Ihapari Comaana Cantikhiye ni Luka 1:1-80
-
Moolumo oopacera yantikheliyaawe Tiyoofilo (1-4)
-
Nlayikha Kapriyeeli ninaahimya wiira naahala uyariya Joau Mpattisa (5-25)
-
Nlayikha Kapriyeeli ninaahimya wiira naahala uyariya Yesu (26-38)
-
Maria nanthotola Elisabete (39-45)
-
Maria nanttottopela Yehova (46-56)
-
Joau naayariya ni naavahiya ncina (57-66)
-
Inatiri ya Zakariya (67-80)
1 Atthu enci aheekurumica wantikha myaha hiiva ninkupaliihu,
2 toko cihimeeriyeehu naale yoonile, ikhumelo wiipaceroni citthu cotheene ciirannyaaka ni yaalalyeera ihapari.
3 Ni miiva ciicammo, umaliha waka utotha citthu cotheene sana-saana ikhumelo wiipaceroni, kiholakela uwantikhelani nyuuva nimananna omaana, akhulupale Tiyoofilu,
4 wiira nkupaleehe citthu ciitthucihiyeenyu.
5 Ukati wa Herooti, mwene o Yuteya, ahaavo nankuttho eehaniya Zakariya, aapanka mphantte yo ikhurupu ya Apiyasi. Amwaarawe yaari mwaana a Arawu, ni yeehaniya Elisabete.
6 Ni ooyeeli, yaaneettela isariya uhoolo wa Nluku ni yaaneettela sana-saana malamulo a Yehova.
7 Masi ayo khayaarina asaana, kontha Elisabete khaayara ni ooyeeli yaahooluvala.
8 Zakariya eera anvarelaka nteko Nluku woonankuttho, waavahaceriyaawe nkhayi ni ikhurupwaawe.
9 Toko caalemaleliyaaya, waahophiya ukati Zakariya waahalaawe urwaa umpaha lumpani ntempulu ya Yehova.
10 Apoovu otheene yaari vate, yanlompa iwoora yaapahiyaaya ilumpani.
11 Vano, nahonkhumelela nlayikha na Yehova, neemenle moono wonlopwana wonipuro naapahiya ilumpani.*
12 Masi, Zakariya woona wawe, ahosanka ni ahoova cinene.
13 Vano, nlayikhanno nahomwiirela: “Uhoove Zakariya, kontha mavekelwaa aheewiya, ni amwaaraa, Elisabete, anaahala unyara mwaana ni unvahe uyo mwaanooyo ncina Joau.
14 Weeva unaahala utteeliya nrima venci, ni ciicammo, atthu akhwaawe unaahala waatteela nrima nlattu wooyariya uyo mwaanooyo,
15 kontha uyo mwaanooyo nohala ukhala muulupale wamiithoni wa Yehova. Masi uyo khanlamuliya uwurya iviinyu ni hataa nipha nikhwaawe, unaahala umwinciva nnepa wowaarya, hataa hinaaya uyariya,
16 ni naahala waakavihera asarayeli enci unturuwela Yehova, Nlukwaaya.
17 Uhiya commo, Nluku naahala unveleeliha ninnepa wowaarya ni niikuru khampa caarinaawe Eliyasi, wiira ayari arukunese mirima caya, cikhale toko caasaana, ni wiira awiirihe atthu oohiiwelela ukhalana ucuwelaca waanasariya, wiira aakavihere atthu unswalela Yehova.”
18 Zakariya aheerela nlayikhanno co: “Kinhala ukupali cani iyo itthwiiyo? Kontha miiva kihooluvala ni amwaaraka ciicammo ahooluvala.”
19 Nlayikha nahomwaakhula: “Mi Kapriyeli ni ukati wotheene kineemela uhoolo wa Nluku; kihoorumiya wiira kiwuulumane ni wiira kuuhimeerye ihapari comaana.
20 Masi, nlattu woohikupali moolumwaaka anhala wiirannya nihuku nithanliye, khunhala wuulumaca-tho, mpaka cinhalaaya wiirannya nnya citthunnya.”
21 Nanlelo, apoovu yaanonweherera Zakariya ni yahokhala ootikhinihiya, kontha uyo ahopica cinene ntempulu.
22 Ukhuma wawe ntempulu, uyo khaakhitiri uwuulumana atthwaayo, ni ayo yahocuwelela wiira uyo ahoona itthu yootikhiniha ntempulu. Woohimya itthu, anthoonyaca ni khaakhitiri wuulumaca.
