Ihapari Comaana Cantikhiye ni Luka 10:1-42
-
Yesu nawaaruma attharyaawe 70 urwaa ulalyeera (1-12)
-
Masakha anhalaaya atthu ankhala isittatti cihithoonyihenre uttharuwa (13-16)
-
Atthari 70 anaaturuwa wuulalyeerani (17-20)
-
Yesu nawaattitthimiha athumwaane nlattu wowaakavihera atthu owiiyeviha(21-24)
-
Nlattanihero nanlopwana mmoca ooreera nrima o Samariya (25-37)
-
Yesu naarwaa unthotola Marta ni Maria (38-42)
10 Vano, Apwiiya yahaathanla atthari 70 ni yahaaruma eeli-eeli, yaahoolelihaka isittatti ni mapuro otheene uyo caahalaawe urwaa.
2 Vano, uyo aahowiirela coo: “Iyoolya yoopheela uhephiya, khweeliini khimala, masi ananteko ari vakaani. Phimaana, mwaalepele aneene imatta wiira awaavye ananteko oohala uhepha mmattani waya.
3 Nrwee! mi kinooveleelihani toko ikhontwaa iriyari yaamwiici.
4 Nhikuse nrupa wonsurukhu, nrupa wocitthu cikhwaawe, hataa isantaaliya ni nhinsalaamihe ntthu mparapaarani.
5 Inupa phiinupa inhaleenyu ukela, mpacere wiira: ‘Nikhale nnema ila inupeela.’
6 Ni iyo itthokweeyo, akhalaka mpatthani onnema, nnema ninyu ninaahala ukhala nuuyo, masi aahikhaleke, nnema ninyu ninaahala wuuturuwelani.
7 Vano, nkhale iyo inupeeyo, nlye ni nwurye citthu cotheene cinhaleenyu uvahiya, kontha nanteko unamphwanela uliviya. Nhithame iyo inupeeyo nrwaaka inupa ikhwaawe.
8 “Ciicammo, isittatti phiisittatti nnohaleenyu ukela ni atthwaayo awaakhelelakani, nlye citthu cotheene nnohaleenyu uvahiya,
9 mwaavonihe aretta otheene nnohaaleenyu waaphwanya iyo isittattiiyo ni nwiirele: ‘Umwene wa Nluku uri vakhiviru ni nyuuva.’
10 Isittatti phiisittatti nnohaleenyu ukela atthwaayo ahiwaakhelelakani, nkhumele mmaparapaarani waya cuulupale ni mwiire:
11 ‘Hi ninaahala ukukuttha ntthupi nonsittatti winyu niri nnyaani wihu, wiira nuuvaheni usaahiti. Masi ncuwele wiira umwene wa Nluku uri wakhiviru.’
12 Kinoohimeeryani ikhweeli wiira: Nihuku Nohukhumu ya Nluku, citthu coohinamaana cinhala wiirannya iyo isittattiiyo, cinaahala utepa utakhala uvikana citthu cinhala wiirannya isittatti yoo Sotoma.
13 “Nhotakhaliya nyuuva atthu o Korasi wamoca ni atthu o Petesaayita! Kontha citthu cootikhiniha ciirannyeele isittattiinyu, cineerannyaale isittatti yo Tiro ni yo Sitoni, atthu onnyo isittattinnyo yanhala uttharuwa, yawaraka isaakhu ni yonkomaka wattuurani.
14 Phimaana, citthu cinhala wuukhumelelani nihuku nohukhumu, cinhala ukhala coowerya cinene uvikana cinhala wiirannya isittatti yo Sotoma.
15 Ni nyuuva atthu nnokhala isittatti yoo Kafarnau, nnooniha toko nnaahala uttitthimihiya mpaka wiirimu? Mena, khannohala uttitthimihiya, nyuuva nnaahala ukhwa!
16 “Ule nowiiwelelani ciicammo naakiwelela, ule hinoowacerani ciicammo khankiwacera.Uhiya commo, ule hinkiwacera khanonwacera ciicammo Ule kirumile.”
17 Attharyaawe 70 yahoturuwa anatteeliye nrima, yeeraka: Pwiiya, hataa ciicammo maciini anaaniiwelela nlattu woovarela nteko ncina ninyu.”
18 Vano, uyo aahowiirela: “Kinaamoona Sotwani namonre, khampa itari.
19 Mwiiwelele: Mi kihoovahani ukhulupale wiira nnyakele inwaa, ikhavi ni kihoovahani ukhulupale wiira mwaattheme awananiinyu, ni khiivo inhala wuupankani pusya.
