Ihapari Comaana Cantikhiye ni Luka 11:1-54
11 Ikwaha imoca, Yesu anlompa ni umaliha wawe ulompa, nttharyaawe mmoca ahomwiirela: “Pwiiya, nniitthucihe ulompa toko Joau ciwiitthucihilyaawe attharyaawe.”
2 Vano, uyo ahowiirela: “Ukati wotheene nnohaleenyu ulompa, mwiire: ‘Apaapeehu, nihisimiye ncina ninyu. Umweneenyu uwe.
3 Nnivahe iyoolya yo khula nihuku, toko cinhaleehu upheela nno nihukunno.
4 Ni nnilivelele coottheka cihu, kontha hiiva ciicammo ninawaalevelela ale anitthekela; ni nhinihiyerere nattehiyaka.’”
5 Vano, uyo ahowiirela: “Muupuwele nyuuva nnarina mpatthaniinyu ni nnaarwaa uhiyu iriyari ni nnaamwiirela: ‘Mpatthani, kinaawuulepela ukaacimiha iphaawu tthaaru,
6 kontha mpatthannyaaka hoowa ni nokhuma uttayi, vano mi akirina itthu yonvaha.’
7 Masi uyo naakhula nari mpaani: ‘Uhikinyoonyihe. Nkhorooyo uhotthukiya ni asaanaaka ni miiva nihiicaatalela.’ Akinlamuliya wunwa wiira kuvaahe itthu.
8 Kinoohimeryani wiira: Uyo naahala wunwa wiira anvahe citthu cotheene cimpheelaawe, khunakhala wiira nlattu wookhala mpatthannyaawe, masi nlattu wookhanyerera wewa ni uhihiyerera ulepela.
9 Phimaana, kinwiirelani co: Nhihiyerere ulepela ni nnaahala uvahiya; nhihiyerere utotha ni nnaahala uphwanya; nhihiyerere waatta nkhora, ni nnaahala uhuleliya.
10 Kontha ule nolepela, naahala uvahiya; ule nototha, naahala uphwanya; ni ule naatta nkhora, naahala uhuleliya.
11 Khweeliini, nnyarini nohala ulepeliya ni mwanawe ihopa, phinvahaka inwaa, uhiya unvaha ihopa?
12 Awula ciicammo, nolepeliya ni mwanawe nooce masi phinvahaka ikhavi?
13 Vano toko nyuuva nnokhitiriinyu waavaha asaaneenyu citthu comaana hataa nkhalaka atthu ootakhala nrima, Apaapa owiirimu ciicammo, aanaahala waavaha nnepa wowaarya ale anhala waalepela!”
14 Wahoolo waya, uyo ahoomola maciini yahankhitiriha wuulumaca nlopwana mmoca. Woomola wawe maciinnyaayo, nlopwanooyo ahopacera wuulumaca ni atthwaayo yahokhala ootikhinihiya.
15 Masi, atthu akiina yaaheera: “Uyo nokhitiri woomola maciini akaviheriyaka ni Pelsepu, nhooleli omaciini.”
16 Ni atthu akiina, wiira anttehattehe yahopacera unlepela nthoonyero nowiirimu.
17 Ucuwela wawe itthu yoopuwelaaya atthwaayo, uyo aahowiirela: “Umwene uneekawaniha, unaamalamala ni inupa ineekawanihaca, inaamora.
18 Inanna imocaaru, Sotwani eekawanihaka mwaaneennyaawe, umwennyaawe unhala ulipa cani? Kontha nyuuva nneera wiira mi kinoomola maciini nlattu wa Pelsepu.
19 Wakhala wiira miiva kinoomola maciini kakaviheriyaka ni Sotwani, vano asaaneenyu anoomola yakaviheriya naani? Nlattu wo yeeyeeyo, phinhalaaya ayo wuuhukhumuni.
20 Vano, wakhala wiira kinoomola maciini kikaviheriyaka ni ikuru ca Nluku, khweeliini Umwene wa Nluku uhoophwanyani.
21 Nlopwana oolipa, akhalaka niikaruma cawe cokhotto, naakhikicera inupaawe ni mihakhu cawe.
22 Masi, awaaka ntthu oolipa umphwaha uyo antuphelaka ni ankhitiriki, naamwaakha ikaruma cawe cotheene cokhotto caakhuluvelaawe ni naakawaniha citthu cimwaakhilyaawe.
23 Ule hiri mphanttyaaka, khanle nwanannyaaka, ni ule hinthukumaniha ni miiva, nawaaca umwarusa.
24 “Nciini nakhumaka mwiirutthuni wantthu, nno ninaweetteetta muuthakoni naavyaka nipuru noomumula ni naahiphwanyeke nipuro, nno ninawiira: ‘Kinaaturuwela inupa kinkhumaaka.’
25 Ni naphiyaka inupa yaathamilyaaya, ninaaphwanya inakwecakweciye ni inareerihaciye.
26 Vano, nno ninaakhuma ni ninaarweela maciini makiina 7, ootepa utakhala uvikana nno ni anaakela iyo inupeeyo, ni anaakhala mommo. Makhalelwaawe uyo ntthuuyo anaatepa utakhala uvikana makhalelo oopacera yaarinaawe”
27 Ukati Yesu woolumaawe iyo itthwiiyo, nthiyana mmoca aari iriyari yaatthu aahokhuwela, eeraka: “Ooreeriya khanle nthiyana ooyanre ni waamwihile!”
