohala ukhitiri uphiya.”
22 Vano, ayuuta yahanca ukohana yiiraka: “Niireke nopheela wiiciiva? Kontha isiyani enryaawe: ‘Nipuro ninrwaaka, nyuuva khannohala ukhitiri uphiya?’”
23 Uyo aholumaca-tho eeraka: “Nyuuva nkhanle atthu o va vathi va; masi mi kinkhuma wiirimu. Nyuuva nkhanle atthu o va watuninyani va; masi mi akinakhala o va watuninyani va.
24 Phimaana mi kiwiirenlyaakani co: Nyuuva nnaahala ukhwa niitampi cinyu. Kontha mwaahikaminiki, nnaahala ukhwa niitampi cinyu.”
25 Vano, ayo yahonkoha co: “Weeva thi pani?” Yesu ahowaakhula eeraka: “Kontha isiyani mpaka nna co kinwuulumanaakani?
26 Kihaana citthu cinci cowuuhimeryani ni wiira kuuhukhumuni. Khweeliini, Ule kirumile khanle okhweeli, ni citthu cimwiiwilyaaka phinaahimeeryaka atthu.”
27 Ayo khayaacuwelela wiira aawaaca Athumwaane owiirimu*.
28 Vano, Yesu ahowiirela: “Mwahalaka umweemesa Mwaana Pinaatamu, vano nnaahala ucuwela wiira miiva phiyooyo ni nnaahala woona wiira miiva akimpanka itthu inkikhumakhuma mmuru, masi miiva kinooluma ile yiitthucihiyaaka ni Apaapa.
29 Ni ule kirumile ri wamoca ni miiva; ni uyo khakihiyale veekha, kontha ukati wootheene kinaapanka inoncivela.”
30 Wuulumaca wawe nnya citthunnya, atthu enci yahancera umwaamini.
31 Vano, Yesu ahowiirela ayuuta yaamwaaminnyaayo co: “Mwaahihiyerereke weettela moolumwaaka, nyuuva khweeliini nkhanle eetthucyaaka,
32 ni nnaahala ucuwela ikhweeli ni ikhweeliiyo inaahala uwoopolani.”
33 Ayo yahomwaakhula co: “Hiiva nikhanle ucuulu wa Aparahaamu, ni khaninapaca ukhala ipottha yantthu. Vano kontha isiyani unnirelaa: ‘Nyuuva nnaahala woopwa?’”
34 Yesu ahowaakhula eeraka: “Kinoohimeeryani ikhweeli wiira: ule hinhiyerera uvara matampi nokhala ipottha yomatampi.
35 Uhiya commo, ipottha kinkhala watthokoni mpaka; masi mwanaya naakhala mpaka.
36 Phimaana, wakhala wiira mwaanooyo naawoopolani, nyuuva khweeliini nnaahala ukhala owoopwa.
37 Kinaacuwela wiira nyuuva nkhanle ucuulu wa Aparahaamu; masi nnaakaavya wiira nkiive, kontha khannokupali moolumwaaka.
38 Mi kinooluma citthu koonilyaaka ukati waaryaaka ni Apaapa, masi nyuuva nnooluma citthu ciwiiwileenyu apaapeenyu.”
39 Ayo yahomwaakhula yiiraka: “Apaapeehu akhanle Aparahaamu.” Yesu ahowiirela: “Nnari asaana a Aparahaamu, mwanhala untakiha Aparahaamu citthu aapankaawe.
40 Masi nyuuva mwaatthi nnopheela ukiiva, mi kikhanle ntthu oohimenryeni ikhweeli cimwiiwilyaawe Nluku. Aparahaamu, khaapanka commo.
41 Nyuuva mwaatthi nnopanka citthu cimpankaaya apaapeenyu.” Ayuutaayo yaheera: “Hi khaniyariyeetthu muuraruwani,* nirina apaapeehu amoca paasi, Nluku.”
42 Yesu ahowiirela: “Unari wiira Nluku phiri apaapeenyu, nyuuva mwaatthi mwanhala ukifenta, kontha mi kinkhuma wa Nluku ni kiri vaa. Mi akiwile wootthuna waka, masi uyo phikirumile wiira kiwe.
43 Kontha isiyani nyuuva mwaatthi nhineeweeheenyu itthu impheelaaka uhimya? Kontha nyuuva mwaatthi khannokhitiri wiiwa moolumwaaka.
44 Nyuuva nkhanle asaana a Tiyapu ni nnopheela upanka citthu cinaacivela apaapeenyu. Ikhumelo ukati umootherihilyaawe Nluku uyo khanle namwiiva, ni hohiya weettela ikhweeli. Ukati noothaawe, nooluma citthu ciri wanrimani wawe, kontha uyo khanle namoothi ni athumwanaya wootha.
45 Masi ukhala wiira miiva kinoohimeerya ikhweeli, nyuuva mwaatthi khannokaamini.
46 Tipani va iriyariinyu nohala woonihera wiira mi kihovara matampi? Mi kinoohimeeryani ikhweeli. Vano, kontha isiyani nhinkikupaliinyu?
47 Ntthu a Nluku nawiiwelela moolumo a Nluku. Nyuuva mwaatthi-va khannakhala atthu a Nluku, phimaana khanneewelela moolumwaawe.”
48 Ayuutaayo yahomwaakhula yiiraka: “Woonela waa weeva, hiiva khanirina isariya yowiira weeva ukhanle nsamariya ni uhaana nciini?”
49 Yesu ahowaakhula eeraka: “Mi akirina nciini hataa nimoca, masi kinaattitthimiha Apaapa, ni nyuuva mwaatthi nnaakiveeha.
50 Mi akinaavya wiira kittitthimihiye; Nluku phinpheela wiira kittitthimihiye, ni uyo phinhukhumu.
51 Kinoohimeeryani ikhweeli wiira: Ntthu eewelelaka moolumwaaka uyo ntthuuyo khanhala ukhwa.”
52 Ayuutaayo yahomwiirela co: “Vano nihokupali wiira weeva uhaana nciini. Aparahaamu hokhwa, ciicammo maporofeeta ahokhwa, masi weevano uneera: ‘Ntthu eewelelaka moolumwaaka, uyo ntthuuyo khanhala ukhwa.’
53 Niireke weeva ukhanle muulupale waapwaha apaapeehu Aparahaamu akhwile? Maporofeeta ciicammo ahokhwa. Vano we uneecoona ukhala pani?”
54 Yesu ahaakhula eeraka: “Mi keettitthimihaka vale, wiittitthimiha wakanwo khunkhalana ifayita. Apaapa phinkittitthimiha, ale nnaahimyeenyu nkhala Nlukweenyu.
55 Masi nyuuva mwaatthi, khannaacuwela. Masi miiva kinawaacuwela. Masi kinenre akinaacuwela, kaahala ukhala namootha khampa nyuuva mwaatthi. Masi mi kinawaacuwela ni kinawiiwelela moolumwaaya.
56 Aparahaamu, apaapeenyu, yahotteeliya venci uweherera nihuku naahalaaka uwa, ni ayo yahoona ni yahotteeliya.”
57 Vano, ayuutaayo yahomwiirela Yesu co: “We khunapiihera myaakha 50 masi uneera wiira uhomoona Aparahaamu?”
58 Yesu ahowiirela: “Kinoohimeeryani ikhweeli wiira: Aparahaamu hinaaya uyariya, mi kaahaavo.”
59 Wuulumaca wawe commo, ayo yaholokottha maluku wiira avonyakace, masi Yesu aheepitha ni ahokhuma ntempulummo.