20 Nhitteeliye nlattu womaciini anaawiiwelelani, masi ntteeliyeke nlattu wiira macineenyu ahantikhiya wiirimu.”
21 Yooyo ukatyuuyo, Yesu waahoncara nnepa wowaarya ni ahotteeliya venci, ni aheera: “Kinawuuttottopelani waatthuni, Apaapa, Apwiiyaaka ooculu ni oovathi, kontha nhaavithela nnya citthunnya acuwelaci ni anamasoma, masi nhaathoonyera atthu ankhala khampa anamwane. Iyeeni Paapa, kontha coo, phuucivenlyaayani upanka nnya citthunnya.
22 Citthu cotheene kivahiye ni Apaapa. Ni khaavo noncuwela sana-saana mwaana ciryaawe, ahikhanle athumwaane, ni khaavo naacuwela athumwaane ciryaaya hikhanle mwaanooyo ni ule nohalaawe mwaanooyo uncuweliha.”
23 Vano, Yesu aahorukunuwa ni ahaaweha attharyaawe, ni aheera: “Ootteeliya phaale anoona nnya citthu nyuuva nnooneenyu.
24 Masi kinoohimyeerani ikhweeli wiira Maporofeeta enci ni mamweene yanswalela Nluku yaanaapheela woona nnya citthunnya,, masi khayoonale, ni yampheela wiiwa masi khayiiwile.”
25 Vano, nlopwana mmoca oocuwelaca nlamulo, aaheemela wiira anttehattehe Yesu ni ahonkoha, eeraka: “Mwiitthucihi, kipankeke isiyani wiira kiphwanye ukumi woohimala?”
26 Yesu ahomwaakhula eeraka: “Yantikhiye isiyani munlamuloni? Weeva unsoma cani?”
27 Nlopwanooyo, ahaakhula eeraka: “Unfente Yehova Nlukwaa ninrimaa wotheene, nuukumyaa wotheene, niikuru caa cotheene, nimoopuwelelwaa otheene ni unfente nkhunanaa khampa cineefentaa.”
28 Woomwaakhula, Yesu aaheera: “Uhaakhula saana; uhihiyerere upanka iyo itthwiiyo ni unaahala waakhela ukumi woohimala.”
29 Apheelaka wiithoonyera ukhala nasariya, nlopwanooyo ahonkoha Yesu, eeraka: “Tipani khanle nkhunanaka?”
30 Yesu ahomwaakhula, eeraka: “Nlopwana mmoca, aakhuma u Yerusalemu arwaaka u Jeriko, ahophwanyiya naanammalukuni ni ayo yaahomwaakha citthu cotheene caarinaawe ni yaahomwaattakaca ni yanhiyale ahaleelaka vakaani ukhwa.
31 Vano, nankuttho mmoca, aahovira iyo iparapaareeyo, masi umoona wawe aahowiira unhapuwa.
32 Ciicammo, aahovira nlevita mmoca iyo iparapaareeyo, umoona wawe, aahowiira unhapuwa.
33 Masi nlopwana mmoca o Samariya apankaka nkwahaawe, aahovira iyo iparapaareeyo ni ahomphwanya nlopwanooyo, ni umoona wawe, ahomoonela ikiriri.
34 Vano, ahomwaattamela ni unhela makhura ni iviinyu mmakhwattani wawe. Vano unweliha mmwanamani wawe ni ahonrwaana nipuro naakheliya aletto ni wancera unwacera.
35 Waaseele, aahokumiha itenaariyu piili, unvaha mwaneene inupa yaakheliya aletto ni aahomwiirela: ‘Unwacere ula ni yotheene unhalaa urihakaca unwaceraka kinaahala wuuliva katuruwaka.’
36 Iriyaryaaya ayo alopwana ararwaayo, tipani thoonyenre ukhala nkhunanawe nlopwana aattakaciye naanammalukuni?”
37 Uyo nlopwanooyo aahakhula, eeraka: “Phuule aamonenle ikiriri ni nunwacera.” Yesu ahomwiirela: “Urwee, wapanke itthu imocaaru.”
38 Arwaacaka uhoolo, yaahokelaca aliteeya amoca ni nwo, ahaavo nthiyana eehaniya Marta, ni aahomwaakhela Yesu wapuwani wawe.
39 Marta ahaana mwanhimaawe mmoca, eehaniya Maria, onkomile ni Apwiiya eewelelaka citthu caahimyaaya.
40 Masi Marta, aheetthaala avaraka citthu cikhwaawe. Vano ahomwaattamela Yesu, ni ahomwiirela: “Pwiiya, khannona wiira mwanhimaaka nookihiyera veekhaaka nnya mitekonnya, uyo nonkomile? Mmwiirele wiira awe aakikavihere.”
41 Woomwaakhula, Yesu aahomwiirela: “Marta, Marta weeva uri niiwasiwasi ni unaapheela utthenkaca citthu cinci.
42 Masi citthu vakaani paasi, cinaatosa awula imoca paahi. Masi Maria, hothanla itthu yomaana ni iyo itthwiiyo, khaavo nohala umwaakha.”