28 Masi uyo aheera: “Mena, ooreeriya phaale aneewa Nuulumo na Nluku ni aneettela!”
29 Ukati waatepaaya ucarana atthu, Yesu aheera: “Ala atthu ootakhala nrimaala aanaavya nthoonyero; masi khanhala wooniheriya hataa nthoonyero mmoca, nihikhanle nthoonyero na Jonas.
30 Kontha, toko Jonas waakhanlyaawe nthoonyero naatthu o Niinive, mwaana apinaatamu, naahala ukhala nthoonyero naya ala atthwaala.
31 Apwiyamwene oohitto ilapo, anaahala wunwelelihiya wamoca naatthu omahukwaala ni anaahala waahukhumu, kontha ayo yahokhuma ncoko woottayi wiira yiiwe ucuwelaca waarinaawe Salomau. Masi vano, va haavo ntthu ofayita cinene unvikana mwene Salomau.
32 Atthu o Niinive anaahala wunwelelihiya nkhayi naala atthwaala ni urwaa waahukhumu, kontha ayo, yaahottharuwa ukati Jonas waalalyeenryaawe. Masi nna co haavo ntthu muulupale umpwaha Jonas.
33 Ntthu aparihelaka nthuko, khaneesa nipuro nowiipithya ni hataa vathi waya isestu, masi neesa waculu wiira atthu otheene ankela mpaani waamwaleele.
34 Miithweenyu anlikanaca niilampata. Miithweenyu yapharelaka irutthwiinyu yotheene inaahala woonnya, masi mwakhalanaka nttima irutthwiinyu yotheene inaaripela.
35 Phimaana, ratta, wiira nhihiyerere nthuko urineenyu ukhalaka uttiphyaaka.
36 Phimaana, irutthwiinyu yotheene yamwaleeliyaka, ihikhalanaka ipiphi, inaahala waarya toko nthuko unoomwaleelaayani.”
37 Umaliha wawe Yesu uhimya iyo itthwiiyo, nfariseu mmoca ahonlepela wiira anlyane uwannyawe. Vano, Yesu ahorwaa ni ahonkoma wa meeca.
38 Masi, nfarisewaayo ahokhala ootikhinihiya woona wawe wiira Yesu aalya woohinyawa.
39 Masi Apwiiya yahomwiirela: “Nyuuva mafariseu, nnorapiha ikoopu ni iparatho vate waya paasi, masi nhina winyu nhoocarana ikhwilu ni utakhala nrima.
40 Alolo! Khannocuwela wiira ule pankile mphantte woovate, hopanka ciicammo mphantte wonhina?
41 Phimaana, mwaavahe amasikhini itthu iri wanrima winyu ni citthu cotheene cirineenyu cinaahala ureerihiya.
42 Nhotakhaliya nyuuva mafariseu, kontha nnaavaha micanko co ile ineehaniya ortela, aruta ni mataakhuru makhwaawe, masi nnaahiya weettela isariya ni ufenta wa Nluku. Nnyo citthunnyo nyuuva mwaahaana mpankaka, masi woohihiya weettela citthu cikhwaawe.
43 Nhotakhaliya nyuuva mafariseu, kontha wuucivelani wonkoma ikhatera coohoolo consinakooka ni usalaamihiya mapuro ari atthu enci.
44 Nhotakhaliya nyuuva, kontha nnokhala toko mahiye oorika ucuwelela ni aneettakaciya waculu waya woohicuweleliya”
45 Vano, anamacuwelaca nlamulo yahomwaakhula, yeeraka: “Mwiitthucihi, moolumacaka nnyo citthunnyo, hiiva ciicammo nnaaniveeha.”
46 Vano, Yesu ahowaakhula, eeraka: “Nhotakhaliya nyuuva ciicammo, anamacuwelaca nlamulo, kontha nnawaavaha atthu mirintti cuulupale, coorika uteesa, masi nyuuva mwaasineeneenyu, khannokwanya hataa itthu ninikokho ninyu.
47 “Nhotakhaliya nyuuva, kontha nnaateka mahiye omaporofeeta, anhiyataateenyu yaawiivakacilyaaya.
48 Khweeliini, nyuuva nkhanle masaahiti o citthu cootakhala asinhiyataateenyu cipankilyaaya, masi uhookhalaru commo, nyuuva khannoona ukhala itthu yootakha, kontha ayo ahowiiva maporofeera masi nyuuva nnaatekela mahiye.
49 Phimaana, ucuwelaca wa Nluku ciicammo uheera: ‘Kinaahala waaveleeliha maporofeeta ni maapostolu, ayo anaahala uwiiva ni akinaayo waalupattha,
50 wiira iphome yo maporofeeta, ikhumelo yumpiyaaya ituninya alivihiye ala atthwaala,
51 ikhumelo iphome ya Apeli ni mpaka ya Zakariya, yooyo eeviye iriyari ikhilompi ni inupa ya Nluku. Iyee, mi kinoohimeeryani wiira aanaahala ulivihiya ala atthwaala.
52 “Nhotakhaliya nyuuva anamacuwelaca nlamulo, kontha nhowaakha aatthu isaavi yooncuwela Nluku. Nyuuva mwaaneeneenyu khankenle ni nnaamananiha waahiiha ale ampheela ukela”
53 Vano, ukati waakhumilyaawe nne nipuronne, anamantikha ni mafariseu yahopacera unsupha venci, yankohakohaka citthu cinci,
54 yaavyaka mananna oopheela unvariha ni moolumwaawe.