23 Umalihera wawe mahuku oovara nteko ntempulu, ahoturuwela uwaani.
24 Uvira waya mahuku vakaani, Elisabete, amwaara a Zakariya, yahorupala irukulu ni yahoviriha myeeri 5 woohikhuma wapuwani; ni ayo yeera:
25 “Ala akhanle mananna Yehova ankiwaceraawe ala mahukwaala. Uyo hoturuwela ukiwacera wiira amalamalihe ihaaya caka uhoolo waapinaatamu.”
26 Uvira waya myeeri 6 Elisabete narupanle irukulu, Nluku ahoruma nlayikha Kapriyeli urwaa isittatti yo Kalileya, yeehaniya Nasaree,
27 wiira namuulumane mwaaruusi mmoca aapakaneliye ninlopwana eehaniya Yusufu, aayariye nloko na Davidi, ni uyo mwaarusyuuyo eehaniya Maria.
28 Nlayikhanno nahokela mpaani wa Maria ni nahomwiirela co: “Kinawuusalaamiha, weeva nthiyana oocaalihiya, Yehova ri niweeva!”
29 Maria ahokhala ootikhinihiya venci ni moolumo yoolumilyaaya nlayikha, ni ahomananiha ucuwela itthu yaataphulelaaya mananna yaasalamihiyaawe.
30 Nlayikha nahomwiirela: “Maria, uhoove, kontha Nluku hoocaaliha weeva.
31 Vano, unaahala urupala irukulu ni unaahala unyara mwaana mwanlopwana ni uhaana unvaha ncina Yesu.
32 Uyo norwaa ukhala nkhulupale ni norwaa wiihaniya mwaana a Nkhulupale ooverihela, ni Yehova Nluku, naahala unvaha ihice ya Davidi, athumwaane,
33 ni uyo nohala ukhala Mwene itthoko ya Yakopi mpaka, ni Umwennyaawe khunhala-tho umala.”
34 Maria ahaakhula nlayikhanno: “Inhala wiirannya cani iyo itthwiiyo ni miiva akinatoko urupa ninlopwana?”
35 Nlayikhanno nahomwaakhula, neeraka: “Nnepa wowaarya unaahala ukhala niweeva ni ikuru ca Nkhulupale ooverihela cinaahala wuukavihera. Phimaana, mwaana unhalaa unyara nohala ukhala owaarya ni nohala wiihaniya mwaana a Nluku.
36 Ni mmucyaa Elisabete, nocuweliya ukhala nthiyana oohiyara, ciicammo horupala irukulu ni nna co irina myeeri 6, ni naahala uyara, hataa ooluvalaka.
37 Kontha khiivo itthu inkhuluvelihaawe Nluku ihinhala wiirannya.”
38 Vano Maria aheera: “Miiva kikhanle ipottha ya Yehova! Ikiirannyeele ile ihimileenyu.” Vano, nlayikhanno nahorwaa.
39 Yaayo mahukwaayo, Maria ahokhuma wowaakuvyaa arwaaka ncoko woomwaakoni, isittatti yo Yuuta,
40 ni ahophiya uwannyawe Zakariya ni ahonsalaamiha Elisabete.
41 Elisabete umwiiwa wawe Maria ansalaamihaka, mwaana aari mmirimani wawe aheenyeenya, ni Elisabete wahoncara nnepa wowaarya
42 ni ahokhuwela eeraka: “Oocaalihiya ukhanle thi weeva waapwaha athiyana otheene, ni oocaalihiya khanle mwaana ri mmirimani waa!
43 Ikhanle iparakha yuulupale uwa wootoliya naanumwanaya Apwiiyaaka.
44 Kontha ukati ukisalaamihilyaa, mwaana ri mmirimani waka heenyeenya nlattu wootteeliya.
45 Ootteeliya thi weeva waaminni, kontha citthu cotheene cikhuluvelihiyaa ni Yehova, cinaahala wiirannya.”
46 Vano, Maria aheera co: “Nrimaaka unanttottopela Yehova,
47 ni nrimaaka khunhiya ukhala wootteeliya, nlattu wa Nluku, Moopolyaaka,
48 kontha uyo hoona uhuva waka miiva kikhanle ipotthaawe. Ukhuma ilelo mpaka wahoolo, atthu omaloko otheene anhala ukiihana ootteeliya,
49 kontha Nluku Okuru cotheene hokipankela citthu cuulupale, ni ncina nawe nikhanle nowaarya,
50 ni ukati wotheene, uyo naawoonela ikiriri atthu ammoova.
51 Uyo hovarela nteko ikuru cawe wiira apanke citthu cuulupale ni aamwaruse atthu owiithenca.
52 Uyo haakumiha wahiceni atthu owiicoona ni howeesa atthu owiiyeviha;
53 uyo haavoniha atthu yaavoliye itala, ciicammo howoomola atthu yaari mathaciri, woohikusa itthu.
54 Uyo ahowoopola asarayeli, nlattu woowoonela ikiriri,
55 nlattu wa Aparahaamu ni ucuulwaawe, khampa caakhuluvelihiyaawe.”
56 Maria ahoviriha myeeri cookhalaka miraru uwannyawe Elisabete, ni vano ahoturuwela uwannyawe.
57 Vano, wahophiya ukati wooyara Elisabete ni uyo ahonyara mwaana mwanlopwana.
58 Atthu yaawaattamanannyaawe ni amucyaawe wiiwa waya wiira Yehova ahomoonela ikiriri, yahotteeliya venci nkhayi nuuyova.
59 Upiiha wawe mwaanooyo mahuku 8, ahorwaa umuuliha ni unvaha ncina naathumwaane, Zakariya.
60 Masi anumwaane yaheera: “Mena! Ula ncina nawe Joau.”
61 Nlattu wowiira commo, atthwaayo yahomwiirela co: “Khaavo wanlokoni winyu rina nno ncinanno.”
62 Vano, yahokohiya athumwaane yuulumaniyaka nimatata, wiira yaapheela eehaniyeke cani mwaanooyo.
63 Ayo yaholepela ithaapwa yankaani ni yahantikha: “Ncina nawe Joau.” Vano atthu otheene yahokhala ootikhinihiya.
64 Yooyo ukatyuuyo, ahopacera wuulumaca, anttottopela Nluku.
65 Ni atthu otheene yaamwaattamananne yaahoova ni yahopacera wuuluma nnya citthu caakhumelenlennya ncoko wotheene woomwaakoni wo Yuuteya.
66 Ni atthu otheene yeewile nnyo ihaparinnyo yaaneekoha, yeeraka: “Ula mwaanooyo oonuwaka nohala ukhala pani?” Kontha khweeliini, ikuru ca Yehova caari ni uyova.
67 Vano, Zakariya athumwaane Joau, wahaacara nnepa wowaarya ni yahopanka inatiri, yeeraka:
68 “Oottottopeliya akhale Yehova, Nluku o Isarayeli, kontha howoonela uthunku apoovwaawe ni howoopola.
69 Ni uyo honiwiihera moopoli okuru nokhuma nloko na Davidi, nswalyaawe,
70 toko caahimilyaawe aavarelaka nteko maporofeetaawe okhalayi,
71 wiira anoopole mmatatani waawananiihu ni waale otheene annithanya;
72 wiira anoonele ikiriri yaakhuluvelihilyaawe asipaapeehu okhalayi ni wiira oopuwele nleehano naapankilyaawe,
73 nanlaphenlyaawe Aparahaamu, anhiya ataateehu,
74 yoonivaha iparakha yonswalela nihoovaka itthu, nanooponleene mmatatani waawananiihu,
75 nikhuluvelyaaka uhoolo wawe ni neettelaka isariya mahuku otheene ookumiihu.
76 Masi weeva mwanaka, unhala wiihaniya porofeeta a Nkhulupale ooverihela, kontha Yehova naahala wuuhooleliha, wiira utthenkace iphiro,
77 ni wiira waakavihere apoovwaawe ucuwela woopoliya waya, nlattu wooleveleliya itampi caya,
78 nlattu woonoonela ikiriri Nlukweehu. Nlattu wo iyo ikiririiyo, ninaahala unimwaleela ncuwa ninkhuma wicisu,
79 wiira naamwaleele ale yunkomile wapiphini ni wantthuucini no nookhwa, ni wiira nihoolele inyaa cihu iphiro yonnema.”
80 Uyo mwaanooyo ahoonuwa ni ahokhala oolipa nhina mminepani. Ni aakhala muuthakoni mpaka waaphilyaaya ukati woorwaa waalalyeera apoovu o Isarayeli.
Notas
^ Awula: “wokhilompe.”
